មេសិទ្ធិមនុស្សរដ្ឋាភិបាល អះអាងថា ក្រុមមន្ត្រីក្រសួងការបរទេសជប៉ុន បានបង្ហាញក្តីបារម្ភជាថ្មីអំពីការរំលោភសិទ្ធិមនុស្សនៅកម្ពុជា មួយឆ្នាំក្រោយពីប្រមុខការទូតជប៉ុន បានលើកឡើងអំពីបញ្ហានេះរួចមកហើយ ក្រោយការបោះឆ្នោតជាតិដ៏ចម្រូងចម្រាស់។
ប្រធានគណៈកម្មការសិទ្ធិមនុស្សរដ្ឋាភិបាល លោក កែវ រ៉េមី បានជួបប្រជុំជាមួយឯកអគ្គរាជទូតទទួលបន្ទុកកិច្ចសហប្រជាជាតិនៃក្រសួងការបរទេសជប៉ុន លោក ម៉ាសាតុ អូតាកា នៅរាជធានីភ្នំពេញ នៅព្រឹកថ្ងៃនេះ។
ប្រាប់អ្នកសារព័ត៌មានក្រោយកិច្ចប្រជុំនោះ លោក កែវ រ៉េមី បានថ្លែងថា ក្រុមមន្ត្រីតំណាងរដ្ឋាភិបាលជប៉ុន បានលើកឡើងនូវបញ្ហានានាជាមួយក្រុមមន្ត្រីនៃគណៈកម្មការសិទ្ធិមនុស្សកម្ពុជា ក្នុងនោះមានទាំងការធ្លាក់ចុះនៃលំហសេរីភាព ការគោរពសិទ្ធិមនុស្ស និងលទ្ធិប្រជាធិបតេយ្យផងដែរ។
លោក កែវ រ៉េមី ថ្លែងថា៖ «យើងនិយាយឲ្យមានតុល្យភាពនូវអ្វីដែលគាត់[ជប៉ុន]លើក។ គាត់បារម្ភការរំលាយគណបក្សសង្គ្រោះជាតិ ទាក់ទងទៅនឹងលោក កឹម សុខា ទាក់ទងទៅនឹងលោក កែម ឡី និងសិទ្ធិសេរីភាពសម្តែងមតិរបស់សង្គមស៊ីវិល និងការជួបប្រជុំ ។ល។ និង។ល»។
ឆ្លើយតបនឹងក្តីបារម្ភរបស់មន្ត្រីការបរទេសជប៉ុន លោក កែវ រ៉េមី ប្រាប់ថា កម្ពុជាមិនមានការរំលោភសិទ្ធិមនុស្ស ឬការរឹតត្បិតសេរីភាពបញ្ចេញមតិរបស់អង្គការ និងសមាគមនោះទេ ប៉ុន្តែ លោកអះអាងថា កន្លងមក សង្គមស៊ីវិលនានា មិនសូវសហការជាមួយរដ្ឋាភិបាលកម្ពុជា។
លោក កែវ រ៉េមី ថ្លែងបន្តថា៖ «ប៉ុន្តែ យើងបានបកស្រាយប្រាប់គាត់ ទិដ្ឋភាពច្បាប់ អង្គហេតុ ដែលជាការអនុវត្តរបស់តុលាការ។ ឧទាហរណ៍ ដូចករណីហូបនំបញ្ចុក បើការទទួលទាននំបញ្ចុកធម្មតាមិនអីទេ ក៏ប៉ុន្តែ អតីតមេដឹកនាំបក្សប្រឆាំងអំពាវនាវឲ្យហូបនំបញ្ចុក ដើម្បីរួបរួមគ្នាមានគោលបំណងផ្តួលរំលំរដ្ឋាភិបាលស្របច្បាប់ ទាក់ទងត្រង់ចំណុចនេះ យើងអញ្ចើញពួកគាត់មកបំភ្លឺ»។
វីអូឌី ពុំអាចសុំការបញ្ជាក់បន្ថែមពីមន្ត្រីការបរទេសជប៉ុនទាំងនោះបានទេ ជុំវិញអ្វីដែលលោក កែវ រ៉េមី បានលើកឡើងនៅថ្ងៃនេះ។
ប៉ុន្តែ ក្នុងសេចក្ដីប្រកាសព័ត៌មានចេញនៅល្ងាចថ្ងៃនេះ ស្ថានទូតជប៉ុន បានរៀបរាប់ថា លោក ម៉ាសាតុ អូតាកា បានជជែកជាមួយលោក កែវ រ៉េមី អំពីសេរីភាពនយោបាយ សិទ្ធិសេរីភាពនៃការជួបជុំ និងសម្ដែងមតិ សេរីភាពនៃការបង្កើតសមាគម និងឯករាជ្យភាពនៃតុលាការកម្ពុជា។
