នាយករដ្ឋមន្ត្រី អះអាងថា បញ្ហា EBA បានក្លាយជាស្រមោលទៅហើយ តែកិច្ចសហការពាណិជ្ជកម្មទ្វេភាគីជាមួយសមាជិកសហភាពអឺរ៉ុបជាមូលដ្ឋានគ្រឹះសម្រាប់ទិសដៅពាណិជ្ជកម្មរបស់កម្ពុជា។
តាមហ្វេសប៊ុករបស់អ្នកនាំពាក្យរដ្ឋាភិបាល លោក ផៃ ស៊ីផាន នាកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី១២ ខែកក្កដានេះ លោកនាយករដ្ឋមន្ត្រី បានលើកឡើងថា៖
«បញ្ហា EBA បានក្លាយជាស្រមោលទៅហើយ។ កិច្ចសហការពាណិជ្ជកម្មទ្វេភាគីរវាងកម្ពុជា និងប្រជាជាតិដែលជាសមាជិក EU គឺជាមូលដ្ឋានគ្រឹះ និងទិសដៅនៃពាណិជ្ជកម្មកម្ពុជា»។
ចាប់ពីខែកុម្ភៈមក សហភាពអឺរ៉ុបដែលមានសមាជិក២៨ប្រទេស បានដំណើរការនិតិវិធីឈានទៅព្យួរប្រព័ន្ធអនុគ្រោះពន្ធ EBA ជាបណ្ដោះអាសន្ន ក្រោយពីរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងប្រជាធិបតេយ្យ តាមលក្ខខណ្ឌរបស់ខ្លួន។
លក្ខខណ្ឌនេះ សហភាពអឺរ៉ុប ទាមទារឲ្យរដ្ឋាភិបាលកម្ពុជាស្ដារស្ថានភាពសិទ្ធិមនុស្ស ឲ្យអតីតគណបក្សសង្គ្រោះជាតិបានដំណើរការឡើងវិញ និងត្រូវដោះលែងលោក កឹម សុខា ជាដើម។
ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ ហៅកាត់ថា EBA ត្រូវបានមន្ត្រីជំនាញ រដ្ឋាភិបាលប៉ាន់ប្រមាណថា ទឹកប្រាក់ជិត៧០០លានដុល្លារក្នុងមួយឆ្នាំ ដែលកម្ពុជាចំណេញពីការមិនបង់ពន្ធ៕