កម្ពុជា គ្រោងស្នើសុំចុះមុខម្ហូប៥មុខ និង បង្អែម៥មុខ ក្នុងបញ្ជីបេតិកភណ្ឌអរូបីយពិភពលោករបស់អង្គការយូណេស្កូ (UNESCO) ដើម្បីលើកស្ទួយវិស័យទេសចរណ៍ម្ហូបអាហារ។
គម្រោងនេះ ត្រូវបានលើកឡើងដោយរដ្ឋមន្រ្តីក្រសួងទេសចរណ៍ ក្នុងសន្និសីទអន្តរជាតិលើកទី១ ស្តីពីទេសចរណ៍ម្ហូបអាហារ ថ្ងៃទី២១ សីហា នៅសណ្ឋាគារសុខា ក្នុងគោលដៅលើកកម្ពស់គុណតម្លៃម្ហូបអត្តសញ្ញាណជាតិខ្មែរ ដែលជាផលិតផលទេសចរណ៍ដ៏ទាក់ទាញ។
យោងតាមសំណេរលើទំព័រ Facebook ក្រសួងទេសចរណ៍កម្ពុជា នៅថ្ងៃពុធម្សិលមិញ រដ្ឋមន្រ្តីក្រសួងទេសចរណ៍ លោក ថោង ខន បានលើកឡើងថា វិស័យម្ហូបអាហារ ជាកម្លាំងចលករដ៏សំខាន់ក្នុងការរួមចំណែកទាក់ទាញភ្ញៀវទេសចរមកកម្ពុជា។
លោក ថោង ខុន មានប្រសាសន៍ថា៖ «ម្ហូបអាហារ បានចូលរួមដល់ការបង្កើតភាពចងចាំដល់ទេសចរ អំពីគោលដៅដែលបានទស្សនា និងជាទូតនាំសារអំពីវប្បធម៌ អត្តសញ្ញាណ ការរស់នៅរបស់ប្រជាជនក្នុងតំបន់ប្រាប់ទៅភ្ញៀវទេសចរ»។
អ្នកនាំពាក្យក្រសួងទេសចរណ៍ លោក តុប សុភ័ក ឱ្យដឹងដែរថា ការចុះបញ្ជីជាសម្បត្តិបេតិកភណ្ឌមនុស្សជាតិនេះ នឹងជំរុញឱ្យទេសចរអន្តរជាតិស្គាល់មុខម្ហូបខ្មែរ និងចង់មកភ្លក់ ដូចពួកគេចង់មកទស្សនាប្រាសាទបុរាណរបស់ខ្មែរ ដែលបានចុះក្នុងបញ្ជីអង្គការយូណេស្កូ។
លោក សុភ័ក បន្ថែមថា៖ «ការស្នើបញ្ចូលម្ហូបអាហារហ្នឹង…គឺក្នុងគោលបំណងមួយ យើងចង់លើកពីគុណតម្លៃនៃម្ហូបអាហារខ្មែរ ដែលទាក់ទងទៅនឹងប្រពៃណីទំនៀមទម្លាប់ និងបតិកភណ្ឌរបស់ជាតិខ្មែរ ដើម្បីបង្ហាញអន្តរជាតិឱ្យបានស្គាល់ថា កម្ពុជា ជាគោលដៅទេសចរណ៍មួយល្អ មិនត្រឹមតែ[មាន]សម្បត្តិបេតិកភណ្ឌប្រាង្គប្រាសាទបុរាណនានា រួមនឹងអេកូទេសចរណ៍អីទេ ប៉ុន្តែ មានមុខម្ហូបដ៏ឆ្ងាញ់សម្រាប់ជានិមិត្តរូបរបស់កម្ពុជា»។
បើតាមលោក សុភ័ក ប្រាប់ វីអូឌី តាមប្រព័ន្ធ Telegram មុខម្ហូបទាំង៥ នោះ មានដូចជាសម្លកកូរ សម្លម្ជូរខ្មែរ សម្លប្រហើរ ហហ្មុក(អាម៉ុក) និងនំបញ្ចុក។ ចំណែកបង្អែម ៥មុខនោះ រួមមាន នំអន្សម នំស្លឹកស្រស់ នំចក្រច័ន្ទ នំផ្លែអាយ និងបាយដំណើបសង់ខ្យា។
