សមាជិកសភាសហភាពអឺរ៉ុបម្នាក់ បានអះអាងថានឹងធ្វើដំណើរមកប្រទេសកម្ពុជាជាមួយលោក សម រង្ស៊ី និងមេដឹកអតីតបក្សប្រឆាំងផ្សេងទៀត ដើម្បីស្តារប្រជាធិបតេយ្យ។
លោក Phil Bennion សមាជិកសភាសហភាពអឺរ៉ុប បានអះអាងបែបនេះក្នុងពេលដែលជួបជាមួយលោក សម រង្ស៊ី និង អតីតមេដឹកនាំគណបក្សសង្រ្គោះជាតិមួយចំនួនទៀតនាទីក្រុងព្រុចសែល ប្រទេសបែលហ្ស៊ិក។
កាលពីម្សិលមិញ លោក Phil Bennionបានបង្ហោះវីដេអូឃ្លីបមួយដែលថតជាមួយលោក សម រង្ស៊ី និងលោកស្រី មួ សុខហួរ ក្នុងបណ្ដាញសង្គមTwitter របស់លោក។ ក្នុងវីដេអូឃ្លីបរយៈពេលជាង១នាទីនោះ លោក Phil Bennion បានលើកឡើងថាពេលនេះសភាអឺរ៉ុបកំពុងចាប់ផ្ដើមពិនិត្យថាតើរដ្ឋាភិបាលកម្ពុជារក្សានូវកិច្ចព្រមព្រៀងជុំវិញការធ្វើពាណិជ្ជកម្មដែរឬទេ។ លោក បន្តថាប្រសិនមិនបានគោរពទេនោះ សហភាពអឺរ៉ុបនឹងមានវិធានការមួយចំនួនលើកម្ពុជា។
សមាជិកសភាសហភាពអឺរ៉ុបមកពីប្រទេសអង់គ្លេសរូបនេះ ក៏បានអំពាវនាវឲ្យប្រជាជនកម្ពុជានាំគ្នាត្រលប់ចូលប្រទេសវិញដើម្បីកសាងលទ្ធិប្រជាធិបតេយ្យឡើងវិញ។ លោក ថាក្រោមការដឹកនាំរបស់លោកនាយករដ្ឋមន្រ្តីហ៊ុន សែន លទ្ធិប្រជាធិបតេយ្យត្រូវបានលុបបំបាត់ ហើយបក្សប្រឆាំងត្រូវបានរារាំង ដែលលោកជឿថាមានចិននៅគាំទ្រពីក្រោយ។
លោក Phil Bennion អះអាងថាសហភាពអឺរ៉ុបនឹងឈរជាមួយពលរដ្ឋកម្ពុជាក្នុងយុទ្ធនាការណ៍ស្តារប្រជាធិបតេយ្យ។
លោក មានប្រសាសន៍ថា៖«ខ្ញុំ នឹងចូលរួមជាមួយអ្នក។ ខ្ញុំនឹងត្រលប់ទៅជាមួយអ្នក ហើយទៅប្រទេសកម្ពុជាដើម្បូីជួបលោក កឹម សុខា។ ហើយ ព្យាយាមនាំយកកម្ពុជាមកកាន់ផ្លូវប្រជាធិបតេយ្យវិញ។»
កាលពីម្សិលមិញ លោកស្រី មូរ សុខហួរ អនុប្រធានអតីតគណបក្សសង្រ្គោះ បានអះអាងថាក្រោយជំនួបជាមួយសមាជិកសភាអឺរ៉ុប និងគណៈកម្មការអឺរ៉ុប នាទីក្រុងព្រុចសែល ប្រទេសបែកហ្ស៊ិកកាលពីម្សិលមិញ មានសមាជិកសភាអឺរ៉ុប៦រូបហើយដែលថានឹងរួមដំណើរជាមួយអតីតមេដឹកនាំបក្សប្រឆាំងចូលកម្ពុជា។
