រដ្ឋមន្ត្រីក្រសួងមហាផ្ទៃ លោក ស ខេង ជំរុញទៅក្រសួងពាក់ព័ន្ធឲ្យចាត់វិធានាការបង្កកទ្រព្យសម្បត្តិឧក្រិដ្ឋជនពាក់ព័ន្ធនឹងបទល្មើសព្រៃឈើ ការជួញដូរគ្រឿងញៀន និងការជួញដូរមនុស្ស ដើម្បីឲ្យការទប់ស្កាត់បទល្មើសមានប្រសិទ្ធភាព។
រដ្ឋមន្ត្រីមហាផ្ទៃ បានថ្លែងបែបនេះក្នុងវេទិកាជាតិអន្តរសាសនា ដើម្បីប្រយុទ្ធប្រឆាំងអំពើជួញដូរមនុស្ស នៅរាជធានីភ្នំពេញ កាលពីម្សិលមិញនេះ។
ក្នុងពិធីនោះ លោក ស ខេង ថ្លែងថា ការចរាចរលុយខ្មៅ ឬលុយខុសច្បាប់ បង្កឲ្យមានឧក្រិដ្ឋកម្មព្រៃឈើ ឧក្រិដ្ឋកម្មគ្រឿងញៀន និងការជួញដូរមនុស្ស។ លោកថា ដើម្បីទប់ស្កាត់បញ្ហានេះ កម្លាំងអនុវត្តច្បាប់ មាននគរបាលយុត្តិធម៌ ស្ថាប័នតុលាការ ចាំបាច់សហការគ្នាអនុវត្តឲ្យបានល្អ បង្កកទ្រព្យសម្បត្តិពួកឧក្រិដ្ឋជនទាំងនោះ។
លោក ស ខេង ថ្លែងថា៖ «គ្រឿងញៀនក្តី ជូញដូរមនុស្សក្តី រកស៊ីឈើខុសច្បាប់ក្តី បើយើញគ្រាន់តែចាប់មនុស្សបានមក យកមនុស្សទៅកាត់ទោស ប៉ុន្តែ អាចចរាចរលុយនោះ។ អាលុយខ្មៅនោះនៅតែចរាចរដដែលយើងអត់មានបង្កកទុកវាអត់មានប្រយោជន៍ទេ[គ្មានប្រសិទ្ធិភាព]»។
សហរដ្ឋអាមេរិក បានដាក់កម្ពុជាឲ្យស្ថិតនៅក្នុងក្រុមប្រទេសស្រទាប់ទី២ នៅក្នុងរយៈពេល ៣ឆ្នាំជាប់ៗគ្នា ដែលមានន័យថា កម្ពុជាស្ថិតក្នុងចំណោមប្រទេស ដែលត្រូវបានដាក់ឲ្យមានការឃ្លាំមើលបញ្ហាការជួញដូរមនុស្ស។ នេះបើតាមរបាយការណ៍ស្ដីពីការជួញដូរមនុស្ស ដែលចេញដោយក្រសួងការបរទេសអាមេរិកកាលពីឆ្នាំ២០១៨។
លោក ស ខេង លើកឡើងថា ចំណាត់ថ្នាក់នេះ កម្ពុជាជាប្រទេសលាងលុយខ្មៅ។ លោកថា បើលុយខ្មៅរបស់ឧក្រិដ្ឋជនចរាចរលើទីផ្សារកម្ពុជាធម្មតាបាន កម្ពុជាក្លាយជាប្រទេសលាងលុយ ដែលជាបញ្ហាត្រូវទប់ស្កាត់ ដើម្បីមុខមាត់រដ្ឋាភិបាល។
លោក ស ខេង អះអាងទៀតថា ថ្មីៗនេះ រដ្ឋមន្ត្រីក្រសួងយុត្តិធម៌ បានដឹកនាំមន្ត្រីអនុវត្តច្បាប់កំណត់នីតិវិធីជាក់លាក់ថា ឧក្រិដ្ឋជនគ្រឿងញៀន ដែលសមត្ថកិច្ចចាប់បាន មិនត្រឹមតែផ្តន្ទាទោសដាក់គុកប៉ុណ្ណោះទេ តែត្រូវបង្កកទ្រព្យសម្បត្តិទៀត។ ប៉ុន្ត លោកថា វិធានការនេះត្រូវអនុវត្តទៅលើ ឧក្រិដ្ឋជនជួញដូរមនុស្ស និងឧក្រិដ្ឋជនព្រៃឈើផងដែរ។
VOD មិនអាចទាក់ទងអ្នកនាំពាក្យក្រសួងយុត្តិធម៌លោក ជិន ម៉ាលីន ដើម្បីបញ្ជាក់ពីការជំរុញរបស់រដ្ឋមន្ត្រីក្រសួងមហាផ្ទៃនេះបានទេ គិតត្រឹមម៉ោងផ្សាយនេះ ដោយទូរសព្ទមិនអាចទាក់ទងបាន។
