ប្រធានអតីតគណបក្សសង្គ្រោះជាតិ លោក កឹម សុខា យកថ្ងៃខួបកំណើតរបស់លោកបញ្ជាក់ជំហថាគ្មានទេពាក្យថាស្តាយក្រោយដែលបានបូជាជូនជាតិ ប្រជាពលរដ្ឋ ដើម្បីលទ្ធិប្រជាធិបតេយ្យនិងការផ្សះផ្សាជាតិ។
លោក កឹម សុខា បានសរសេរលើហ្វេសប៊ុក របស់លោកនាថ្ងៃទី២៧នេះ អរគុណដល់អ្នកដែលបានសរសេរជូនពរលោកក្នុងថ្ងៃខួបកំណើតគម្រប់៦៧ឆ្នាំ។
អតីតមេបក្សប្រឆាំងរូបនេះ អះអាងទៀតថាទឹកចិត្ត និងសេចក្តីនឹករឭក របស់ជនរួមជាតិ បានផ្តល់កម្លាំងចិត្ត ជំរុញលោកឱ្យបន្តនូវស្មារតីសេ្នហាជាតិដោយថា បើទោះជារូបកាយលោកត្រូវបានបាត់បង់សេរីភាពអស់ជិត២ឆ្នាំមកហើយក៏ដោយ។
មេដឹកនាំរូបនេះ បញ្ជាក់ថា៖«មិនថារងទុក្ខឬការធ្វើបាបតាមរូបភាពណាវាគ្មានទេពាក្យថាស្តាយក្រោយសម្រាប់ កឹម សុខា ដែលបានបូជាជូនជាតិ ប្រជាពលរដ្ឋដើម្បីលទ្ធិប្រជាធិបតេយ្យ សិទ្ធិសេរីភាព អធិបតេយ្យភាព និងការផ្សះផ្សាជាតិ»។
លោក កឹម សុខា ហាក់បានប្តេជ្ញាថាទោះបីមានឧបសគ្គយ៉ាងណាក៏ដោយ ដរាបណាព្រះអាទិត្យនៅតែរះលោកថាសូមប្រជាជាតិខ្មែរជឿចុះថា លោកនៅតែភ្ញាក់ឡើង ទន្ទឹងរង់ចាំថ្ងៃដែលបានជួបជុំនិងបម្រើជាតិខ្មែរតទៅទៀត។
អ្នកនាំពាក្យគណបក្សប្រជាជនកម្ពុជាលោក ឈឹម ផលវរុណ ហៅសាររបស់លោក កឹម សុខា ថាហាក់ចង់យកឥទ្ធិពលអាមេរិកមកសាបព្រោះនៅកម្ពុជា។
លោក មានប្រសាសន៍ថា៖«លោក កឹម សុខា គួរបន្ថែមពាក្យឲ្យពេញថា ក្នុងជីវិតរបស់គាត់ គាត់ចង់យកប្រជាធិបតេយ្យបែបអាមេរិក មកដាំនៅលើទឹកដីកម្ពុជាអាណឹងបានត្រឹមត្រូវ។ បាត់ពាក្យប្រជាធិបតេយ្យបែបអាមេរិកគឺអត់ត្រឹមត្រូវទេ គួរថែមពាក្យបែអាមេរិក»។
អ្នកវិភាគនយោបាយ លោក មាស នី មានប្រសាសន៍ថា ការមិនយល់គ្នា លើដំណើរការប្រជាធិបតេយ្យនេះហើយ វាបានរុញកម្ពុជា ឲ្យរអិលទៅរកការគំរាមកំហែងកាត់ផ្តាច់ប្រព័ន្ធអនុគ្រោះផ្នែកពាណិជ្ជកម្មពីលោកសេរី ។ អ្នកឃ្លាំមើលរូបនេះ ផ្តល់ជាយោបល់ថា ប្រជាធិបតេយ្យដែលពលរដ្ឋ និងសហគមន៍អន្តរជាតិចង់បាន គឺការឯកភាពជាតិ ធានាដល់ការបើកលំហសេរីភាព និងពង្រឹងនីតិរដ្ឋ ។
