សាលារាជធានីភ្នំពេញ បានព្រមានចាត់វិធានទៅលើគម្រោងជួបជុំសម្ដែងមតិរបស់សមាគមគ្រូបង្រៀនកម្ពុជាឯករាជ្យ ប្រសិនបើសមាគមមួយនេះនៅតែបន្តការជួបជុំរបស់ខ្លួននាពេលខាងមុខនោះ។
កាលពីថ្ងៃអង្គារកន្លងមកនេះ សមាគមគ្រូបង្រៀនកម្ពុជាឯករាជ្យ បានជូនដំណឹងទៅសាលារាជធានីភ្នំពេញថា គ្រោងប្រមូលផ្ដុំសមាជិក ៧២រូប សម្ដែងមតិនៅព្រឹកថ្ងៃទី១៥ ខែសីហាខាងមុខនេះ ដើម្បីទាមទារឲ្យដោះលែងលោក កឹម សុខា និងលើកលែងទោសលោក សម រង្ស៊ី។
សមាគមមួយនេះ បានលើកឡើងនៅក្នុងលិខិតជូនដំណឹងរបស់ខ្លួនថា ការដោះលែង និងលើកលែងទោសមេដឹកនាំបក្សប្រឆាំងទាំង ២រូបនេះ នឹងរក្សាប្រព័ន្ធអនុគ្រោះពន្ធពាណិជ្ជកម្មរបស់សហគមន៍អឺរ៉ុប ក្រោមគម្រោង «អ្វីគ្រប់យ៉ាងលើកលែងតែអាវុធ» ហៅកាត់ថា EBA។
ប៉ុន្តែ ក្នុងលិខិតមួយផ្ញើទៅសមាគមគ្រូបង្រៀនកម្ពុជាឯករាជ្យនៅថ្ងៃនេះ អភិបាលរាជធានីភ្នំពេញ លោក ឃួង ស្រេង ប្រាប់ទៅសមាគមវិញថា មិនអនុញ្ញាតឲ្យមានការជួបជុំសម្ដែងមតិនោះឡើយ ហើយប្រាប់ថា ការជួបជុំនេះ ប្រឆាំងនឹងសេចក្ដីសម្រេច ឬអំណាចរបស់តុលាការ។
មេដឹកនាំបក្សសង្គ្រោះជាតិ លោក កឹម សុខា បន្តស្ថិតនៅក្រោមការឃុំខ្លួនក្នុងផ្ទះរហូតមកដល់សព្វថ្ងៃនេះ បន្ទាប់ពីត្រូវបានសមត្ថកិច្ចចាប់ដាក់ឃុំក្នុងពន្ធនាគារកាលពីចុងឆ្នាំ២០១៧កន្លងមក ក្រោមការចោទប្រកាន់ថា «ក្បត់ជាតិ» ហើយលោក សម រង្ស៊ី បន្តរស់នៅនិរទេសខ្លួនឯងនៅឯក្រៅប្រទេសចាប់តាំងពីខែវិច្ឆិកាក្នុងឆ្នាំ២០១៥ ក្រោយពីប្រឈមមុខនឹងបណ្ដឹងជាច្រើនករណីពីលោកនាយករដ្ឋមន្ត្រី ហ៊ុន សែន និងមេដឹកនាំដទៃទៀតរបស់គណបក្សប្រជាជនកម្ពុជា។
លោក សម រង្ស៊ី ដែលប្រកាសខ្លួនឯងជាប្រធានស្ដីទីរបស់គណបក្សសង្គ្រោះជាតិក្រោយលោក កឹម សុខា ត្រូវបានចាប់ដាក់ឃុំនោះ កំពុងស្ថិតក្រោមការស្វែងរកចាប់ខ្លួនពីអាជ្ញាធរកម្ពុជា បន្ទាប់ពីមានដីការបង្គាប់មួយរបស់នគរបាលជាតិកាលពីថ្ងៃទី២៧ ខែកក្កដាកន្លងមកនេះ។
អាជ្ញាធរកម្ពុជា បានប្រកាសស្វែងរកចាប់ខ្លួនអតីតមេដឹកនាំបក្សប្រឆាំងរូបនេះ ខណៈដែលលោក សម រង្ស៊ី បានប្រកាសថា នឹងវិលត្រឡប់មកកម្ពុជានៅចុងឆ្នាំ២០១៩នេះ។
ទោះជាយ៉ាងណា ការផាត់គណបក្សប្រឆាំងចេញពីឆាកនយោបាយ និងឃុំខ្លួនលោក កឹម សុខា អតីតមេដឹកនាំបក្សនេះ ជំរុញមានការថ្កោលទោសពីសហគមន៍អន្តរជាតិ ពិសេសប្លុកលោកសេរី និងដាក់សម្ពាធទាមទារឲ្យដោះលែងលោក កឹម សុខា និងឲ្យគណបក្សប្រឆាំងដែលបានរំលាយទៅហើយនោះ បានដំណើរការឡើងវិញ ។
សហភាពអឺរ៉ុបដែលមានសមាជិក ២៨ប្រទេស កំពុងដំណើរការនីតិវិធីដែលនឹងឈានទៅព្យួរប្រព័ន្ធអនុគ្រោះពន្ធ EBA ពីកម្ពុជាទៀតផង បន្ទាប់ពីរកឃើញថា ការគោរពសិទ្ធិមនុស្ស និងលំហរប្រជាធិបតេយ្យនៅកម្ពុជា បានធ្លាក់ចុះជាបន្តបន្ទាប់៕