អតីតមេដឹកនាំខ្មែរក្រហម លោក នួន ជា បានទទួលមរណភាពហើយនៅល្ងាចថ្ងៃអាទិត្យនេះនៅឯមន្ទីរពេទ្យមួយកន្លែងនៅរាជធានីភ្នំពេញ ជាទីដែលបងធំទី២នៃរបបខ្មែរក្រហម ត្រូវបានបញ្ជូនទៅសម្រាកព្យាបាលតាំងពីដើមខែមុនមកម៉្លេះ។ នេះបើតាមការបញ្ជាក់ពីអ្នកនាំពាក្យសាលាក្ដីខ្មែរក្រហម។
អ្នកនាំពាក្យអង្គជំនុំជម្រះវិសាមញ្ញាក្នុងតុលាការកម្ពុជា (អ.វ.ត.ក.) លោក នេត្រ ភ័ក្ត្រា ប្រាប់វីអូឌីតាមប្រព័ន្ធតេឡេក្រាមនៅល្ងាចថ្ងៃនេះថា លោក នួន ជា បានទទួលមរណភាពនៅអាយុ ៩៣ឆ្នាំ នៅឯមន្ទីរពេទ្យមិត្តភាពខ្មែរ-សូវៀត។
បើតាមការបញ្ជាក់ពីអ្នកនាំពាក្យរូបនេះ អតីតបងធំទី ២ នៃរបបកម្ពុជាប្រជាធិបតេយ្យ ត្រូវបានបញ្ជូនទៅព្យាបាលនៅមន្ទីរពេទ្យចាប់តាំងពីថ្ងៃទី២ ខែកក្កដាមកម៉្លេះ ហើយក្រុមគ្រួសាររបស់លោក នួន ជា ក៏បានទទួលដំណឹងអំពីមរណភាពនេះដែរ។
លោក នេត្រ ភ័ក្ត្រា ប្រាប់ថា៖ «ខ្ញុំអាចបញ្ជាក់បានថា ជនជាប់ចោទ នួន ជា អាយុ ៩៣ឆ្នាំ បានទទួលមរណភាពហើយនៅល្ងាចថ្ងៃទី៤ ខែសីហា ឆ្នាំ ២០១៩ នេះនៅមន្ទីរពេទ្យមិត្តភាពខ្មែរ-សូវៀត។ ជនជាប់ចោទ នួន ជា ត្រូវបានបញ្ជូនពីមន្ទីរឃុំឃាំងបណ្តោះអាសន្នរបស់អង្គជំនុំជម្រះវិសាមញ្ញក្នុងតុលាការកម្ពុជា (អវតក) ទៅកាន់មន្ទីរពេទ្យមិត្តភាពខ្មែរ-សូវៀត ដើម្បីក្រុមគ្រូពេទ្យពិនិត្យព្យាបាលជំងឺតាំងពីថ្ងៃទី២ ខែកក្កដា ឆ្នាំ២០១៩មក»។
កើតនៅថ្ងៃទី៧ ខែកក្កដា ឆ្នាំ១៩២៦ លោក នួន ជា កាន់តំណែងជាអនុលេខាបក្សកុម្មុយនីស្តកម្ពុជា ជាសមាជិកគណៈកម្មាធិការអចិន្ត្រៃយ៍ និងគណៈកម្មាធិការមជ្ឈឹមបក្សកុម្មុយនីស្តកម្ពុជា និងជាប្រធានរដ្ឋសភាជាតិនៃរបបកម្ពុជាប្រជាធិបតេយ្យ។
អតីតមេដឹកនាំខ្មែរក្រហមរូបនេះ ត្រូវបានចាប់ខ្លួននៅថ្ងៃទី១៩ ខែកញ្ញា ឆ្នាំ២០០៧ ហើយនាំយកមកជំនុំជម្រះទោសនៅសាលាក្ដីខ្មែរក្រហម នៅក្រោមការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងឧក្រិដ្ឋកម្មប្រល័យពូជសាសន៍៕