ក្រុមបង្ក្រាបបទល្មើសព្រៃឈើរបស់រដ្ឋាភិបាល អះអាងថា ពួកគេកំពុងស៊ើបអង្កេតលើក្រុមហ៊ុនចំនួន ៥ទៀត ដែលត្រូវបានសង្ស័យថា បានជាប់ព័ន្ធនឹងបទល្មើសព្រៃនៅក្នុងខេត្តមួយនៅភាគឦសានប្រទេសកម្ពុជា។
ក្នុងសន្និសីទសារព័ត៌មាននៅថ្ងៃនេះ អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី ថ្លែងថា ក្រុមហ៊ុនចំនួន ៥ ដែលសមត្ថកិច្ចកំពុងធ្វើការស៊ើបអង្កេតនោះ មានដូចជា ក្រុមហ៊ុន ម៉ាស់ស្ទ័ខេសាន់ ក្រុមហ៊ុន យ៉ាងចាវ ថាច់ហ៊្វូត ក្រុមហ៊ុន វ៉ិចធ័ររី និងក្រុមហ៊ុន ណេណាង។
លោក អេង ហ៊ី ថ្លែងថា៖ «បើសិនជាក្រុមហ៊ុននោះគាត់ធ្វើល្មើសច្បាប់ យើងនឹងហូតកិច្ចព្រមព្រៀង ឬមួយអាជ្ញាប័ណ្ណ ឬមួយអីផ្សេងៗដែលពាក់ព័ន្ធនឹងលិខិតបទដ្ឋានគតិយុត្តិ។ អ៊ីចឹង រង់ចាំការស៊ើបអង្កេតចប់ ព្រោះអីនៅដំណាក់កាលមួយមិនទាន់ចប់ យើងទៅបិទគេទាំងស្រុង មិនផ្ដល់ភាពយុត្តិធម៌ទេ។ អ៊ីចឹង ត្រូវតែផ្ដល់ភាពយុត្តិធម៌»។
លោកបន្តថា បច្ចុប្បន្ននេះ ទោះបីជាគណៈកម្មការនេះខិតខំបង្រ្កាបបទល្មើសព្រៃឈើច្រើនក៏ដោយ ប៉ុន្តែ បទល្មើសនេះនៅតែកើតមានដដែល ដោយប្ដូរការកាប់បំផ្លាញ និងដឹកជញ្ជូនពីទ្រង់ទ្រាយធំមកជាទ្រង់ទ្រាយតូចវិញ។
កាលពីថ្ងៃទី៩ ខែកក្កដា ក្រុមបង្ក្រាបបទល្មើសធនធានធម្មជាតិរបស់រដ្ឋាភិបាល ដែលដឹកនាំដោយមេបញ្ជាការកងរាជអាវុធហត្ថ លោក សៅ សុខា បានប្រតិបត្តិការបង្ក្រាបបទល្មើសព្រៃឈើមួយកន្លែងនៅក្នុងខេត្តមណ្ឌលគិរី ដោយរឹបអូសយករថយន្តដឹកឈើជាង ៤០គ្រឿង ចាប់ខ្លួនមនុស្ស ៤នាក់ ក្នុងនោះមាន ឧកញ៉ា ស៊ឹង សំអុល ផងដែរ។
អ្នកសម្របសម្រួលសមាគមអាដហុកខេត្តមណ្ឌលគិរី លោក អៀង ម៉េងលី មានប្រសាសន៍ថា ក្រុមហ៊ុនដែលជាប់ពាក់ព័ន្ធនឹងបទល្មើសព្រៃឈើនៅក្នុងខេត្តមណ្ឌលគិរី មិនមានតែ ៥ក្រុមហ៊ុននោះទេ។
លោក អៀង ម៉េងលី ប្រាប់ថា៖ «នៅក្នុងខេត្តមណ្ឌលគិរីមានក្រុមហ៊ុនច្រើន។ អ៊ីចឹង កាលណាលើកយកក្រុមហ៊ុនតែ ៥ហ្នឹង នៅមិនទាន់គ្រប់គ្រាន់នៅឡើយទេ។ អាជ្ញាធរថ្នាក់ជាតិគួរតែសិក្សាបន្ថែមទៀត ស្រាវជ្រាវឱ្យបានច្រើនជាងហ្នឹងបន្ថែមទៀត»។
លោក អៀង ម៉េងលី ជំរុញឱ្យរដ្ឋាភិបាល និងស្ថាប័នពាក់ព័ន្ធធ្វើការស៊ើបអង្កេតទៅលើឧកញ៉ាធំៗមួយចំនួនទៀត បើសិនជារកឃើញថា ពួកគេមានជាប់ព័ន្ធនឹងបទល្មើសព្រៃឈើនោះ ត្រូវចាត់វិធានការតាមផ្លូវច្បាប់។
បើតាមលោក អេង ហ៊ី ថា នៅដើមឆ្នាំ២០១៦ គណៈកម្មការនេះបង្ក្រាបបានឈើជាង ១០ម៉ឺនម៉ែត្រគូប ហើយនៅឆ្នាំ២០១៨ បង្ក្រាបបានឈើជាង ៤ពាន់ម៉ែត្រគូប ហើយឃាត់ខ្លួនមនុស្សបានចំនួន ១៦៣នាក់ ដោយបញ្ជូនមនុស្សទៅតុលាការចំនួន ៦៣នាក់ ហើយមួយចំនួនធ្វើការពិន័យ និងអប់រំ។
ក្នុងរបាយការណ៍របស់ខ្លួនកាលពីឆ្នាំ២០១៥កន្លងមក អង្គការស៊ើបអង្កេតវិនាសកម្មព្រៃឈើអន្តរជាតិ Global Witness បានបង្ហាញថា ឧកញ៉ា ទ្រី ភាព បានជាប់ពាក់ព័ន្ធយ៉ាងជ្រៅនៅក្នុងបណ្ដាញជួញដូរឈើប្រណិតដោយខុសច្បាប់ពីកម្ពុជាឆ្លងដែនទៅប្រទេសវៀតណាម និងចិន។
របាយការណ៍ដដែលបញ្ជាក់ថា ក្រុមហ៊ុន ទ្រី ភាព បាននាំចេញឈើ ៨៥ភាគរយពីប្រទេសកម្ពុជា ឆ្ពោះទៅកាន់ប្រទេសចិន និងទំហំឈើប្រណិតមានការកើនឡើង ១៥០ភាគរយ រវាងឆ្នាំ២០១៣ និងឆ្នាំ២០១៤៕
