ក្រសួងការបរទេសកម្ពុជាចាត់ទុកការដែលសភាអាមេរិកអនុម័តច្បាប់ បើកផ្លូវឱ្យដាក់ទណ្ឌកម្មមន្ត្រីជាន់ខ្ពស់ រួមទាំងនាយករដ្ឋមន្ត្រីផងនោះ ថាជាការបំពានគោលការណ៍អន្តរជាតិស្ដីពីអធិបតេយ្យភាព និងជាការបំផ្លាញប្រជាធិបតេយ្យនៅកម្ពុជា។
សមាជិកសភាសហរដ្ឋអាមេរិក លោក Ted Yoho បានលើកឡើងកាលពីថ្ងៃចន្ទម្សិលមិញ តាមសេចក្ដីប្រកាសព័ត៌មានរបស់ខ្លួនថា សភាតំណាងរាស្ត្រសហរដ្ឋអាមេរិកបានអនុម័តសេចក្ដីស្នើច្បាប់ស្ដីពីលទ្ធិប្រជាធិបតេយ្យនៅកម្ពុជា ដើម្បីដាក់ទណ្ឌកម្មប្រឆាំងនឹងលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់កម្ពុជាមួយចំនួនទៀត។
សមាជិកសភាអាមេរិករូបនេះ បានលើកឡើងទៀតថា វាដល់ពេលហើយដែលរដ្ឋាភិបាលលោកនាយករដ្ឋមន្ត្រី ហ៊ុន សែន ត្រូវទទួលខុសត្រូវចំពោះទង្វើរបស់ខ្លួន។
លោក Ted Yoho លើកឡើងថា ច្បាប់នេះនឹងដាក់ទណ្ឌកម្មផ្នែកហិរញ្ញវត្ថុ និងទិដ្ឋាការចំពោះមន្ត្រីជាន់ខ្ពស់រដ្ឋាភិបាល និងយោធាកម្ពុជាដែលបានបំផ្លាញលទ្ធិប្រជាធិបតេយ្យ និងរំលោភសិទ្ធិមនុស្ស។
ប៉ុន្តែ ក្រសួងការបរទេសកម្ពុជា តាមរយៈសេចក្ដីថ្លៃងការណ៍ចុះថ្ងៃទី១៦ ខែកក្កដា លើកឡើងថា ខ្លួនមានការខកចិត្តយ៉ាងខ្លាំងចំពោះព័ត៌មាននេះ និងបានបដិសេធយ៉ាងដាច់អហង្ការនូវការចោទប្រកាន់ទៅលើរដ្ឋាភិបាល។
សេចក្ដីថ្លែងការណ៍កម្រាស់៥ទំព័រដដែលលើកឡើងទៀតថា ការចោទប្រកាន់នេះ ផ្អែកទៅលើព័ត៌មានបំភ្លៃ លំអៀង និងព័ត៌មានចាស់ហួសសម័យ ដោយសារតែហេតុផលនយោបាយ និងស្តង់ដារពីរ។
ក្រសួងចាត់ទុកថា៖ «ខ្លឹមសារនៃសេចក្ដីព្រាងច្បាប់នេះកាន់តែបង្កការរំខានថែមទៀត នៅពេលដែលបុគ្គលសាធារណៈ របស់រដ្ឋអធិបតេយ្យមួយបានក្លាយជាកម្មវត្ថុនៃវិធានការដាក់ទណ្ឌកម្មពីសំណាក់រដ្ឋមួយផ្សេងទៀត ដោយផ្អែកលើការចោទប្រកាន់គ្មានមូលដ្ឋាន។នេះជាការរំលោភបំពានយ៉ាងជាក់ស្តែងចំពោះគោលការណ៍អន្តរជាតិស្ដីពីអធិបតេយ្យភាពសមភាព និងការមិនជ្រៀតជ្រែកកិច្ចការផ្ទៃក្នុងដូចមានចែងក្នុងមាត្រា២ នៃរដ្ឋធម្មនុញ្ញអង្គការសហប្រជាជាតិ»។
