ក្រុមអាជីវករផ្សារអូរអំបិល ស្ថិតក្នុងខេត្តបន្ទាយមានជ័យ បានទទូចទៅអាជ្ញាធរឲ្យអនុញ្ញាតឲ្យពួកគាត់សាងសង់ផ្សារឡើងវិញដោយខ្លួនឯង ខណៈដែលពួកគេអះអាងថា កំពុងខ្វែងគំនិតគ្នាជាមួយអាជ្ញាធរជុំវិញការសាងសង់ផ្សារនោះឡើយវិញ។
ផ្សារអំបិលដែលស្ថិតនៅក្នុងក្រុងសិរីសោភ័ណ ត្រូវខូចខាតទាំងស្រុង បន្ទាប់ពីត្រូវរងអគ្គិភ័យកាលពីខែឧសភាកន្លងមកនេះ ហើយសំណង់ផ្សារថ្មី នៅមិនទាន់ត្រូវបានសាងសង់ឡើងវិញឡើយ។
តំណាងអាជីវករ លោក សាមឿន ស៊ិន បានរំឭកឡើងវិញថា អាជ្ញាធរក្រុងសិរីសោភ័ណ បានសន្យាស្វែងរកជំនួយពីស្ថាប័នផ្សេងៗ សម្រាប់សាងសង់ដំបូល និងគ្រឹះផ្សារនេះជូនអាជីវករឡើងវិញ ប៉ុន្តែ លោកថា អាជ្ញាធរនៅពុំទាន់មានលទ្ធភាពនោះឡើយរហូតមកដល់ពេលនេះ។
អាជីវកររូបនេះ បានឲ្យដឹងទៀតថា ក្រុមអាជីវករ បានស្ម័គ្រចិត្តប្រមូលថវិកាចូលគ្នា ដើម្បីជួលក្រុមអ្នកម៉ៅការ ឲ្យសាងសង់ផ្សារនោះឡើងវិញ ប៉ុន្តែ លោកថា អភិបាលក្រុងសិរីសោភ័ណ មិនអនុញ្ញាតនោះឡើយ។ លោកបញ្ជាក់ថា អាជីវករផ្សារអូរអំបិល ស្នើសុំអាជ្ញាធរថ្នាក់ខេត្ត និងថ្នាក់ជាតិ ឲ្យជួយដល់អ្នកផ្សារអូរអំបិលផង។
លោក សាមឿន ស៊ិន ប្រាប់ថា៖ «សំខាន់បំផុត គឺធ្វើយ៉ាងម៉េចពន្លឿនការសាងសង់ឱ្យបានឆាប់។ អាជីករគាត់តែងបារម្ភថា កាលណានាយទុនចូលរកស៊ីគ្រប់គ្រងទៅ វានាំឱ្យលំបាក។ អាជីវករដែលធ្លាប់មានបីបួនតូបអីទៅ គេឲ្យតែ ១តូបវិញ នោះ ពួកគាត់កាន់តែលំបាក»។
អាជីវករម្នាក់ទៀត លោក នុត តារា មានប្រសាសន៍ថា សព្វថ្ងៃគ្រួសារគាត់កំពុងលំបាកខ្លាំងព្រោះត្រូវលក់ឥវ៉ាន់នៅចិញ្ចើមផ្លូវលំក្នុងភូមិ ក្រាលតង់ ក្រោមភ្លៀងក្រោមខ្យល់។ លោកបញ្ជាក់ថា ពលរដ្ឋបានលឺដំណឹងថា មានឧកញ៉ាម្នាក់ចង់បានដីផ្សារអូរអំបិលនេះ ទើបបង្កជាក្ដីបារម្ភទន្ទឹមគ្នានឹងការសម្រេចរបស់អាជ្ញាធរក្រុងសិរីសោភ័ណដែលមិនអនុញ្ញាតពលរដ្ឋសង់តូបផង។
លោក នុត តារា ប្រាប់ថា៖ «ឆេះទាំងអស់គ្នានេះ គ្មានអ្នកណាអាចយកបានទាំងអស់ សូមសំណូមពរឱ្យរដ្ឋាភិបាលជួយឱ្យបានផ្សារឆាប់ៗលក់។ ខ្លាចដែរ ខ្លាចទុកយូរៗទៅ មិនដឹងក្រុមហ៊ុនវាគិតយ៉ាងម៉េច វាពិបាកដែរ»។