លោកថា៖«ខ្ញុំគិតថា ប្រជាធិបតេយ្យដែលបានប្រយោជន៍ដល់រដ្ឋ ដល់ពលរដ្ឋគឺ ប្រជាធិបតេយ្យមួយដែលពលរដ្ឋមានសិទ្ធិពេញលេញ។ ហើយការគោរពសិទ្ធិមនុស្សត្រូវបានគេអនុវត្ត។ ប្រទេសមាននីតិរដ្ឋច្បាស់លាស់ត្រឹមត្រូវ មិនមែនជាប្រទេសយកប្រព័ន្ធយុត្តិធម៌ មកប្រើជាឧបករណ៍ ហើយស្រែកថា អាហ្នឹងជាលទ្ធិប្រជាធិបតេយ្យនោះទេ »។
បើតាមលោកមាស នី បើកម្ពុជាត្រូវបានសហគមន៍អន្តរជាតិកាត់ផ្តាច់ប្រព័ន្ធអនុគ្រោះ ដោយសារតែលក្ខខណ្ឌទាមទារឲ្យស្តារប្រជាធិបតេយ្យឡើងវិញនោះ លោកថា អ្នកនយោបាយ គ្រប់គ្រងអំណាចជាអ្នកទទួលខុសត្រូវចំពោះមុខប្រវត្តិសាស្ត្រ។
អ្នកវិភាគនយោបាយ លោក មាស នី មានប្រសាសន៍ថា ការមិនយល់គ្នា លើដំណើរការប្រជាធិបតេយ្យនេះហើយ វាបានរុញកម្ពុជា ឲ្យរអិលទៅរកការគំរាមកំហែងកាត់ផ្តាច់ប្រព័ន្ធអនុគ្រោះផ្នែកពាណិជ្ជកម្មពីលោកសេរី ។ អ្នកឃ្លាំមើលរូបនេះ ផ្តល់ជាយោបល់ថា ប្រជាធិបតេយ្យដែលពលរដ្ឋ និងសហគមន៍អន្តរជាតិចង់បាន គឺការឯកភាពជាតិ ធានាដល់ការបើកលំហសេរីភាព និងពង្រឹងនីតិរដ្ឋ ។
លោកថា៖«ខ្ញុំគិតថា ប្រជាធិបតេយ្យដែលបានប្រយោជន៍ដល់រដ្ឋ ដល់ពលរដ្ឋគឺ ប្រជាធិបតេយ្យមួយដែលពលរដ្ឋមានសិទ្ធិពេញលេញ។ ហើយការគោរពសិទ្ធិមនុស្សត្រូវបានគេអនុវត្ត។ ប្រទេសមាននីតិរដ្ឋច្បាស់លាស់ត្រឹមត្រូវ មិនមែនជាប្រទេសយកប្រព័ន្ធយុត្តិធម៌ មកប្រើជាឧបករណ៍ ហើយស្រែកថា អាហ្នឹងជាលទ្ធិប្រជាធិបតេយ្យនោះទេ »។
បើតាមលោកមាស នី បើកម្ពុជាត្រូវបានសហគមន៍អន្តរជាតិកាត់ផ្តាច់ប្រព័ន្ធអនុគ្រោះ ដោយសារតែលក្ខខណ្ឌទាមទារឲ្យស្តារប្រជាធិបតេយ្យឡើងវិញនោះ លោកថា អ្នកនយោបាយ គ្រប់គ្រងអំណាចជាអ្នកទទួលខុសត្រូវចំពោះមុខប្រវត្តិសាស្ត្រ។
លោក កឹម សុខាត្រូវបានសមត្ថកិច្ចឆ្មក់ចូលចាប់ខ្លួនទាំងយប់កាលពីថ្ងៃទី៣ខែកញ្ញាឆ្នាំ២០១៧ ចោទថា« ក្បត់ជាតិ»ឃុបឃិតជាមួយសហរដ្ឋអាមេរិក ចង់ផ្តួលរលំរដ្ឋាភិបាលដែលដឹកនាំដោយលោក ហ៊ុន សែន។
ប៉ុន្តែសហរដ្ឋអាមេរិក ពីថ្ងៃទី១៥មីនា២០១៩តាមរយៈស្ថានទូតរបស់ខ្លួនប្រចាំកម្ពុជា បានលើកឡើងថា «លោក កឹម សុខា ជាមនុស្សស្អាតស្អំ ដែលត្រូវបានឃុំខ្លួនដោយអយុត្តិធម៌ក្រោមការចោទប្រកាន់មិនពិត»៕
