សពអតីតមេដឹកនាំជាន់ខ្ពស់នៃរបបខ្មែរក្រហម ត្រូវបានបញ្ជូនចេញពីមន្ទីរពេទ្យទៅផ្ទះរបស់លោកនៅឯព្រំដែនកម្ពុជា-ថៃ ស្ថិតក្នុងខេត្តប៉ៃលិនហើយនៅព្រឹកថ្ងៃនេះ។ នេះបើតាមការបញ្ជាក់ពីអ្នកនាំពាក្យសាលាក្ដីខ្មែរក្រហម។
បងធំទី២នៃរបបខ្មែរក្រហម លោក នួន ជា បានទទួលមរណភាពនៅអាយុ ៩៣ឆ្នាំ កាលពីម៉ោង ៦ល្ងាចថ្ងៃម្សិលមិញនេះ នៅឯមន្ទីរពេទ្យមិត្តភាពខ្មែរ-សូវៀត ជាទីដែលលោកត្រូវបាននាំយកទៅសម្រាកព្យាបាលចាប់តាំងពីថ្ងៃទី០២ ខែកក្កដាកន្លងមកម៉្លេះ។
អ្នកនាំពាក្យអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) លោក នេត្រ ភ័ក្ត្រា បានប្រាប់វីអូឌីតាមតេឡេក្រាមថា សពអតីតមេដឹកនាំខ្មែរក្រហមរូបនេះ ត្រូវបានបញ្ជូនចេញពីមន្ទីរពេទ្យមិត្តភាពខ្មែរ-សូវៀត នៅវេលាម៉ោង ៤ និង ៤៧នាទីព្រឹកថ្ងៃទី០៥ ខែសីហានេះ។
បើតាមអ្នកនាំពាក្យរូបនេះ សពលោក នួន ជា ត្រូវបានក្រុមគ្រួសារយកទៅរៀបចំបុណ្យទៅតាមប្រពៃណីជាតិនៅផ្ទះរបស់គាត់ស្ថិតនៅឯខេត្តប៉ៃលិន។
កើតនៅថ្ងៃទី៧ ខែកក្កដា ឆ្នាំ១៩២៦ នៅភូមិវត្តគរ ស្ថិតក្នុងទឹកដីខេត្តបាត់ដំបង លោក នួន ជា កាន់តំណែងជាអនុលេខាបក្សកុម្មុយនីស្តកម្ពុជា ជាសមាជិកគណៈកម្មាធិការអចិន្ត្រៃយ៍ និងគណៈកម្មាធិការមជ្ឈឹមបក្សកុម្មុយនីស្តកម្ពុជា និងជាប្រធានរដ្ឋសភាជាតិនៃរបបកម្ពុជាប្រជាធិបតេយ្យ។
អតីតមេដឹកនាំខ្មែរក្រហមរូបនេះ ត្រូវបានចាប់ខ្លួននៅថ្ងៃទី១៩ ខែកញ្ញា ឆ្នាំ២០០៧ ហើយនាំយកមកជំនុំជម្រះទោសនៅសាលាក្ដីខ្មែរក្រហម នៅក្រោមការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងឧក្រិដ្ឋកម្មប្រល័យពូជសាសន៍។
លោក នួន ជា ត្រូវបានសាលាក្ដីខ្មែរក្រហមកាត់ទោសឲ្យជាប់ពន្ធនាគារអស់មួយជីវិតម្ដងរួចមកហើយកាលពីឆ្នាំ២០១៤ និងម្ដងទៀតនៅឆ្នាំ២០១៧ ក្រោមការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មប្រល័យពូជសាសន៍ប្រឆាំងនឹងជនជាតិវៀតណាម និងពលរដ្ឋខ្មែរឥស្លាម៕
