អតីតថ្នាក់ដឹកនាំបក្សប្រឆាំងនៅក្រៅប្រទេស និងអ្នកគាំទ្រមួយចំនួន ប្រមូលផ្តុំគ្នាតវ៉ាមុខវិមានរដ្ឋាភិបាលអាមេរិកនៅទីក្រុងវ៉ាស៊ីងតោន និងទាមទារឲ្យពន្លឿនច្បាប់ដាក់ទណ្ឌកម្មបក្សកាន់អំណាច ដើម្បីជំរុញដល់ការស្តារប្រជាធិបតេយ្យនៅកម្ពុជាឡើងវិញ។
តាមវីដេអូឃ្លីបលើគេហទំព័រ ឌឹខេមបូឌា ដេលី អ្នកដែលបានចូលរួមធ្វើបាតុកម្មនោះ បង្ហាញក្តីសង្ឃឹមថា អាមេរិកនឹងពន្លឿនច្បាប់នេះ តាមការទាមទាររបស់ពួកគេ ដើម្បីដាក់សម្ពាធទៅរដ្ឋាភិបាលរបស់លោក ហ៊ុន សែន ឲ្យស្តារប្រជាធិបតេយ្យឡើងវិញ។
បាតុករម្នាក់ ដែលមិនត្រូវបានបង្ហាញឈ្មោះ បានប្រាប់ថា៖ «ច្បាប់នេះ មានសារៈសំខាន់ណាស់សម្រាប់ប្រទេសជាតិយើង អញ្ចឹងពួកខ្ញុំសប្បាយចិត្តមែនទែន ការលះបង់របស់យើងគឺយើងមិនរួញរាទេ មិនរាថយទេ គឺយើងពេញចិត្តនឹងធ្វើ ធ្វើដើម្បីប្រទេសជាតិយើង ធ្វើដើម្បីខ្មែរយើង»។
ចំណែកបាតុករម្នាក់ទៀត ដែលមានឈ្មោះថា ស៊ូស៊ី បាននិយាយក្នុងវីដេអូឃ្លីបនោះថា៖ «នាងខ្ញុំក្តៅមែន ប៉ុន្តែ ចិត្តវាក្តៅជាងនេះទៀត យើងពុះកញ្ជ្រោល។ យើងដឹងហើយថា លោក ហ៊ុន សែន ពេលនេះកំពុងខ្លាចពួកយើង ព្រោះយើងបានជំរុញឲ្យមានច្បាប់ HR ៥២៦ នេះ»។
អំឡុងពេលតវ៉ានោះ អតីតមេដឹកនាំគណបក្សសង្គ្រោះជាតិ មានលោក សម រង្ស៊ី និងលោកស្រី មូរ សុខហួរ ក៏មានវត្តមានក្នុងក្រុមតវ៉ានេះដែរ។
លោក សម រង្ស៊ី អះអាងថា ច្បាប់នេះ មានឥទ្ធិពលជំរុញឲ្យបក្សកាន់អំណាចពិចារណាស្តារប្រជាធិបតេយ្យ ដោយថា ច្បាប់នេះ បានបង្កផលប៉ះពាល់ខ្លាំងដល់ផលប្រយោជន៍ក្រុមគ្រួសារនាយករដ្ឋមន្ត្រី និងមន្ត្រីជាន់ខ្ពស់មួយចំនួនទៀត។
លោក សម រង្ស៊ី ថ្លែងថា៖ «យើងអបអរសារទរចំពោះច្បាប់ដ៏ល្អដែលមានប្រសិទ្ធភាព ពីព្រោះ វាប៉ះពាល់ដល់ផលប្រយោជន៍ជនផ្តាច់ការ ប៉ះពាល់ដល់ប្រយោជន៍ពួកគេ ច្បាស់ជាពួកគេយកចិត្តទុកដាក់»។
លោកស្រី មូរ សុខហួរ ឲ្យដឹងតាមបណ្តាញសង្គមនៅថ្ងៃព្រហស្បតិ៍នេះថា ថ្នាក់ដឹកនាំគណបក្សនេះ ត្រូវបានអនុញាតឲ្យចូលជួបគណៈកម្មាធិការកិច្ចការបរទេសរបស់សហរដ្ឋអាមេរិក និងព្រឹទ្ធសភា ហើយអ្នកស្រីថា ក្នុងជំនួបនេះ ភាគីអាមេរិកសន្យាពន្លឿនច្បាប់នេះឲ្យមានសុពលភាពក្នុងពេលឆាប់ៗ។