ស្ថានទូតជប៉ុន បានរៀបរាប់ក្នុងសេចក្ដីប្រកាសព័ត៌មានថា៖ «នៅក្នុងកិច្ចសន្ទនានេះ ប្រទេសទាំងពីរបានផ្លាស់ប្ដូរទស្សនៈគ្នាលើបញ្ហាសិទ្ធិមនុស្សជាទូទៅ ដូចជា សេរីភាពក្នុងការចូលរួមសកម្មភាពនយោបាយ ការសម្ដែងមតិ ការជួបជុំ និងការរួមគ្នាជាសមាគម និងឯករាជ្យភាពនៃប្រព័ន្ធតុលាការ»។
ទោះជាយ៉ាងណា រដ្ឋមន្ត្រីការបរទេសជប៉ុន លោក តារ៉ូ កូណូ បានបង្ហាញការខកចិត្តរបស់ខ្លួនប្រាប់ទៅរដ្ឋមន្ត្រីការបរទេសកម្ពុជា លោក ប្រាក់ សុខុន កាលពីដើមខែសីហាឆ្នាំមុនហើយ ពោលគឺតែមួយសប្ដាហ៍ប៉ុណ្ណោះក្រោយការបោះឆ្នោតជាតិ ដែលត្រូវបានធ្វើឡើងដោយគ្មានការចូលរួមពីគណបក្សសង្គ្រោះជាតិ ដែលជាបក្សប្រឆាំងដ៏ធំនៅកម្ពុជានោះឡើយ។
នៅពេលនោះ ប្រមុខការទូតជប៉ុន ក៏បានទទូចឲ្យកម្ពុជាបើកលំហប្រជាធិបតេយ្យឡើងវិញ និងស្វែងរកការចរចានយោបាយជាមួយបក្សប្រឆាំងផងដែរ។
ការបង្ហាញនូវការខកចិត្តរបស់រដ្ឋាភិបាលជប៉ុននេះ គឺបន្ទាប់ពីក្រុមប្រទេសប្រជាធិបតេយ្យមួយចំនួន បានបង្ហាញការរិះគន់ និងថ្កោលទោសចំពោះការបោះឆ្នោតនៅកម្ពុជាថា គ្មានភាពសេរី និងយុត្តិធម៌នោះទេ ខណៈគ្មានវត្តមានអតីតគណបក្សសង្គ្រោះជាតិ ដែលជាអតីតគណបក្សប្រឆាំង ចូលរួមនោះ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែន ករុណា ច្រានចោលការលើកឡើងរបស់លោក កែវ រ៉េមី ហើយចាត់ទុកការលើកឡើងរបស់មន្ត្រីរដ្ឋាភិបាលរូបនេះថា ធ្វើឲ្យជំងឺសិទិ្ធមនុស្សកាន់តែធ្ងន់ធ្ងរបន្ថែមទៀត បើមិនព្យាយាមរកដំណោះស្រាយឲ្យបានទាន់ពេលនោះ។
លោក ស៊ឹង សែនករុណា មានប្រសាសន៍ថា៖ «យើងលើកយកមកបកស្រាយ ឬដោះសារការរំលោភសិទ្ធិមនុស្ស ឬការរំលោភសេរីភាពជួបប្រជុំ ឬក៏សេរីភាពផ្សេងៗទៀត គឺអត់មានដំណោះស្រាយអ្វីទេ។ ផ្ទុយទៅវិញ ការបកស្រាយកាន់តែមានបញ្ហាដែលជាជំងឺរបស់កម្ពុជា គឺជាជំងឺដដែល។ វាអត់មានការព្យាបាលអ្វីកើតទេ»។
ក្រុមប្រទេសលោកសេរីដែលបង្ហាញការខកចិត្តទាំងនោះ រួមមាន សហរដ្ឋអាមេរិក សហភាពអឺរ៉ុប កាណដា ណូវែលសេឡង់ បារាំង អាល្លឺមង់ និងអង់គ្លេសជាដើម ហើយគេឃើញមានតែប្រទេសកាន់របបសង្គមនិយមប៉ុណ្ណោះ ដែលបង្ហាញការសាទរចំពោះការបោះឆ្នោតនៅកម្ពុជាថា ត្រឹមត្រូវ និងអាចទទួលយកបាន៕