ចលនាមាតាធម្មជាតិ បានរកឃើញថា សំណង់អគារចំនួន៥នៅខេត្តព្រះសីហនុបានសាងសង់ដោយខុសច្បាប់ និងផ្ទុយពីសារាចរណ៍ណែនាំស្តីពីការអភិវឌ្ឍតំបន់ឆ្នេរសមុទ្ររបស់កម្ពុជា។
សារាចរណ៍ណែនាំស្តីពីការអភិវឌ្ឍតំបន់ឆ្នេរសមុទ្ររបស់កម្ពុជាឆ្នាំ២០១២ ហាមដាច់ខាតមិនឲ្យមានការសាងសង់ណាមួយក្នុងចំងាយ ១០០ម៉ែត្រពីឆ្នេរសមុទ្រដោយគិតចាប់ពីចំណុចទឹកជោរនៃទឹកសមុទ្រ។
ក្នុងវីដេអូស៊ើបអង្កេតមួយប្រវែងជាង២នាទីកន្លះដែលចេញផ្សាយតាមបណ្តាញសង្គមកាលពីម្សិលមិញនេះ ក្រុមការងារចលនាមាតាធម្មជាតិអះអាងថា អគារចំនួន៥កំពុងសាងសង់នៅឆ្នេរឯករាជ្យ មានសណ្ឋាគារ និងកាស៊ីណូ Xihaohui Palaceបានសាងសង់ឆ្ងាយពីសមុទ្រ ឬកំរិតទឹកជោរត្រឹមតែ១៩ម៉ែត្រ អគារយក្សឈ្មោះBlue Bay ចំងាយ៥៥ម៉ែត្រ សណ្ឋាគារ និងកាស៊ីណូ Sunshine Bay ៤៥ម៉ែត្រ សណ្ឋាគារNovotel Holiday Palace ១៦ម៉ែត និងអគារកាស៊ីណូHoliday Palace ១៨ម៉ែត្រ។
ចលនាមាតាធម្មជាតិបញ្ជាក់ថា ការសាងសង់សំណង់ទាំងនោះ គឺធ្វើឡើងផ្ទុយពីច្បាប់រដ្ឋធម្មនុញ្ញ និងច្បាប់ភូមិបាល ហើយថា ម្ចាស់សំណង់អាចសាងសង់អគារទាំងនេះទៅបានដោយសារមានអំពើពុករលួយ។
ក្នុងឃ្លីបនោះចលនាមាតាធម្មជាតិក៏បានទាមទារទៅរដ្ឋមន្រ្តីក្រសួងរៀបចំដែនដីនគររូបនីយកម្ម និងសំណង់ឆ្លើយបំភ្លឺពាក់ព័ន្ធបញ្ហានេះផងដែរ។
សកម្មជនចលនាមាតាធម្មជាតិ បាននិយាយក្នុងវីដេអូនោះថា៖«ឯកឧត្តម ជា សុផារ៉ា ខណៈដែលឯកឧត្តមធ្លាប់មានភាពស្វាហាប់ក្នុងការបណ្តេញប្រជាជនចេញពីតំបន់ឆ្នេរចាប់តាំងពីឆ្នាំ២០១៦មក ដោយចោទប្រកាន់ពួកគាត់ថា បានរំលោភយកដីឆ្នេរខុសច្បាប់។ ដូច្នេះខ្ញុំមានសំនួរសួរទៅកាន់ឯកឧត្តមថា តើមូលហេតុអ្វីបានជាមានការអនុញ្ញាតឲ្យមានការសាងសង់អគារទាំងនេះ ជាបន្តបន្ទាប់នៅលើដីឆ្នេរសាធារណៈរបស់យើង»។
វីអូឌី មិនអាចសុំការឆ្លើយតបពីរដ្ឋមន្រ្តីក្រសួងរៀបចំដែនដី លោក ជា សុផារ៉ាបានទេដោយទូរសព្ទចូលអ្នកទទួលប្រាប់ថាកំពុងជាប់រវល់ប្រជុំ។ រីឯអ្នកនាំពាក្យក្រសួងនេះគឺលោក សេង ឡូត ថាកំពុងរវល់ប្រជុំដែរ។
អ្នកនាំពាក្យសាលាខេត្តព្រះសីហនុលោក ឃាង ភារម្យ មានប្រសាសន៍ថា លោក បានឃើញវីដេអូរបស់ក្រុមការងារចលនាមាតាធម្មជាតិនោះហើយ។ លោកថា ក្រុមការងារអន្តរក្រសួងកំពុងធ្វើការលើរឿងនេះ។
លោក បន្ថែមថា៖«ខ្ញុំគ្រាន់តែជម្រាបយ៉ាងខ្លីថា ធម្មតាសំណង់ដែលគេធ្វើហ្នឹងកាលណាអត់មានច្បាប់គេធ្វើអត់កើតទេ។ ហើយក្នុងករណីប្រសិនបើរកឃើញថា វាខុសច្បាប់អាហ្នឹងយើងនឹងមានវិធានការ។ ក្រុមការងារអន្តរក្រសួងដែលបង្កើតឡើងថ្មីៗនេះគេនឹងធ្វើលើករណីហ្នឹងឲ្យតែនៅក្នុងខេត្តព្រះសីហនុ។អ៊ីចឹងរង់ចាំចំណាត់ការដែលគេកំពុងធ្វើហ្នឹង»។
គួររំលឹកថា បន្ទាប់ពីឧបទ្ទវហេតុបាក់សំណង់អគារនៅខេត្តព្រះសីហនុ ដែលបណ្ដាលឲ្យកម្មករខ្មែរ ២៨នាក់ស្លាប់ និង២៦នាក់ទៀតរងរបួសនោះ រដ្ឋាភិបាលបានបង្កើតគណៈកម្មការមួយ ដើម្បីត្រួតពិនិត្យគុណភាពសំណង់នៅខេត្តជាប់មាត់សមុទ្រមួយនេះ។
លោកនាយករដ្ឋមន្រ្តី ហ៊ុន សែន បានបញ្ជាដោយផ្ទាល់ទៅរដ្ឋមន្ដ្រីក្រសួងរៀបចំដែនដី លោក ជា សុផារ៉ា ឲ្យពិនិត្យមើលឡើងវិញ និងចាត់វិធានការតាមផ្លូវច្បាប់ឲ្យបានម៉ឺងម៉ាត់ចំពោះសំណង់អគារទាំងឡាយនៅខេត្តព្រះសីហនុ ដែលមិនមានច្បាប់អនុញ្ញាត និងអនុវត្តតាមស្ដង់ការ នៃការសាងសង់ ដោយថា ដើម្បីទប់ស្កាត់កុំឲ្យកើតមានសោដនាដកម្មបែបនេះសារជាថ្មី។
រដ្ឋមន្ត្រីក្រសួងមហាផ្ទៃ លោក ស ខេង បានឲ្យដឹងកាលពីម្សិលមិញថា គិតត្រឹមថ្ងៃទី២៥ ខែមិថុនា គណៈកម្មការត្រួតពិនិត្យគុណភាពសំណង់នៅខេត្តព្រះសីហនុ បានរកឃើញសំណង់ចំនួន៥កន្លែង កំពុងសាងសង់ដោយគ្មានច្បាប់អនុញ្ញាតត្រឹមត្រូវ៕
