អង្គការសិទ្ធិមនុស្សអន្តរជាតិ ជំរុញឲ្យទម្លាក់បទចោទលើអតីតអ្នកយកព័ត៌មានវិទ្យុអាស៊ីសេរីពីររូប ខណៈតុលាការកម្ពុជាគ្រោងបើកសវនាការនៅថ្ងៃស្អែកនេះ ដោយចាត់ថា បទចោទប្រកាន់កន្លងទៅមានចរិតនយោបាយ។
អង្គការឃ្លាំមើលសិទ្ធិមនុស្ស Human Rights Watch បានលើកឡើងក្នុងសេចក្តីប្រកាសព័ត៌មានដែលចេញផ្សាយកាលពីម្សិលមិញថា អាជ្ញាធរកម្ពុជាត្រូវតែទម្លាក់ចោលជាបន្ទាន់នូវការចោទប្រកាន់ប្រឆាំងនឹងអតីតបុគ្គលិកអាស៊ីសេរីពីរនាក់។ Human Rights Watch អះអាងថា ការចោទប្រកាន់របស់ចៅក្រមស៊ើបសួរកន្លងទៅ មានលក្ខណៈនយោបាយ។
នាយករងអង្គការឃ្លាំមើលសិទ្ធិមនុស្ស Human Rights Watch ប្រចាំតំបន់អាស៊ី លោក Phil Robertson ត្រូវបានដកស្រង់សម្តីមកចុះផ្សាយក្នុងសេចក្តីប្រកាសព័ត៌មាននោះថា ការប្រឌិតរឿងប្រឆាំងនឹងបុគ្គលិកអាស៊ីសេរី គឺមានចេតនាប្រឆាំងនឹងប្រព័ន្ធផ្សព្វផ្សាយដែលបានរិះគន់រដ្ឋាភិបាលកម្ពុជា។
លោកលោក Phil Robertson បន្ថែមថា៖ «ឈិន និងសុធារិន មិនគួរប្រឈមនឹងការដាក់ទោសពីបទចោទពាក់ព័ន្ធនឹងចារកម្មដែលគេប្រឌិតឡើងនោះទេ»។
សាលាដំបូងរាជធានីភ្នំពេញ នឹងបើកសវនាការលើសំណុំរឿងអតីតបុគ្គលិកអាស៊ីសេរី មានលោក អ៊ួន ឈិន និងលោក យាង សុធារិន្ទ ពាក់ព័ន្ធបទចោទថា «ប្រគល់ឲ្យរដ្ឋបរទេសនូវព័ត៌មាន ដែលអាចធ្វើឲ្យអន្តរាយដល់ការការពារជាតិ» តាមមាត្រា ៤៤៥ នៃក្រមព្រហ្មទណ្ឌ។
អង្គការអ្នកសារព័ត៌មានគ្មានព្រំដែន (Reporters Without Borders) កាលពីម្សិលមិញ ក៏បានចេញសេចក្តីប្រកាសព័ត៌មានមួយទាក់ទងនឹងករណីសវនាការអតីតបុគ្គលិកអាស៊ីសេរីទាំងពីរនាក់នេះដែរ។ អង្គការអ្នកសារព័ត៌មានគ្មានព្រំដែន ហៅសវនាការដែលនឹងត្រូវធ្វើឡើងនៅថ្ងៃស្អែកថា ជាការកើនឡើងនៃការយាយីលើអ្នកសារព័ត៌មានដោយប្រើប្រាស់ប្រព័ន្ធតុលាការ។ អង្គការដដែលនេះ បានលើកឡើងថា ការចោទប្រកាន់កន្លងមករបស់តុលាការទៅលើអ្នកទាំងពីរក៏មិនមានភស្តុតាងរឹងមាំឡើយ។
អនុប្រធានវិទ្យុអាស៊ីសេរី លោក Rohit Mahajan ក៏បានស្នើដល់តុលាការកម្ពុជាឲ្យទម្លាក់ការចោទប្រកាន់ទាំងអស់ប្រឆាំងនឹងអតីតបុគ្គលិករបស់ខ្លួនទាំងពីររូប។ លោកថា ពួកគេត្រូវបានទទួលរងការឈឺចាប់រួចមកហើយនៅក្នុងពន្ធនាគាររយៈពេល៩ខែ ហើយនៅពេលនេះកំពុងប្រឈមនឹងការចោទប្រកាន់ដ៏អយុត្តិធម៌ទៀត។
អ្នកពាក្យក្រសួងយុត្តិធម៌ លោក ជិន ម៉ាលីន ហៅការជំរុញឲ្យទម្លាក់បទចោទនេះថា មានចរិតនយោបាយ ដោយថា ការសម្រេចឲ្យជនសង្ស័យណាម្នាក់គ្មានទោស មានតែចៅក្រុមក្នុងអង្គជំនុំជម្រះតែប៉ុណ្ណេាះ។
អ្នកពាក្យរូបនេះ អះអាងទៀតថា ជាការឆ្លើយតបរបស់ក្រសួង បើស្ថាប័នអន្តរជាតិទាំងនោះចង់ជួយជនត្រូវចោទទាំងពីរនេះ មានតែចូលក្នុងដំណើរការនីតិវិធីរបស់តុលាការកម្ពុជាក្នុងការផ្តល់ជំនួយផ្នែកច្បាប់ ។
