សារព័ត៌មានអាមេរិក The Wall Street Journal អះអាងថា នៅប្រកាន់យកនូវការចុះផ្សាយរបស់ខ្លួនពាក់ព័ន្ធនឹងកិច្ចព្រមព្រៀងសម្ងាត់រវាងប្រទេសកម្ពុជា និងចិន។
នេះបើតាមការបញ្ជាក់របស់នាយកផ្នែកទំនាក់ទំនងរបស់ The Wall Street Journal លោក Steve Severinghaus នៅថ្ងៃទី២៥ ខែកក្កដានេះ។
លោក Steve Severinghaus បានឆ្លើយប្រាប់ វី.អូ.ឌី តាមរយៈអ៊ីមែលយ៉ាងខ្លីថា៖ «យើងប្រកាន់គោលជំហរលើសេចក្តីរាយការណ៍របស់ពួកយើង។»
The Wall Street Journal បានចុះផ្សាយកាលពីថ្ងៃទី២១ ខែកក្កដា ថា កម្ពុជា-ចិន បានចុះហត្ថលេខាជាសម្ងាត់ជាមួយគ្នា អំឡុងត្រីមាសទី២ នៃឆ្នាំ២០១៩នេះ ដើម្បីផ្ដល់សិទ្ធិឱ្យប្រទេសចិនប្រើប្រាស់មូលដ្ឋានជើងទឹកមួយកន្លែងក្នុងឈូងសមុទ្រកម្ពុជា រយៈពេល ៣០ឆ្នាំ។ ប៉ុន្តែ ការចុះផ្សាយនេះ ត្រូវបានភាគីកម្ពុជា និងចិន បានបដិសេធចោលជាបន្តបន្ទាប់។
លោកនាយករដ្ឋមន្រ្តី ហ៊ុន សែន បានបដិសេធចំពោះការចុះផ្សាយនេះ ដោយហៅសេចក្តីរាយការណ៍នោះថា ជាព័ត៌មានប្រឌិតដែលមានចេតនាដ៏អាក្រក់បំផុតប្រឆាំងជាមួយកម្ពុជា។
អ្នកនាំពាក្យរាជរដ្ឋាភិបាលលោក ផៃ ស៊ីផាន បានថ្លែងក្នុងសន្នីសិទ្ធសារព័ត៌មាននៅព្រឹកនេះថា វាជាសិទ្ធិរបស់ Wall Street Journal ក្នុងការរក្សាជំហររបស់ខ្លួន តែលោកថា ការផ្សាយព័ត៌មានរបស់ Wall Street journal នេះគឺគ្រាន់តែធ្វើឲ្យភាគហ៊ុនរបស់ខ្លួនឡើងថ្លៃប៉ុណ្ណោះ។
លោក ថា៖ «ហើយនៅក្នុងរបបសារព័ត៌មាន មិនបាច់យើងយកចិត្តទុកដាក់ឯណាលើរឿងនេះទេ! ជាយុត្តាធិការយើងមិនអាចទៅប៉ះពាល់គេ (WSJ) ទេ គេទេដែលបំផ្លាញកិត្តិនាមរបស់គេ។ គេ (WSJ) ហ្នឹងជាអ្នកពូកែឃោសនាក្នុងផ្សារភាគហ៊ុន ម៉្លោះហើយគេត្រូវសរសេរអត្ថបទមួយឱ្យគេចាប់អារម្មណ៍ តែយើងក៏ធ្វើសកម្មភាពឱ្យគេចាប់អារម្មណ៍ថាយើងអត់មាន (មូលដ្ឋានទ័ពរបស់ចិន) ទេ។ យើងបានបង្ហាញពីភាពស្មោះត្រង់របស់យើងអញ្ជើញអ្នកសារព័ត៌មានឱ្យអញ្ជើញទៅ»។
ក្រសួងការពារជាតិចិន នៅថ្ងៃទី២៤ ខែកក្កដា ម្សិលមិញ ក៏បានច្រានចោលព័ត៌មាននេះដែរ។ អ្នកនាំពាក្យក្រសួងការពារជាតិចិន លោក វ៉ូ ឈាន (Wu Qian) បានថ្លែងក្នុងសន្និសីទសារព័ត៌មានផ្សព្វផ្សាយគោលនយោបាយការពារជាតិ ថាទំនាក់ទំនងជាមួយកម្ពុជាគឺជាដៃគូការពារសន្តិសុខ ស្ថិរភាពនៅក្នុងតំបន់ និងពិភពលោក មិនមែនជាសម្ព័ន្ធមិត្តឈានដល់ការបង្កើតមូលដ្ឋានទ័ពដូចការលើកឡើងនោះទេ៕
