ក្រុមមេធាវីការពារក្ដីឲ្យលោក នួន ជា បានអះអាងថា អតីតមេដឹកនាំជាន់ខ្ពស់នៃរបបខ្មែរក្រហម មានបំណងបកស្រាយ«ការពិតនៅក្នុងការពិត» ជាអ្វីដែលក្រុមមេធាវីអះអាងថា ជាបំណងប្រាថ្នាចុងក្រោយរបស់គាត់។
ក្នុងសន្និសីទសារព័ត៌មាននៅពាក់កណ្ដាលយប់ថ្ងៃអាទិត្យឈានចូលថ្ងៃទី០៥ ខែសីហានេះ លោក លីវ សុវណ្ណា សហមេធាវីការពារក្ដីឲ្យលោក នួន ជា បានថ្លែងថា កូនក្ដីរបស់លោកមានបំណងបង្ហាញការពិតនៅក្នុងការពិតទៅដល់ប្រជាជនកម្ពុជា ដែលនោះគឺជាបំណងប្រាថ្នាចុងក្រោយរបស់លោក។
បងធំទី២នៃរបបខ្មែរក្រហម លោក នួន ជា បានទទួលមរណភាពនៅម៉ោង ៦ល្ងាចថ្ងៃទី០៤ ខែសីហា នៅអាយុ ៩៣ឆ្នាំ នៅឯមន្ទីរពេទ្យមិត្តភាពខ្មែរ-សូវៀត បន្ទាប់ពីត្រូវបានបញ្ជូនទៅព្យាបាលនៅទីនោះចាប់តាំងពីថ្ងៃទី០២ ខែកក្កដាកន្លងមកនេះ។
កើតនៅថ្ងៃទី៧ ខែកក្កដា ឆ្នាំ១៩២៦ នៅភូមិវត្តគរ ស្ថិតក្នុងទឹកដីខេត្តបាត់ដំបង លោក នួន ជា កាន់តំណែងជាអនុលេខាបក្សកុម្មុយនីស្តកម្ពុជា ជាសមាជិកគណៈកម្មាធិការអចិន្ត្រៃយ៍ និងគណៈកម្មាធិការមជ្ឈឹមបក្សកុម្មុយនីស្តកម្ពុជា និងជាប្រធានរដ្ឋសភាជាតិនៃរបបកម្ពុជាប្រជាធិបតេយ្យ។
អតីតមេដឹកនាំខ្មែរក្រហមរូបនេះ ត្រូវបានចាប់ខ្លួននៅថ្ងៃទី១៩ ខែកញ្ញា ឆ្នាំ២០០៧ ហើយនាំយកមកជំនុំជម្រះទោសនៅសាលាក្ដីខ្មែរក្រហម នៅក្រោមការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងឧក្រិដ្ឋកម្មប្រល័យពូជសាសន៍៕
