អគ្គរដ្ឋទូតថ្មីរបស់អាមេរិកដែលគ្រោងមកបំពេញការងារនៅទីក្រុងភ្នំពេញ បានថ្លែងថា លោកនឹងជំរុញការគោរពសិទ្ធិមនុស្ស លទ្ធិប្រជាធិបតេយ្យ ព្រមទាំងទំនាក់ទំនងពាណជ្ជកម្មកាន់តែប្រសើរជាមួយកម្ពុជា។
លោក W. Patrick Murphy ដែលជាមន្ត្រីការទូតក្នុងក្របខណ្ឌក្រសួងការបរទេសអាមេរិក ត្រូវបានព្រឹទ្ធសភាអាមេរិកបោះឆ្នោតអនុម័តជាអគ្គរដ្ឋទូតថ្មីប្រចាំនៅកម្ពុជាកាលពីថ្ងៃសុក្រកន្លងមកនេះ បន្ទាប់ពីដំណើការអនុម័តបេក្ខភាពរបស់លោកត្រូវបានពន្យារអស់រយៈពេលជិត ១ឆ្នាំ។
ថ្លែងក្នុងពិធីអនុម័តនៅក្នុងព្រឹទ្ធសភាកាលពីថ្ងៃទី២ ខែសីហានេះ លោក Patrick Murphy បានបញ្ជាក់ថា លោកនឹងផ្តោតទៅលើការបង្កើនទំនាក់ទំនងជាមួយប្រទេសកម្ពុជាក្នុងបេសកកម្មរបស់លោកនៅទីក្រុងភ្នំពេញ។
អគ្គរដ្ឋទូតថ្មី លោក Patrick Murphy ត្រូវបានដកស្រង់សម្ដីដែលថ្លែងថា៖ «លោកនឹងធ្វើការជិតស្និទ្ធជាមួយសភា ដើម្បីជំរុញផលប្រយោជន៍អាមេរិកនៅកម្ពុជា ជំរុញលទ្ធិប្រជាធិបតេយ្យ សិទ្ធិមនុស្ស និងសេរីភាពមូលដ្ឋាន»។
លោក Patrick Murphy បន្ថែមថា លោកក៏នឹងកសាងនូវការគាំទ្រដ៏រឹងមាំដែលសហរដ្ឋអាមេរិក បានរីករាយជាមួយសាធារណជនកម្ពុជា និងពង្រឹងកិច្ចសហប្រតិបត្តិការស្របតាបទស្សនវិស័យនៃយុទ្ធសាស្ត្រឥណ្ឌូ-ប៉ាស៊ីហ្វិក។
មានដើមកំណើតនៅរដ្ឋ Vermont លោក Patrick Murphy បានធ្វើការជាច្រើនពាក់ព័ន្ធនឹងតំបន់អាស៊ីអាគ្នេយ៍ក្នុងឋានៈជាឧបការីរងរដ្ឋមន្ត្រីការបរទេសអាមេរិក ដើម្បីជំរុញការគោរពសិទ្ធិមនុស្ស និងលទ្ធិប្រជាធិបតេយ្យនៅក្នុងតំបន់នេះ។
មួយថ្ងៃមុនការតែងតាំងអគ្គរដ្ឋទូតថ្មីនេះ អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានជំរុញឲ្យមន្ត្រីស្ថានទូតអាមេរិកវេចបង្វេចចាកចេញពីកម្ពុជា និងដៀលថា ពិបាកធ្វើការជាមួយ«មនុស្សព្រៃ» ខណៈដែលស្ថានទូតអាមេរិកដំណើរការទៅដោយគ្មានអគ្គរដ្ឋទូតអស់រយៈពេលជិត ១ឆ្នាំនោះ។
ទំនាក់ទំនងទ្វេភាគីកម្ពុជា-អាមេរិក បានស្ថិតក្នុងភាពចម្រូងចម្រាស់នឹងគ្នាក្នុងរយៈពេលប៉ុន្មានឆ្នាំចុងក្រោយនេះ ជុំវិញការធ្លាក់ចុះលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា ក្រោយពីមេដឹកនាំគណបក្សសង្គ្រោះជាតិ លោក កឹម សុខា ត្រូវបានចាប់ខ្លួន ហើយបក្សប្រឆាំងដ៏ធំមួយនេះ ត្រូវបានរំលាយចោល៕