អភិបាលក្រុងសិរីសោភ័ណ លោក ហឹល សារ៉ា បានច្រានចោលនូវព័ត៌មានដែលចោទប្រកាន់ទៅលើអាជ្ញាធរថា ចង់បានដីផ្សារអូរអំបិលនេះ។
អភិបាលក្រុងរូបនេះ បានបញ្ជាក់ថា អាជ្ញាធរក្រុងគ្មានចេតនាណាមួយបង្កការលំបាកជូនអាជីវករទេ ប៉ុន្តែ លោកចង់ឱ្យផ្សារដែលសង់រួចមានសុវត្ថិភាព និងរឹងមាំបានយូរ។
លោក ហឹល សារ៉ា ប្រាប់ថា៖ «ក្នុងសប្ដាហ៍ក្រោយនេះ ខ្ញុំនឹងមានប្រជុំមួយដែលសុំឱ្យពួកគាត់ទាំងអស់គ្នាសម្របសម្រួលគ្នា រកវិធីសាស្ត្រណាមួយដែលអាចទទួលយកបាន ហើយធ្វើឱ្យបានឆាប់ យើងអត់ចង់ពន្យាទេ។ និយាយតាមត្រង់ បើអាជ្ញាធរមានលុយប្រូសបាត់ហើយ។ មានគេថា ផ្សារហ្នឹងអង្កន់ល្វែង ឬអី សូមទោស ខ្ញុំយកខ្លួនខ្ញុំធានា អត់មានគោលការណ៍ហ្នឹងទាល់តែសោះ។ ខ្ញុំកំពុងរកមុខអាអ្នកណាដើរបំពុល»។
ផ្សារអូរអំបិល ត្រូវបានបង្កើតឡើងតាំងពីឆ្នាំ១៩៧៩ ជាផ្សារសហគមន៍ ប្រក់ស្បូវប្រក់ស្លឹក។ លុះដល់ឆ្នាំ១៩៩២ ផ្សារនេះត្រូវបានសាងសង់ឡើងដោយអាជីវករខ្លួនឯង ហើយទទួលស្គាល់ដោយអាជ្ញាធរឃុំ និងស្ថិតក្រោមការគ្រប់គ្រងរបស់សង្កាត់ចាប់តាំងពីពេលនោះមករហូតដល់ថ្ងៃវាត្រូវភ្លើងឆេះកាលពីថ្ងៃទី៥ ខែឧសភាកន្លងមកនេះ។ បន្ទាប់ពីភ្លើងឆេះរួច ផ្សារនេះត្រូវបានអាជ្ញាធរក្រុងសិរីសោភ័ណ យកទៅគ្រប់គ្រងវិញ។
លោកនាយករដ្ឋមន្ត្រី ហ៊ុន សែន បានសម្រេចបញ្ឈប់រាល់សំណើ ឬគម្រោងអភិវឌ្ឍន៍ផ្សារទាំងអស់នៅទូទាំងប្រទេសកាលពីឆ្នាំ២០០៩ បន្ទាប់ពីក្រុមអាជីវករនានា បានចេញតវ៉ាជាបន្តបន្ទាប់ប្រឆាំងនឹងក្រុមហ៊ុនអភិវឌ្ឍន៍ផ្សារ។ លោក ហ៊ុន សែន ក៏បានព្រមានទៅអាជ្ញាធរថ្នាក់ក្រោមជាតិឲ្យបញ្ឈប់ការប៉ះពាល់ ឬដោះដូរផ្សារទៅឲ្យក្រុមហ៊ុនអភិវឌ្ឍន៍ណាមួយ។
លោក ហ៊ុន សែន ក៏បានផ្ដល់ថវិកាជួយកសាងផ្សារដែលភ្លើងឆេះឡើងវិញផងដែរ ដូចជាផ្សារក្រចេះ ផ្សារច្បារអំពៅ ផ្សារស្ទឹងត្រែង ផ្សារសិរីសោភ័ណ ផ្សារក្រគរ ស្ថិតក្នុងខេត្តពោធិ៍សាត់ និងផ្សារកណ្ដាលជាដើម៕
