សមត្ថកិច្ចកំណត់មុខសញ្ញាថា ករណីបាញ់ប្រហារកាលពីយប់ថ្ងៃអង្គារម្សិលមិញ នៅក្នុងក្រុងព្រះសីហនុ បណ្តាលឱ្យស្រ្តីម្នាក់ជាជនជាតិចិនស្លាប់នោះ អ្នកប្រព្រឹត្តិគឺជាជនជាតិចិនដូចគ្នា។
ស្នងការនគរបាលខេត្តព្រះសីហនុ លោក ជួន ណារិន មានប្រសាសន៍ថា ក្រុមជំនាញរបស់លោកកំពុងស្រាវជ្រាវរកអ្នកដែលប្រើកាំភ្លើងបាញ់សម្លាប់ស្ត្រីជនជាតិចិន កាលពីវេលាម៉ោង១១.៣០នាទីយប់ កាលពីថ្ងៃទី២៣ ខែកក្កដា ស្ថិតនៅចំណុចភូមិ០៣ សង្កាត់០៣ ក្រុងព្រះសីហនុ ត្រូវបានសមត្ថកិច្ចនគរបាលខេត្តព្រះសីហនុ កំណត់មុខសញ្ញាឃើញខ្លះៗហើយ គឺអ្នកប្រព្រឹត្តិជាជនជាតិចិនដូចគ្នា។
ទោះជាយ៉ាណា លោកមិនបានបញ្ជាក់ឲ្យច្បាស់លើឈ្មោះអ្នកដែលប្រព្រឹត្តបទល្មើស និងគូកននោះទេ ដោយថា ទុកឲ្យក្រុមការងារជំនាញធ្វើកិច្ចការនេះសិន។
លោកមានប្រសាសន៍ថា៖ «ខ្ញុំគ្រាន់តែជំរាបថា ជនជាតិចិនជាអ្នកប្រព្រឹត្ត ជនរងគ្រោះក៏ជាជនជាតិចិនដែរ សុំឆ្លើយតែប៉ុណ្ណឹង ទុកឲ្យអ្នកជំនាញធ្វើការងារសិន។ នៅពេលណាដែលយើងបង្ក្រាបបានជោគជ័យ លទ្ធផលឲ្យឃើញជាក់ស្តែងសិន ពេលហ្នឹងបានយើងបិទសំណុំរឿង»។
មន្ត្រីសម្របសម្រួលសមាគមអាដហុកប្រចំាខេត្តសីហនុ លោកស្រី ជាប សុធារី មានប្រសាសន៍ថា ករណីជនជាតិចិនប្រើកាំភ្លើងបាញ់សម្លាប់គ្នាឯងនោះ មិនមែនទើបតែកើតឡើងនោះទេ លោកស្រីថា រឿងនេះកើតឡើងច្រើនដងមកហើយ។ រឿងនេះធ្វើឲ្យលោកស្រីបង្ហាញការព្រួយបារម្ភពីសុវត្ថិភាព និងសន្តិសុខ សណ្តាប់ធ្នាប់នៅខេត្តនោះ បើសិនជារដ្ឋាភិបាលមិនពង្រឹងការអនុវត្តច្បាប់ឲ្យបានតឹងរ៉ឹង។
លោកស្រីមានប្រសាសន៍ថា៖ «នៅពេលដែលចាប់បានជនជាតិចិន សូមឲ្យមានការរឹតបណ្តឹងដាក់ទោសពិន័យ កុំឲ្យមានការប្រព្រឹត្តអំពើពុករលួយក្នុងហ្នឹង បើយើងមិនបានដាក់ទោសពិន័យគាត់ត្រឹមត្រូវ ធ្វើឲ្យប្រសិទ្ធិភាពនៃការអនុវត្តច្បាប់ អត់មានតម្លៃអ្វីទេ ពួកគាត់ចេះតែធ្វើតែផ្តេសតែផ្តាស បង់លុយឲ្យ សម្របសម្រួលគ្នា ឬក៏អត់មានតាមពិន័យអ្វី ដោះលែងឲ្យនៅក្រៅឃុំ ថ្ងៃក្រោយមានបញ្ហាអ្វីកើតឡើង រឹតតែមើលងាយប្រទេសយើងថែមទៀត»។
ទាក់ទងនឹងជនជាតិចិននេះផងដែរ កាលពីវេលាម៉ោងប្រមាណជិត៤ រសៀលថ្ងៃទី០៦ ខែឧសភា ឆ្នាំ២០១៩ មានខ្មាន់កាំភ្លើងបានបាញ់សម្លាប់ជនជាតិចិនម្នាក់ ទម្លាក់ពីលើរថយន្ត ស្ថិតនៅមុខសណ្ឋាគារ និងកាស៊ីណូ វិមានខ្សាច់សរ ភូមិ៤ សង្កាត់លេខ៤ ក្រុងខេត្តព្រះសីហនុ ខេត្តព្រះសីហុ ខណៈដែលកំពុងតែធ្វើដំណើរតាមផ្លូវ បានបង្កឲ្យមានការភ្ញាក់ផ្អើលយ៉ាងខ្លាំង។ ក្រោយពីឃាតកម្ម គឺភ្លាមៗឃាតករបានជិះរថយន្តគេចខ្លួនបាត់ស្រមោល។
តាមរបាយការណ៍របស់ក្រសួងមហាផ្ទៃចេញផ្សាយកាលពីខែកញ្ញា ឆ្នាំ២០១៨ បង្ហាញថា ជនជាតិចិននៅកម្ពុជាមានចំនួន២១ម៉ឺននាក់ ។
កាលពីថ្ងៃទី២៤ ខែតុលា ឆ្នាំ២០១៨ ពេលជួបជាមួយពលរដ្ឋខ្មែរនៅក្នុងប្រទេសស្វីស លោក នាយករដ្ឋមន្ត្រី ហ៊ុន សែន ថ្លែងថា ចំនួនប្រជាជនចិននៅកម្ពុជាមិនមានគួរឲ្យព្រួយបារម្ភនោះទេ។ លោកថា ជនជាតិចិនទាំងនោះមកធ្វើការងារ ហើយថា ពេលចប់ការងារ ពួកគេនឹងវិលត្រឡប់ទៅប្រទេសកំណើតវិញ៕