អតីតអនុប្រធានគណបក្សសង្គ្រោះជាតិ លោកស្រី មូរ សុខហួរ ដែលកំពុងនិរទេសខ្លួន ហៅសេចក្ដីស្នើច្បាប់ HR ៥២៦ ដែលសភាអាមេរិកបានអនុម័តនេះ ថាជាក្តីសង្ឃឹមនៃការរស់ឡើងវិញនៃដំណើរការប្រជាធិបតេយ្យនៅកម្ពុជា។
លោកស្រីថា៖ «ច្បាប់នេះបានផ្តល់ក្ដីសង្ឃឹមដល់យើងជាអ្នកប្រជាធិបតេយ្យ ដល់ពលរដ្ឋខ្មែរយើងដែលចង់ឃើញប្រទេសជាតិយើងគ្រប់គ្រងដោយច្បាប់ ដែលពលរដ្ឋមានសិទ្ធិសេរីភាពគ្រប់គ្រាន់ក្នុងការជ្រើសរើសអ្នកដឹកនាំ។ បញ្ជាក់ឱ្យច្បាស់ណាស់ អ្នកដែលមិនទទួលយកច្បាប់នេះ ជាអ្នកដែលមិនចង់ឃើញលទ្ធិប្រជាធិបតេយ្យនៅកម្ពុជា»។
អ្នកវិភាគនយោបាយ លោកបណ្ឌិត ឡៅ ម៉ុងហៃ មានប្រសាសន៍ថា សហរដ្ឋអាមេរិកជាមហាអំណាចមួយក្នុងចំណោមមហាអំណាចមួយចំនួនទៀតដែលបានចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស និងថា ប្រតិកម្មរបស់រដ្ឋាភិបាលទៅនឹងការផ្តល់អនុសាសន៍ពីសហរដ្ឋអាមេរិកទាក់ទិនទៅនឹងបញ្ហាសិទ្ធិមនុស្ស ក៏មិនមែនជារឿងថ្មីដរ។
ប៉ុន្តែ អ្នកវិភាគជើងចាស់រូបនេះយល់ថា ការដែលអាមេរិកធ្វើច្បាប់ដាក់ទណ្ឌកម្មអ្នកដែលរារាំងដល់ដំណើរការប្រជាធិបតេយ្យ ជាការបំពេញកាតព្វកិច្ចរបស់មហាអំណាចក្នុងការទប់ស្កាត់កុំឱ្យភាគីកម្ពុជារំលោភបំពានកិច្ចព្រមព្រៀងនេះ មិនមែនជាការជ្រៀតជ្រែងផ្ទៃក្នុងកម្ពុជាទេ។
លោកថា៖ «ក្នុងកិច្ចព្រមព្រៀងសន្តិភាពទីក្រុងប៉ារីសហ្នឹងដែរ បានមូរមាត់គ្នាថា កម្ពុជានឹងអនុវត្តលទ្ធិប្រជាធិបតេយ្យ សេរីពហុបក្ស គោរពសិទ្ធិមនុស្ស និងនីតិរដ្ឋថែមទៀត មានតុលាការឯករាជ្យជាអាថ៌។ ដូច្នេះ ខ្ញុំអាចចាត់ទុកថា នេះជាកាតព្វកិច្ចរបស់ប្រទេសជាហត្ថលេខីដែលឃើញថា អ្វីដែលបានមូរមាត់គ្នាត្រូវបានរំលោភបំពាន»។
យ៉ាងនេះក្ដី រដ្ឋាភិបាលកម្ពុជា ប្តេជ្ញាចិត្តឥតងាករេក្នុងការប្រកាន់យកលទ្ធិប្រជាធិបតេយ្យសេរីពហុបក្ស លើកកម្ពស់នីតិរដ្ឋ និងការគោរពសេរីភាពជាមូលដ្ឋាន ស្របតាមរដ្ឋធម្មនុញ្ញ និងទទូចដល់អង្គនីតិប្បញ្ញត្តិបរទេសទាំងអស់ រក្សានូវភាពឥតលំអៀងរបស់ខ្លួន និងចៀសវាងនូវសកម្មភាពមិនចាំបាច់នានាដែលមិនគោរពដល់អធិបតេយ្យភាព និងកិច្ចការផ្ទៃក្នុងរបស់កម្ពុជា។