លោក មានប្រសាសន៍ថា៖ «ការសម្រេចថា មានទោស ឬគ្មាន នៅលើតុលាការទេ។ អីចឹងការអំពាវនាវឲ្យរដ្ឋាភិបាលដោះលែង ជាការអំពាវនាវមួយមិនស្របតាមក្របខណ្ឌច្បាប់ និងរដ្ឋធម្មនុញ្ញរបស់កម្ពុជា ហើយជាការអំពាវនាវមួយផ្អែកទៅលើចរិតនយោបាយ មិនផ្អែកទៅលើទិដ្ឋភាពច្បាប់ និងរដ្ឋធម្មនុញ្ញរបស់កម្ពុជាទាល់តែសោះ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា តាមការអង្កេតរបស់អង្គការសង្គមស៊ីវិល លោក អ៊ួន ឈិន និងលោក យាង សុធារិន្ទ គួរតែត្រូវបានទម្លាក់បទចោទ ដោយថា ពួកគេទាំងពីហាក់មិនបានធ្វើអ្វីខុសដូចការចោទប្រកាន់ទេ។
អ្នកឃ្លាំមើលសិទ្ធិមនុស្សរូបនេះ អះអាងថា តែផ្ទុយទៅវិញការឃុំខ្លួនអ្នកទាំងពីកន្លងទៅ វាបានជំរុញឲ្យមានការរិះគន់ថា រំលោភសេរីភាពអ្នកសារព័ត៌មាន បំពានសិទ្ធិមនុស្សទៅវិញទេ។
លោក ថា៖ «ក្នុងករណីនេះ យើងមើលឃើញថា គួរតែទម្លាក់បទចោទប្រកាន់ទៅលើពួកគាត់ ហើយដោះលែងឲ្យគាត់មានសេរីភាពពេញលេញឡើងវិញ ដើម្បីឲ្យពួកគាត់បានប្រកបរបរជាអាជីពជាអ្នកសារព័ត៌មានឡើងវិញ»។
អតីតបុគ្គលិកអាស៊ីសេរី លោក អ៊ួន ឈិន និងលោក យាង សុធារិន្ទ ត្រូវសមត្ថកិច្ចចាប់ខ្លួន កាលពីពាក់កណ្ដាលខែវិច្ឆិកា ឆ្នាំ២០១៧ នៅពេលពួកគាត់បង្កើតស្ទូឌីយូថតចម្រៀងនៅផ្ទះជួល ដែលអាជ្ញាធរចោទថា គ្មានការអនុញ្ញាត។
ករណីនេះ ព្រះរាជអាជ្ញា បានចោទប្រកាន់ពីបទ «ប្រគល់ឲ្យរដ្ឋបរទេសនូវព័ត៌មានជាអាទិ៍ ដែលបង្កឲ្យមានការអន្តរាយដល់ការការពារជាតិ» តាមមាត្រា ៤៤៥ នៃក្រមព្រហ្មទណ្ឌ។
ការចាប់ឃុំខ្លួន និងចោទប្រកាន់អ្នកទាំងពីរនាពេលនោះ ខណៈដែលស្ថានការនយោបាយឡើងកម្តៅ ដូចជា មានការចាប់ឃុំខ្លួនអតីតមេដឹកនាំបក្សប្រឆាំង លោក កឹម សុខា ការបណ្តេញអង្គការ NDI របស់អាមេរិកចេញពីកម្ពុជា បិទប្រព័ន្ធផ្សព្វផ្សាយឯករាជ្យ និងរំលាយគណបក្សប្រឆាំង ជាដើម។
ប៉ុន្តែ ក្រោយឃុំខ្លួនក្នុងពន្ធនាគារអស់រយៈពេលជាង ៩ខែ លោក អ៊ួន ឈិន និងលោក យាង សុធារិន្ទ ត្រូវបានតុលាការដោះលែងឱ្យនៅក្រៅឃុំបណ្ដោះអាសន្ន។
ទោះជាយ៉ាងណា ក្នុងកិច្ចប្រជុំសភាពេញអង្គកាលពីថ្ងៃទី៤ ខែកក្កដា ឆ្នាំ២០១៩នេះ លោក ប៉ែន បញ្ញា ជាសមាជិកសភា និងជាប្រធានគណៈកម្មការនីតិកម្ម និងយុត្តិធម៌នៃរដ្ឋសភា បានរំឭករដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍានា ឱ្យពិនិត្យឡើងវិញពីការអនុវត្តច្បាប់ ទប់ស្កាត់កុំឱ្យតុលាការកាត់ក្តីធ្វើតាមការបង្គាប់ពីបុគ្គលណាមួយ ដើម្បីធានាថា តុលាការជាស្ថាប័នឯករាជ្យដូចមានចែងក្នុងរដ្ឋធម្មនុញ្ញ ។
សមាជិកសភាកូតាមកពីគណបក្សប្រជាជនកម្ពុជារូបនេះ បន្ថែមទៀតថា ក្រសួងយុត្តិធម៌គួរធ្វើយ៉ាងណាឱ្យស្ថាប័នតុលាការជាកន្លែងផ្តល់យុត្តិធម៌ជូនពលរដ្ឋ ប្រកបដោយការទុកចិត្ត ដើម្បីលុបបំបាត់ស្រមោលភ័យខ្លាចរបស់ពលរដ្ឋ ពេលឮឈ្មោះតុលាការ៕