លោកនាយករដ្ឋមន្ត្រី ហ៊ុន សែន បានព្រមានចាត់វិធានការច្បាប់ទៅលើអ្នកវិភាគមួយរូប ដែលលោកចោទថា បានប្រមាថរូបលោក និងមេដឹកនាំជាន់ខ្ពស់ដទៃទៀតរបស់គណបក្សកាន់អំណាច។
ថ្លែងក្នុងពិធីពិនិត្យការដ្ឋានសាងសង់ពហុកីឡដ្ឋានជាតិមរតកតេជោ នៅខណ្ឌជ្រោយចង្វា នៅព្រឹកថ្ងៃនេះ លោក ហ៊ុន សែន បានថ្លែងចំៗអំពីអ្នកវិភាគ សូរ សមយុទ្ធ ដែលតែងតែសរសេរអត្ថបទវិភាគចុះផ្សាយនៅលើកាសែតភ្នំពេញប៉ុស្តិ៍ ជាច្រើនឆ្នាំមកហើយនោះ។
លោក ហ៊ុន សែន បានថ្លែងទៀតថា អ្នកវិភាគរូបនេះ គឺជាអតីតមន្ត្រីជាន់ខ្ពស់មួយរូបរបស់គណបក្សសង្គ្រោះជាតិ ដែលស្ថិតក្នុងចំណោមថ្នាក់ដឹកនាំជាន់ខ្ពស់ ១១៨រូប ដែលត្រូវបានតុលាការហាមឃាត់សិទ្ធិធ្វើនយោបាយរយៈពេល ៥ឆ្នាំ។
លោកនាយករដ្ឋមន្ត្រីបានចោទអ្នកសរសេរអត្ថបទវិភាគរូបនេះថា បានហៅរូបលោកថា «អាហ្នឹង» និងហៅរដ្ឋមន្ត្រីក្រសួងមហាផ្ទៃ លោក ស ខេង ថា «អាត្នោត»។
លោក ហ៊ុន សែន ថ្លែងថា៖ «វាហៅសម្តេចក្រឡាហោមថា អាត្នោត វាហៅខ្ញុំ អាហ្នឹង ហើយអាហ្នឹងមនុស្សម្នាក់ក្នុងចំណោមនុស្ស ១១៨នាក់។ អាក្មួយត្រូវចាំ តែមួយសារទៀត ពូយកហើយ ហើយអ្នកនៅបាងកក សូមចាំឲ្យច្បាស់ កម្ពុជាមិនប្រើប្រាស់ទឹកដីរបស់កម្ពុជាប្រឆាំងនឹងប្រទេសថៃ ហើយប្រទេសថៃក៏បានប្តេជ្ញាថា មិនប្រើប្រាស់ទឹកដីរបស់ខ្លួនប្រឆាំងនឹងកម្ពុជា នាយករដ្ឋមន្ត្រីទាំងពីរបានប្តូរផ្តាច់ត្រូវធ្វើរឿងនេះ»
តុលាការកំពូល បានសម្រេចរំលាយគណបក្សសង្គ្រោះជាតិ កាលពីថ្ងៃទី១៧ ខែវិច្ឆិកា ឆ្នាំ២០១៧ និងចោទមន្ត្រីអតីតបក្សនេះចំនួន ១១៨រូប ថា មានជាប់ពាក់ព័ន្ធជាមួយផែនការនៃការផ្តួលរំលំរដ្ឋាភិបាលនោះ និងហាមឃាត់សិទ្ធិទាំងអស់នោះមិនឲ្យធ្វើនយោបាយរយៈពេល៥ឆ្នាំទៀតផង។
គណៈកម្មាការនៃសហភាពអន្ដរសភា កាលពីដើមខែកុម្ភៈ ឆ្នាំ២០១៨ បានថ្កោលទោសចំពោះការរំលាយអតីតបក្សប្រឆាំងមុនការបោះឆ្នោត ការបន្ដឃុំខ្លួនលោក កឹម សុខា និងការហាមឃាត់អតីតមន្ដ្រីបក្សសង្គ្រោះជាតិ១១៨រូប ក្នុងនោះមានអតីតតំណាងរាស្ដ្រគណបក្សប្រឆាំង៥៥រូបផងនោះ មិនឲ្យធ្វើនយោបាយរយៈពេល៥ឆ្នាំផងដែរ៕