លោកនាយករដ្ឋមន្ត្រី ហ៊ុន សែន បានបញ្ជាទៅសមត្ថកិច្ចឲ្យបង្ក្រាបល្បែងស៊ីសងនៅតាមបណ្ដាញអ៊ីនធឺណិតដែលគ្មានអាជ្ញាប័ណ្ណទាំងអស់ និងបានហាមឃាត់ការចេញអាជ្ញាប័ណ្ណបន្តដល់ក្រុមហ៊ុនល្បែងស៊ីសងតាមបណ្ដាញអនឡាញ។
លោក ហ៊ុន សែន បានចេញបញ្ជាបែបនេះនៅក្នុងសារាចរណែនាំមួយចេញផ្សាយនៅថ្ងៃអាទិត្យនេះ បន្ទាប់ពីសង្កេតឃើញថា ក្រុមឧក្រិដ្ឋជនបរទេសបានប្រើប្រាស់ប្រទេសកម្ពុជាជាកន្លែងចាប់ជំរិតទារប្រាក់តាមរយៈល្បែងភ្នាល់តាមប្រព័ន្ធអ៊ិនធឺណិត។
បើតាមសារាចរណែនាំនោះ លោក ហ៊ុន សែន បញ្ជាក់ថា ល្បែងភ្នាល់តាមប្រព័ន្ធអ៊ិនធឺណិត បានធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។
លោក ហ៊ុន សែន បានចេញបញ្ជាបែបនេះតែ ៤ថ្ងៃប៉ុណ្ណោះក្រោយពីនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ ដែលបានសហការជាមួយសមត្ថកិច្ចចិននោះ បានចាប់ខ្លួនជនជាតិចិនដល់ទៅ ១២៧នាក់នៅឯខេត្តព្រះសីហនុ កាលពីថ្ងៃទី១៤ ខែសីហានេះ ក្រោមការសង្ស័យថា បានចាប់ជំរិតតាមប្រព័ន្ធអ៊ិនធឺណិត។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា សម្ដែងការស្វាគមន៍ចំពោះវិធានការបង្ក្រាបនេះ ប៉ុន្តែ លោកក៏ស្នើឲ្យពង្រីកការបង្ក្រាបទៅលើល្បែងឆ្នោតផងដែរ។
លោក ស៊ឹង សែនករុណា៖ «ខ្ញុំគាំទ្រសារាចរនេះ តែនឹងតាមឃ្លាំមើលថា មានប្រសិទ្ធភាពប៉ុណ្ណា។ ឃើញថា ថ្មីៗនេះ ឃើញមានការអនុញ្ញាតផ្ដល់អាជីវកម្មឆ្នោតថែមទៀតណា។ កាលណាលេងល្បែង វាមិនចម្រើនទេ ជាការពិនិត្យរបស់យើង យើងឃើញថា មានបញ្ហាច្រើនណាស់ក្នុងការគ្រប់គ្រងអាជីវកម្មទាំងអស់ហ្នឹង ជាពិសេសអនឡាញទៅទៀត។ សមត្ថកិច្ចគួរណាស់តែរកវិធានការបែបណាដើម្បីគ្រប់គ្រងឱ្យមានប្រសិទ្ធភាព»។
ក្នុងសារាចរណែនាំនេះ លោកនាយករដ្ឋមន្ត្រី ហ៊ុន សែន បានរដ្ឋមន្ត្រីក្រសួងមហាផ្ទៃ លោក ស ខេង រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន រដ្ឋមន្ត្រីទីស្ដីការគណៈរដ្ឋមន្ត្រី លោក ប៊ិន ឈិន មេបញ្ជាការកងរាជអាវុធហត្ថ មេនគរបាលជាតិ និងអភិបាលខេត្តទាំងអស់ ឲ្យអនុវត្តតាមបទបញ្ជានេះឲ្យមានប្រសិទ្ធភាព។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ថ្លែងថា ក្រសួងលោកទទួលបានសារាចរណែនាំនេះរួចហើយ ហើយលោកកំពុងឱ្យសហការីផ្ដល់ព័ត៌មានបន្ថែមពីចំនួនអាជ្ញាប័ណ្ណកាស៊ីណូអនឡាញនៅកម្ពុជាឱ្យសាធារណៈជនបានជ្រាបជាព័ត៌មាន។
លោក មាស សុខសេនសាន៖«ខ្ញុំបានទទួលលិខិតនិងព័ត៌មាននេះហើយ ខ្ញុំកំពុងឱ្យសហការីរកតួលេខ»។
តួលេខផ្ដល់ឲ្យដោយនាយកដ្ឋានគ្រប់គ្រងអាជីវកម្មភ្នាល់ និងប្រឆាំងការសម្អាតប្រាក់ និងហិរញ្ញប្បទានភរវកម្ម នៃក្រសួងសេដកិច្ច និងហិរញ្ញវត្ថុបង្ហាញថា កម្ពុជាបានផ្ដល់អាជ្ញាប័ណ្ណឲ្យបើកកាស៊ីណូ ១៦៣កន្លែងនៅទូទាំងប្រទេសគិតត្រឹមបំណាច់ខែមិថុនាឆ្នាំនេះ ខណៈដែលកាស៊ីណូដែលទទួលបានអាជ្ញាប័ណ្ណ និងកំពុងដំណើរការអាជីវកម្មល្បែងភ្នាល់នៅទូទាំងប្រទេស មានចំនួន ៥៣កន្លែង។
ទោះជាយ៉ាងណាក៏ដោយ តួលេខនៃអាជ្ញាប័ណ្ណអាជីវកម្មកាស៊ីណូអនឡាញ មិនទាន់ត្រូវបានក្រសួងសេដ្ឋកិច្ចបង្ហាញជាសាធារណៈនោះទេ។
មន្ត្រីម្នាក់បម្រើការនៅក្រសួងសេដ្ឋកិច្ច និងហិរញ្ញវត្ថុ ដែលសុំមិនបញ្ចេញឈ្មោះ បានឲ្យដឹងថា កាស៊ីណូដែលមានអាជ្ញាប័ណ្ណហើយកំពុងដំណើរការរកស៊ីទាំងនោះភាគច្រើន បើកល្បែងអនឡាញនៅជាមួយតុល្បែងក្នុងកាស៊ីណូដែរ។
កម្ពុជាមិនទាន់មានច្បាប់គ្រប់គ្រងកាស៊ីណូនោះឡើយ ខណៈដែលសេចក្ដីព្រាងច្បាប់គ្រប់គ្រងកាស៊ីណូ និងល្បែងភ្នាល់ កំពុងស្ថិតនៅក្នុងដៃក្រសួងសេដ្ឋកិច្ច និងហិរញ្ញវត្ថុ។
ច្បាប់ថវិកាជាតិឆ្នាំមុន បង្ហាញថា កម្ពុជាប្រមូលពន្ធពីកាស៊ីណូបានចំនួន ៤៦លានដុល្លារកាលពីឆ្នាំ២០១៨កន្លងមកនេះ៕