លោកស្រី មូរ សុខហួរ បញ្ជាក់ថាសមាជិកសភាទាំងនោះមកពីប្រទេសផ្សេងៗគ្នាក្នុងសហភាពអឺរ៉ុបដូចជាស៊ុយអែត ប៊ុលហ្គារី អេស្ប៉ាញ អង់គ្លេស និងប៉ទុយហ្គាល់ជាដើម។ អតីតតំណាងរាស្រ្តបក្សប្រឆាំងរូបនេះ បញ្ជាក់ថាដំណើរវិលត្រលប់របស់ក្រុមអតីតមេដឹកនាំបក្សសង្រ្គោះជាតិនឹងធ្វើឡើងមិនឲ្យយូរជាងខែកញ្ញាឡើយ។
អ្នកជំនាញគោលនយោបាយ និងជាសាស្ត្រាចារ្យរងផ្នែកការទូត និងកិច្ចការពិភពលោកនៃមហាវិទ្យាល័យ Occidental សហរដ្ឋអាមេរិក លោក អៀ សុផល មានប្រសាសន៍ថារដ្ឋាភិបាលអាចបដិសេធមិនឲ្យសមាជិកសភាសហភាពអឺរ៉ុប លោក Phil Bennionចូលកម្ពុជា ឬក៏បញ្ជូនទៅវិញនៅពេលដែលមកដល់ ហើយបន្ទាប់មកចាប់ខ្លួនលោក សម រង្ស៊ី។
ទោះយ៉ាងណាក៏ដោយ អ្នកជំនាញគោលនយោបាយ និងទំនាក់ទំនងអន្តរជាតិរូបនេះ ក៏មើលឃើញម្យ៉ាងទៀតដែរថាការរួមដំណើររបស់លោក Phil Bennion អាចជាឱកាសសម្រាប់លោក សម រង្ស៊ីដែរ។ លោក យល់ថាវត្តមានរបស់សមាជិកសភាអឺរ៉ុប អាចជាវិធីសាស្រ្តមួយដែលជួយឲ្យលោក សម រង្ស៊ី បានត្រលប់ចូលប្រទេសវិញ ហើយការព្យួរ EBA ក៏ត្រូវបានលុបចោល។
ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថាអ្នកណាក៏អាចចូលកម្ពុជាបានដែរ ជាពិសេសជនបរទេសទាំងអស់រដ្ឋាភិបាលស្វាគមន៍ ប៉ុន្តែសម្រាប់អ្នកដែលមានទោសសមត្ថកិច្ចកម្ពុជានឹងចាត់ការតាមផ្លូវច្បាប់។ លោក សុខ ឥសាន បន្ថែមថាការអមដំណើររបស់លោក Phil Bennion ជាមួយលោកសម រង្ស៊ី មិនបានជួយអ្វីដល់លទ្ធិប្រជាធិបតេយ្យនោះទេ។
លោក មានប្រសាសន៍ថា៖«គ្រាន់តែអមដំណើរ វាមិនមានន័យថាស្តារលទ្ធិប្រជាធិបតេយ្យអីទេ។ ធ្វើម៉េចគាត់ស្តារប្រទេសគាត់ឲ្យតែល្អទៅ។ បាទ! រាល់ថ្ងៃហ្នឹងប្រជាធិបតេយ្យប្រទេសគាត់ល្អហ្នឹង ល្អណាអី ប្រជាធិបតេយ្យនោះ។»
កាលពីថ្ងៃទី១១ ខែកុម្ភៈ ឆ្នាំនេះ សហភាពអឺរ៉ុបបានប្រកាសអំពីការចាប់ផ្ដើមដំណើរការដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនីតិរដ្ឋ នៅក្នុងរយៈពេល ១៨ខែចុងក្រោយមកនេះ។ នៅខែសីហា ខាងមុខនេះ សហភាពអឺរ៉ុបនឹងធ្វើសេចក្តីសម្រេចថាតើប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ត្រូវព្យួរ ឬរក្សាទុកដដែលសម្រាប់កម្ពុជា៕
