មន្រ្តីជាន់ខ្ពស់កម្ពុជា បានអះអាងថា ម្ចាស់ក្រុមហ៊ុនដែលនាំសំរាមប្លាស្ទិកចូលខេត្តព្រះសីហនុជាជនជាតិខ្មែរសុទ្ធសាធ មិនមានពាក់ព័ន្ធនឹងជនជាតិចិននោះទេ។
ប្រធានអគ្គនាយក នៃអគ្គនាយកដ្ឋានគយ និងរដ្ឋករកម្ពុជា លោក គុណ ញឹម បានថ្លែងបែបនេះក្នុងសន្និសីទសារព័ត៌មានដែលធ្វើឡើងនៅថ្ងៃនេះ។ លោក បានថ្លែងថា ក្រុមហ៊ុននោះឈ្មោះថា CHUNGYUEN PLASTIC MANUFACTURE CO.,LTD ដែលមានម្ចាស់ជាជនជាតិខ្មែរឈ្មោះ សួន ឡុក។
លោក មានប្រសាសន៍ថា៖ «មិនមានជនជាតិចិនធ្វើការក្នុងក្រុមហ៊ុននោះទេ។ ក្រុមហ៊ុនន CHUNGYUEN PLASTIC នេះ បានជួលការិយាល័យមួយកន្លែងសម្រាប់ធ្វើការគឺនៅតំបន់សេដ្ឋកិច្ចពិសេស ជីចាំង នៅជិត វាលវេញ។»
ប៉ុន្តែ កាលពីថ្ងៃទី១៩ ខែកក្កដា ប្រធានអគ្គនាយក នៃអគ្គនាយកដ្ឋានគយ និងរដ្ឋករកម្ពុជា លោក គុណ ញឹម ធ្លាប់អះអាងប្រាប់អ្នកសារព័ត៌មានថា ក្រុមហ៊ុននោះមានជាប់ពាក់ព័ន្ធនឹងជនជាតិចិន។
កាលពីថ្ងៃទី១៧ ខែកក្កដា សមត្ថកិច្ចកម្ពុជា បានបើកទូកុងទឺន័រក្នុងកំពង់ផែស្វយ័តខេត្តព្រះសីហនុ រកឃើញសំរាមប្លាស្ទិកចំនួន ៨៣កុងទឺន័រ ដែលមានទម្ងន់ជិត ១៦០០តោន។ អាជ្ញាធរកម្ពុជា បានអះអាងថា សំរាមទាំងនោះមានប្រភពមកពីសហរដ្ឋអាមេរិក និងកាណាដា៕
