លោកនាយករដ្ឋមន្ត្រី ហ៊ុន សែន បានបញ្ជាទៅមន្ត្រីពាក់ព័ន្ធទាំងអស់ត្រូវតែការពារកម្ពុជា កុំឲ្យក្លាយជាកន្លែងលាក់ខ្លួនរបស់ពួកភេរវករ និងកន្លែងលាងលុយកខ្វក់ ប៉ុន្តែ អ្នកឃ្លាំមើលសង្គមកម្ពុជា មើលឃើញថា កម្ពុជាពុំអាចទប់ស្កាត់ចរាចរណ៍លុយកខ្វក់បាននោះឡើយ។
លោក ហ៊ុន សែន បានបញ្ជាផ្ទាល់មាត់បែបនេះក្នុងពិធីប្រគល់សញ្ញាបត្រដល់និស្សិតនាយនគរបាលបន្តវេននៅឯសាលានគរបាលនៅស្រុកកៀនស្វាយ នាព្រឹកថ្ងៃនេះ។
លោក ហ៊ុន សែន ថ្លែងថា៖ «ធ្វើម៉េចកុំឲ្យប្រទេសកម្ពុជាយើង ក្លាយទៅជាជម្រកនៃការលាក់ខ្លួនរបស់ភេរវកម្ម ទោះបីថា យើងមិនមែនជាគោលដៅវាយប្រហារភារវកម្ម តែត្រូវធ្វើឲ្យកម្ពុជា កុំឲ្យក្លាយទៅជាប្រទេសនៃជម្រក ឬការឆ្លងកាត់របស់ពួកភេរវកម្ម។ កុំឲ្យប្រទេសរបស់យើងក្លាយទៅជាកន្លែងដែលសម្អាតប្រាក់ ព្រោះសំណុំបញ្ហាគ្រឿងញៀន ការជូញដូរគ្រឿងញៀន ការជួញដូរអាវុធ ការលាងលុយកខ្វក់ គឺវាសំណុំរឿងទៅតែមួយ។ យើងត្រូវខិតខំប្រយុទ្ធប្រឆាំងទៅហ្នឹងបញ្ហាទាំងអស់នេះ»។
អ្នកវិភាគនយោបាយ លោកបណ្ឌិត ឡៅ ម៉ុងហៃ ទទួលស្គាល់ពីជោគជ័យរបស់រដ្ឋាភិបាលក្នុងការទប់ស្កាត់មិនឲ្យកម្ពុជាក្លាយជាជម្រកនៃចលនាភេរវកម្ម ប៉ុន្តែ លោកថា កម្ពុជាបរាជ័យក្នុងការទប់ស្កាត់ចរាចរណ៍លុយកខ្វក់ចូលមកក្នុងប្រទេសទៅវិញ ដែលលោកថា បញ្ហានេះបណ្ដាលមកពីប្រព័ន្ធគ្រប់គ្រងរដ្ឋបច្ចុប្បន្ន នៅមានភាពទន់ខ្សោយនៅឡើយ។
លោក ឡៅ ម៉ុងហៃ មានប្រសាសន៍ថា៖ «ប្រព័ន្ធយើងវាអត់ស្អាតស្អំ ហើយរឿងលុយកាក់ វាធូរលង់ រឿងលាងលុយ មានទាំងច្បាប់ ប៉ុន្តែ អត់មានប្រសិទ្ធិភាព»។
ទាក់ទងនឹងបញ្ហាជូញដូរគ្រឿងញៀន និងសម្អាតប្រាក់នេះដែរ រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២២ ខែមេសា បានណែនាំដល់មន្ត្រីព្រំដែនឲ្យពង្រឹងការត្រួតពិនិត្យបន្ថែមទៀត ជាពិសេសទៅលើបទល្មើសគ្រឿងញៀន និងការសម្អាតប្រាក់ បន្ទាប់ពីសង្កេតឃើញមានការប៉ុនប៉ងលួចធ្វើសកម្មភាពឧក្រិដ្ឋកម្មឆ្លងដែននៅភូមិសាស្ត្រមួយចំនួនដែលមានការធ្វេសប្រហែស និងខ្វះការប្រុងប្រយ័ត្ន។
របាយការណ៍សមត្ថកិច្ចបង្ហាញថា ក្នុងរយៈពេល ៣ខែ ដើមឆ្នាំ២០១៩នេះ សមត្ថកិច្ចបង្ក្រាបបទល្មើសគ្រឿងញៀនបានចំនួន ២០៣៣ករណី និងឃាត់មនុស្សចំនួន ៤៣៩៩នាក់ ក្នុងនោះស្រី ៣៧២នាក់ ជនបរទេស ១០៤នាក់។
សមត្ថកិច្ចកម្ពុជាចាប់បាន និងដកហូតលុយជាច្រើនសែនដុល្លារជាបន្តបន្ទាប់ ដែលត្រូវបាននាំឆ្លងដែនចូលមកក្នុងប្រទេសកម្ពុជាពីសំណាក់ជនជាតិចិននៅដើមឆ្នាំ២០១៩នេះ។
កាលពីថ្ងៃ៣០ ខែឧសភា សមត្ថកិច្ចបានឃាត់ខ្លួន និងដកហូតទឹកប្រាក់ខ្ទង់ ៨៥ម៉ឺនដុល្លារពីជនជាតិចិនម្នាក់នៅឯព្រលានយន្តហោះអន្តរជាតិភ្នំពេញ បន្ទាប់ពីរកឃើញថា លុយនោះត្រូវបាននាំចូលដោយពុំមានបញ្ជាក់ពីប្រភពហិរញ្ញវត្ថុច្បាស់លាស់។
សមត្ថកិច្ចកម្ពុជាបានដកហូតលុយពីជនជាតិចិនដល់ទៅជាង ៣លានដុល្លារជាលើកដំបូងកាលពីចុងឆ្នាំ២០១៨ មុននឹងចាប់បានការនាំចូលលុយដល់ទៅជាង ៣លាន ៥សែនដុល្លារជាលើកទី២ កាលពីខែមេសាក្នុងឆ្នាំនេះ៕