សភាជាន់ទាបរបស់សហរដ្ឋអាមេរិក កាលពីថ្ងៃចន្ទកន្លងមកនេះ បានអនុម័តសេចក្តីស្នើច្បាប់ស្តីពីប្រជាធិបតេយ្យកម្ពុជា ឬហៅថា HR ៥២៦ ដើម្បីបើកផ្លូវឲ្យរដ្ឋាភិបាលអាមេរិកអាចចាត់វិធានការបង្កកទ្រព្យសម្បត្តិ និងដាក់ទណ្ឌកម្មទិដ្ឋាការដល់មន្ត្រីកម្ពុជាណាដែលអាមេរិកយល់ថា បានចូលរួមធ្វើឲ្យខូចប្រជាធិបតេយ្យនៅកម្ពុជា។
ប៉ុន្តែ ច្បាប់នេះ ត្រូវឆ្លងកាត់ព្រឹទ្ធសភា និងប្រធានាធិបតីអាមេរិកទៀត ទើបមានសុពលភាពអាចអនុវត្តបាន។
អ្នកនាំពាក្យរដ្ឋាភិបាល លោក ផៃ ស៊ីផាន ហៅច្បាប់សំដៅដាក់ទោសទណ្ឌឥស្សរជនគណបក្សប្រជាជន នយោបាយបក្សកាន់អំណាចនេះថា ជាច្បាប់ «បំផ្លាញកិត្តិយសខ្មែរ» និងចាត់ទុកក្រុមអ្នកតវ៉ាទាំងនោះថា ជាអ្នកប្រឆាំងនឹងការរីកចម្រើនរបស់ជាតិ។
លោក ផៃ ស៊ីផាន ថ្លែងក្នុងសន្និសីទសារព័ត៌មាននៅថ្ងៃនេះថា៖ «ក្រុមហ្នឹងមិនមែនជាក្រុមរួមសុខរួមទុក្ខជាមួយកម្ពុជាទេ។ ក្រុមហ្នឹង មិននិយាយមួយម៉ាត់ទេនៅពេលដែលកម្ពុជារងការឈ្លានពានពីកងទ័ពរបស់ [អតីតនាយករដ្ឋមន្ត្រីថៃ] អាភិស៊ីត វីចាជីវ៉ា នៅតំបន់ប្រាសាទព្រះវិហារ គេអត់ហ៊ាននិយាយមួយម៉ាត់ទេ ប៉ុន្តែ មានកម្លាំងគ្រប់គ្រាន់ មានមហិច្ឆតាចង់ផ្តួលរំលំរដ្ឋាភិបាលដែលកើតចេញពីការបោះឆ្នោត។ នេះជាសុបិន្តរបស់ពួកហ្នឹងទេ»។
អ្នកវិភាគនយោបាយ លោក មាស នី បង្ហាញការព្រួយបារម្ភថា បើច្បាប់នោះត្រូវដាក់ឲ្យអនុវត្តមែន កម្ពុជាអាចនឹងក្លាយជាប្រទេសឯកោ បើរដ្ឋាភិបាលមិនប្រញាប់ស្តារស្ថានការណ៍។
លោក មាស នី ប្រាប់ថា៖ «ការសម្រេចរបស់អាមេរិកមួយ វាអត់អីទេ ប៉ុន្តែ ក្នុងច្បាប់ហ្នឹងវាអាចនឹងពង្រឹងឲ្យសហរដ្ឋអាមេរិកទៅកៀរគរបស្ចឹមប្រទេសដទៃទៀតឲ្យធ្វើតាមខ្លួនដែរ នេះជាទម្លាប់ដែលយើងឃើញកន្លងមក។ នេះជាការព្រួយបារម្ភរបស់ខ្ញុំដែលធ្វើឲ្យកម្ពុជាក្លាយជាប្រទេសឯកោពីបច្ចឹមប្រទេស ហើយទម្លាក់ខ្លួនកាន់តែជ្រៅទៅៗក្នុងរបបកុម្មុយនីស្ត»។
ចំណែក អ្នកវិភាគនយោបាយ លោកបណ្ឌិត ឡៅ ម៉ុងហៃ វិញ បានរៀបរាប់លើហ្វេសប៊ុករបស់លោកថា បើសិនច្បាប់នេះត្រូវបានអនុវត្តទាំងស្រុង វានឹងធ្វើឲ្យកម្ពុជាជាប់ផុងនៅក្នុងភក់ជ្រៅនៃជម្លោះរវាងចិន និងអាមេរិក ដែលកម្ពុជាធ្លាប់ជាប់ផុងនៅក្នុងភក់បែបនេះជាបន្តបន្ទាប់នាទសវត្សរ៍ឆ្នាំ៧០ និង ៨០៕
