លោកនាយករដ្ឋមន្ត្រី ហ៊ុន សែន បានថ្លែងឲ្យដឹងថា កម្ពុជាគ្រោងបញ្ជាទិញសព្វាវុធបន្ថែមទៀតពីប្រទេសចិន ដែលលោកថា ដើម្បីបំពាក់ដល់កងទ័ពដែលប្រើប្រាស់អាវុធចាស់ៗ។
លោក ហ៊ុន សែន បានថ្លែងឲ្យដឹងជាសាធារណៈបែបនេះនៅក្នុងពិធីពិនិត្យការដ្ឋានសំណង់ពហុកីឡដ្ឋានជាតិមរតកតេជោ ស្ថិតនៅក្នុងខណ្ឌជ្រោយចង្វា នៅព្រឹកថ្ងៃនេះ។
លោកនាយករដ្ឋមន្ត្រី ថ្លែងថា លោកបានបង្កើនកញ្ចប់ថវិកា ៤០លានដុល្លារបន្ថែមទៀត ទៅដល់ក្រសួងការពារជាតិ សម្រាប់បញ្ជាទិញសព្វាវុធពីប្រទេសចិន សម្រាប់បំពាក់ឲ្យកងទ័ពកម្ពុជា។
លោក ហ៊ុន សែន ថ្លែងថា៖ «កាំភ្លើងនៅកម្ពុជា វាចាស់ៗបន្តិចហើយ អញ្ចឹង ខ្ញុំឱ្យទិញប៉ុន្មានម៉ឺនដើមថែមទៀត យកមកស្តុកទុកបំពាក់ ដោះអាចាស់បញ្ចេញអាថ្មី យកអាចាស់មកជួសជុល តើប្រទេសមួយអត់កាំភ្លើងយ៉ាងម៉េច»។
អ្នកនាំពាក្យក្រសួងការពារជាតិ លោក ឈុំ សុជាតិ បានឲ្យដឹងថា កម្ពុជាពិតជាត្រូវការសព្វាវុធថ្មីៗបន្ថែមទៀតបំពាក់ដល់កងទ័ព ដូចទៅនឹងអ្វីដែលលោកនាយករដ្ឋមន្ត្រី ហ៊ុន សែន ថ្លែងនៅថ្ងៃនេះមែន ប៉ុន្តែ លោកបដិសេធបកស្រាយបន្ថែមជុំវិញប្រភេទសព្វាវុធ ដែលកម្ពុជាត្រូវការបញ្ជាទិញនាពេលខាងមុខ។
លោកមានប្រសាសន៍ថា៖ «អាហ្នឹងប្រាប់មិនបានទេបង ហើយយើងលាក់ការណ៍ ដោយសាររឿងជាតិ ខ្ញុំប្រាប់មិនបានទេ គ្រាន់តែដឹងថា ទុកការពារជាតិប៉ុណ្ណឹងទៅបានហើយ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មិនគាំទ្រការបង្កើនកញ្ចប់ថវិកាសម្រាប់ទិញសព្វាវុធបន្ថែមនោះឡើយនៅក្នុងដំណាក់កាលនេះ ដោយសារកន្លងមករដ្ឋាភិបាល និងមន្ត្រីរបស់លោកធ្លាប់អះអាងថា កម្ពុជាជាប្រទេសមានសន្តិភាពស្ថិរភាព។
លោក សន ជ័យ ជំរុញទៅរដ្ឋាភិបាលគួរតែយកកញ្ចប់ថវិកានោះទៅជួយផ្គត់ផ្គង់ផ្នែកសេវាកសិកម្ម និងសុខាភិបាល ជូនប្រជាពលរដ្ឋប្រសើរជាងយកទៅទិញសព្វាវុធ។
លោកផ្តល់ជាអនុសាសន៍ថា៖ «ពេលនេះ យើងមិនលើកទឹកចិត្តឲ្យមានការចំណាយថវិកាជាតិ សំរាប់ទៅប្រើប្រាស់ទិញអាវុធនោះទេ យើងចង់ឃើញការអភិវឌ្ឍ ដើម្បីឲ្យដើរស្របតាមសម័យកត្តវិទ្យា ជាពិសេសត្រូវការភ្ជាប់វិស័យសុខាភិបាល ការភ្ជាប់វិស័យកសិកម្ម ទៅនឹងបច្ចេកវិទ្យា ដើម្បីបង្កើននូវការផលិត ហើយនិងគុណភាពនៃសេវាទាំងអស់នោះ»។
លោកនាយករដ្ឋមន្ត្រី ហ៊ុន សែន ថ្លែងបញ្ជាក់ទៀតថា លោកបានសម្រេចបន្ថែមថវិកា ៤០លានដុល្លារនេះ ទៅលើកញ្ចប់ថវិកា ២៩០លានដុល្លារ ដែលត្រូវបានប្រើប្រាស់សម្រាប់បញ្ជាទិញសព្វាវុធពីចិនកាលពីឆ្នាំកន្លងទៅ៕
