សមាគមមីក្រូហិរញ្ញវត្ថុកម្ពុជា ហៅកាត់ថា (CMA) ព្រមានចាត់វិធានការច្បាប់លើក្រុមហ៊ុនផ្តល់កម្ចីមួយ និងអំពាវឲ្យពលរដ្ឋប្រុងប្រយ័ត្នចំពោះព័ត៌មានផ្សេងៗ ដែលផ្សព្វផ្សាយដោយក្រុមហ៊ុននេះ ដើម្បីចៀសវាងការបោកប្រាស់។
សេចក្ដីប្រកាសព័ត៌មានរបស់សមាគមមីក្រូហិរញ្ញវត្ថុកម្ពុជា ចុះផ្សាយកាលពីថ្ងៃទី២៩ ខែកក្កដា នេះថា កាលពីពេលថ្មីៗនេះមានក្រុមហ៊ុន ភ្នំពេញកម្ចីអាជីវកម្ម ខូ អិលធីឌី បានផ្សព្វផ្សាយព័ត៌មានមិនពិត និងប្រើប្រាស់រូបថតសមាជិកក្រុមប្រឹក្សាភិបាល រួមទាំងទ្បូហ្គោរបស់សមាគមមីក្រូហិរញ្ញវត្ថុកម្ពុជា ក្នុងគោលបំណងក្លែងបន្លំ និងបំផ្លើសការពិត ដើម្បីទាក់ទាញការគាំទ្រពីសាធារណជននៅលើបណ្តាញសង្គមហ្វេសប៊ុក។
សេចក្តីប្រកាសព័ត៌មានបញ្ជាក់ថា សមាគមមីក្រូហិរញ្ញវត្ថុកម្ពុជា កំពុងរៀបចំវិធានការផ្លូវច្បាប់ចំពោះក្រុមហ៊ុន ភ្នំពេញកម្ចីអាជីវកម្ម ខូ អិលធីឌី នោះផងដែរ។ សមាគមនេះ ក៏បានអំពាវឲ្យពលរដ្ឋត្រូវប្រុងប្រយ័ត្នចំពោះព័ត៌មានដែលផ្ដល់ដោយក្រុមហ៊ុននេះផងដែរ ដើម្បីកុំឲ្យមានការចាញ់បោកដោយប្រការណាមួយ។
សមាគមមីក្រូហិរញ្ញវត្ថុកម្ពុជា បានលើកឡើងក្នុងសេចក្តីប្រកាសព័ត៌មាននោះថា៖ «យើងខ្ញុំពុំមានទំនាក់ទំនងណាមួយជាមួយក្រុមហ៊ុន ភ្នំពេញកម្ចីអាជីកម្ម ខូ អិលធីឌី នេះទេ។ អាស្រ័យហេតុនេះ សូមសាធារណជនមេត្តាពិចារណា និងប្រុងប្រយ័ត្នខ្ពស់ចំពោះព័ត៌មានផ្សេងៗ ដែលផ្សព្វផ្សាយដោយក្រុមហ៊ុននេះ ដើម្បីចៀសវាងការបោកប្រាស់ ដោយប្រការណាមួយ»។
សមាគមមីក្រូហិរញ្ញវត្ថុកម្ពុជា ដែលតំណាងឲ្យគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុ និងក្រុមហ៊ុនភតិសន្យាហិរញ្ញវត្ថុ ដែលជាសមាជិកសមាគមចំនួន៩៦ បាននឹងកំពុងផ្តល់សេវាហិរញ្ញវត្ថុ ស្របច្បាប់ជូនប្រជាជនកម្ពុជាប្រមាណ២លានគ្រួសារ នៅក្នុង២៥ រាជធានី-ខេត្ត-ក្រុង ប្រទេសកម្ពុជា៕