លោក តុប សុភ័ក បញ្ជាក់ថា មុននឹងដាក់មុខម្ហូប និងបង្អែមទាំងនោះទៅកាន់អង្គការយូនីស្គូ កម្ពុជា ត្រូវការសិក្សាស្រាវជ្រាវ និងចងក្រងឯកសារពាក់ព័ន្ធឱ្យបានច្បាស់លាស់ និងត្រូវឆ្លងច្រើនដំណាក់កាល ដែលអាចនឹងត្រូវការពេលច្រើនឆ្នាំ។
សហប្រធានក្រុមការងារទេសចរណ៍ឯកជន លោក លូ ម៉េង គាំទ្រចំពោះគម្រោងស្នើខាងលើ ដោយលោកយល់ឃើញថា អាហារគឺជាផ្នែកសំខាន់បំផុតមួយសម្រាប់វិស័យទេសចរណ៍។
លោក ម៉េង ប្រាប់បន្ថែមថា៖ «នេះគឺជាគំនិតល្អដែលយើងលើកវប្បធម៌ខ្មែរយើងតាមម្ហូបហ្នឹង។ ព្រោះយើងដឹងថា វិស័យទេសចរណ៍ ភ្ញៀវនឹងជ្រើសរើសទីតាំងដើរលេង ហើយសំខាន់បំផុតហ្នឹងកន្លែងកម្សាន្ត ហើយក្បែរហ្នឹងក៏ម្ហូបអាហារហ្នឹងដែរ»។
លោក លូ ម៉េង ប្រាប់ថា ក្នុងនាមជាតំណាងសហព័ន្ធទេសចរណ៍កម្ពុជា លោកនឹងជំរុញឱ្យសមាជិក ជួយផ្សព្វផ្សាយមុខម្ហូបខ្មែរបន្តទៅដល់អតិថិជន ឱ្យពួកគេបានស្គាល់ និងភ្លក់មុខម្ហូបអត្តសញ្ញាណរបស់ខ្មែរ។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីង សាទរយ៉ាងចំពោះគំនិតផ្តួចផ្តើមដាក់បញ្ចូលមុខម្ហូបអាហារប្រពៃណីខ្មែរជាសម្បត្តិបេតិកភណ្ឌអរូបីយរបស់ពិភពលោក នៅអង្គការយូណេស្កូ។ លោកស្រីបន្ថែមថា មុខម្ហូបអាហារ និងបង្អែមខ្មែរ មិនត្រឹមតែមានរសជាតិឆ្ងាញ់ទេ តែក៏ជាអាហារសុខភាព សម្បូរទៅដោយវីតាមីនផងដែរ។
យ៉ាងណា លោកស្រី ស៊ីវលីង ចង់ឃើញប្រតិបត្តិករទេសចរណ៍ ចូលរួមលើកស្ទួយវិស័យអាហាររបស់ជាតិ ដោយបញ្ចូលមុខម្ហូបដែលជាអត្តសញ្ញាណខ្មែរ យ៉ាងហោចណាស់២ មុខ ទៅក្នុងបញ្ជីរាយនាមនៃកញ្ចប់មុខម្ហូបសម្រាប់អតិថិជនរបស់ពួកគេ។
មកទល់ពេលនេះ អង្គការយូណេស្កូ បានទទូលស្គាល់សម្បត្តិវប្បធម៌រូបី និងអរូបីយកម្ពុជាចំនួន៨រួចហើយចូលក្នុងបញ្ជីសម្បត្តិបេតិកភណ្ឌពិភពលោក។ សម្បត្តិវប្បធម៌រូបី និងអរូបីយទាំង៨នោះរួមមានតំបន់អង្គរវត្ត របាំព្រះរាជទ្រព្យ ល្ខោនស្រមោលស្បែក ឬល្ខោនស្បែកធំ ប្រាសាទព្រះវិហារ ល្បែងទាញព្រ័ត្រ ចាប៉ីដងវែង ប្រាសាទសំបូរព្រៃគុក និងល្ខោនខោលវត្តស្វាយអណ្ដែត៕
