រដ្ឋមន្ត្រីក្រសួងមហាផ្ទៃអំពាវនាវឱ្យប្រជាពលរដ្ឋគ្រប់មជ្ឈដ្ឋាន រួមទាំងស្ថាប័ន អង្គការសង្គមស៊ីវិល និងអ្នកវិភាគផងបន្តចូលរួមប្រឆាំងគ្រឿងញៀន ដើម្បីឆ្ពោះទៅរកការកសាងប្រទេសប្រកបដោយសន្តិសុខ សុវត្ថិភាពនៅពេលខាងមុខ។
លោក ស ខេង សរសេរសារលើហ្វេសប៊ុករបស់លោកកាលពីម្សិលមិញថា កន្លងមកនេះ សមត្ថកិច្ចធ្វើកិច្ចការបានល្អប្រសើរច្រើន ដោយបានចាប់ខ្លួនមេក្លោងជួញដូរគ្រឿងញៀនមួយចំនួនធំ។
ទន្ទឹមនឹងការលើកឡើងពីសមិទ្ធផលទាំងនេះលោក ស ខេង ក៏បានលើកឡើងដែរថា គ្រឿងញៀននៅតែជាបញ្ហាធំនៅក្នុងសង្គម ហើយលោកអំពាវនាវឱ្យអ្នកពាក់ព័ន្ធបន្តចូលរួមដោះស្រាយបញ្ហាទាំងនេះ។
លោក ស ខេង៖«ខ្ញុំសង្ឃឹមថា បងប្អូនប្រជាពលរដ្ឋគ្រប់មជ្ឈដ្ឋាន រួមទាំងស្ថាប័នរដ្ឋ ឯកជន ដៃគូអភិវឌ្ឍ និងអង្គការសង្គមស៊ីវិល អ្នកវិភាគសង្គម ព្រមទាំងគ្រប់សមាសភាគពាក់ព័ន្ធ នឹងបន្តចូលរួមកាន់តែសកម្មថែមទៀត ក្នុងការគាំទ្រដល់យុទ្ធនាការប្រយុទ្ធប្រឆាំងគ្រឿងញឿនខុសច្បាប់នៅទូទាំងប្រទេស តាមរយៈការផ្សព្វផ្សាយអប់រំ និងការផ្តល់ព័ត៌មាន ឈានទៅកាត់ផ្តាច់ការផ្គត់ផ្គង់ និងកាត់ផ្តាច់តម្រូវការគ្រឿងញៀន។»
លោក ស ខេង ក៏បានរំឭកផងដែរកុំឱ្យមន្ត្រីមានសមត្ថកិច្ចពាក់ព័ន្ធក្នុងករណីល្មើសផ្សេងៗជាមួយគ្រឿងញៀន។
លោក ស ខេង៖«ទន្ទឹមនេះ សមត្ថកិច្ចគ្រប់ប្រភេទ និងគ្រប់លំដាប់ថ្នាក់ ត្រូវចៀសវាងឲ្យបានដាច់ខាតនូវ ៤ កុំ គឺ កុំពាក់ព័ន្ធ កុំនៅពីក្រោយ កុំបន្ធូរដៃ និងកុំអន្តរាគមន៍ ក្នុងបទល្មើសគ្រឿងញៀន ។»
របាយការណ៍ក្រសួងមហាផ្ទៃបង្ហាញថា ក្នុងរយៈពេល៥ខែឆ្នាំ២០១៩នេះ កម្លាំងអនុវត្តច្បាប់បានបង្ក្រាបបទល្មើសគ្រឿងញៀន សរុបចំនួន ៣ ៣៣៥ ករណី ឃាត់ខ្លួន ៧ ០៩៧នាក់ចាប់យកសារធាតុញៀនគ្រប់ប្រភេទសរុប ៣១0 គីឡូក្រាម កញ្ឆាស្រស់ ៤៧ ១០៣ដើម រួមនឹងមធ្យោបាយសម្ភារ វត្ថុតាងមួយចំនួន ទៀត។
លោក ស ខេង ធ្លាប់បានប្រកាសថា បញ្ហាគ្រឿងញៀនឈានដល់ចំណុចប្រកាសអាសន្ន រាលដាលដល់គ្រប់តំបន់រួមទាំងជនបទដាច់ស្រយាល៕