ការបង្ក្រាបបទល្មើសគ្រឿងញៀននៅក្លឹមកំសាន្តរ៉ក់ កាលពីថ្ងៃទី២៣កុម្កះដើមឆ្នាំនេះ សាលាដំបូងរាជធានីភ្នំពេញ បានសម្រេចឃុំខ្លួន ឧកញ៉ា គិត ធាង នៅពន្ធនាគារ ដោយចោទថាជាប់ពាក់ព័ន្ធទៅនឹងសំណុំរឿងគ្រឿងញៀន។
ការបង្ក្រាបបទល្មើសព្រៃឈើនៅភាគឦសានប្រទេស ក្នុងខេតមណ្ឌលគិរី តុលាការខេត្តនេះ បានសម្រេចឃុំខ្លួនឧកញ៉ា សឹង សំអុល កាលពីថ្ងៃទី១២កក្កដាពាក់ព័ន្ធទៅនឹងបទល្មើសព្រៃឈើ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ អះអាងថា ជាប់រវល់ ពេលសួរចប់ថា តើការឃុំខ្លួនលោកឧកញ៉ា គិត ធាង មានចំណាត់ការបង្កកទ្រព្យសម្បត្តិដែរ ឬក៏អត់។
អ្នកនាំពាក្យសាលាដំបូងខេត្តមណ្ឌលគិរី លោក មាស ប្រុស អះអាងថា លោក ឧកញ៉ា ស៊ឹង សំអុល មិនទាន់មានវិធានការច្បាប់ដើម្បីបង្កកទ្រព្យសម្បត្តិនៅឡើយទេ។
លោក មាស ប្រុស ប្រាប់ថា៖ «ចៅក្រមកំពុងតែស៊ើបអង្កេត អត់ទាន់ចេញសេចក្តីសម្រេចជាសាលក្រមនៅឡើយទេ [ចៅក្រម]កំពុងបន្តដើម្បីរកបក្ខពួកបន្តទៀត»។
ប្រធានគ្រប់គ្រងផ្នែកអង្កេតនៅអង្គការសិទ្ធិមនុស្សលីកាដូ លោក អំ សំអាត យល់ស្របទៅនឹងចំណាត់ការរបស់លោក ស ខេង ប៉ុន្តែ លោកបារម្ភថា ការជំរុញនេះអាចនឹងគ្មានប្រសិទ្ធិភាព បើរដ្ឋាភិបាលមិនអាចទប់ស្កាត់អំពើពុករលួយពីមន្ត្រីខិលខូចដែលទទួលផលពីឧក្រិដ្ឋជនទាំងនេះបាន។
លោក អំ សំអាត ប្រាប់ថា៖ «ដើម្បីឲ្យវាមានប្រសិទ្ធភាពទី១រដ្ឋាភិបាលត្រូវតែមានឆន្ទះពិតប្រាកដក្នុងការបង្ក្រាបបទឧក្រិដ្ឋទាំងអស់ហ្នឹង។ ទី២ ត្រូវធានាថា មន្ត្រីរដ្ឋាភិបាលមិនពាក់ព័ន្ធទៅនឹងបទឧក្រិដ្ឋទាំងអស់ហ្នឹងនោះទេ។ អញ្ចឹង អ្នកណាដែលពាក់ព័ន្ធ ត្រូវតែអនុវត្តទៅតាមផ្លូវច្បាប់ដើម្បីធ្វើជាគំរូ»។
លេខាធិការដ្ឋានបោសសម្អាតលុយកង្វក់អន្តរជាតិ (Financial Action Task Force) ហៅកាត់ថា FATF កាលពីខែកុម្ភៈឆ្នាំនេះ បានដាក់ប្រទេសកម្ពុជាចូលក្នុងបញ្ជីប្រផេះរបស់ខ្លួន សម្រាប់តាមដានការលាងលុយកខ្វក់ពីលំហូរហិរញ្ញវត្ថុ វិនិយោគ និងពាណិជ្ជកម្ម ចេញ និងចូលក្នុងប្រទេសនេះ។
អង្គការអន្តរជាតិមួយនេះ ឲ្យដឹងថា បច្ចុប្បន្ន ប្រទេសចំនួន ២ ដែលត្រូវបានដាក់ចូលក្នុងបញ្ជីខ្មៅ គឺប្រទេសអ៊ីរ៉ង់ និងកូរ៉េខាងជើង ដែលប្រទេសទាំងពីរនេះ កំពុងត្រូវបានពិភពលោកហ៊ុមព័ទ្ធសេដ្ឋកិច្ច ខណៈប្រទេសកម្ពុជា និងប្រទេស ៩ទៀត ត្រូវបានដាក់ចូលក្នុងបញ្ជីតាមដាន៕