ក្រសួងរៀបចំដែនដីនគររូបនីយកម្ម និងសំណង់ បានសន្យាចុះពិនិត្យផ្ទាល់លើដីមានជម្លោះនៅកោះកុង បន្ទាប់ពីតំណាងប្រជាពលរដ្ឋ១៩៧គ្រួសារឡើងមកតវ៉ានៅភ្នំពេញជាបន្តបន្ទាប់ ដោយចោទថា ក្រុមហ៊ុន ហេង ហ៊ុយ អេគ្រីខាល់ឈ័រគ្រុប បានរំលោភយកដីរបស់ពួកគេ។
ក្នុងសេចក្តីប្រកាសព័ត៌មានចុះថ្ងៃទី២២ ខែសីហា ឆ្នាំ២០១៩ ក្រសួងរៀបចំដែនដីបានសន្យាចុះពិនិត្យករណីវិវាទនោះដល់ទីតាំងផ្ទាល់ ដើម្បីធ្វើអត្តសញ្ញាណកម្មដីរបស់ក្រុមហ៊ុន អត្តសញ្ញាណកម្មដីពលរដ្ឋ និងអត្តសញ្ញាកម្មដីរបស់ពលរដ្ឋ១៩៧គ្រួសារដែលឡើងមកតវ៉ានោះ។
ក្រសួងបញ្ជាក់ថា បើសិនជាចុះពិនិត្យរកឃើញថា ទីតាំងដីមានវិវាទនោះស្ថិតនៅលើដីមានកម្មសិទ្ធិរបស់ក្រុមហ៊ុន ឬបុគ្គលផ្សេង ត្រូវដោះស្រាយតាមផ្លូវតុលាការ។ ប្រភពដដែលឲ្យដឹងទៀតថា ក្រុមពលរដ្ឋសន្យាលែងឡើងមកតវ៉ានៅភ្នំពេញទៀត និងទទួលខុសត្រូវចំពោះមុខច្បាប់ក្នុងករណីក្លែងការពិតក្នុងការតវ៉ា។
តំណាងពលរដ្ឋម្នាក់អ្នកស្រី អិន ធូ បានឯកភាពចំពោះក្រសួងដែលចុះពិនិត្យមើលដីជាក់ស្តែង ប៉ុន្តែថា អ្នកស្រីមិនយល់ស្របឲ្យក្រសួងជំរុញរឿងវិវាទដីធ្លីរបស់ពួកគាត់ទៅតុលាការនោះទេ ដោយថា ពួកគាត់ជាពលរដ្ឋក្រីក្រមិនអាចតតាំងក្តីជាមួយលោក ហេង ហ៊ុយ ឈ្នះឡើយ។
តំណាងពលរដ្ឋរូបនេះបន្តថា ប្រសិនបើពុំមានដំណោះស្រាយសមស្របណាមួយសម្រាប់អ្នកភូមិនោះទេ ពួកគេនៅតែបន្តឡើងមកតវ៉ានៅភ្នំពេញទៀត ដើម្បីរកអន្តរាគមន៍ពីអាជ្ញាធរជាតិពាក់ព័ន្ធផ្សេងទៀតជួយដោះស្រាយ។
អ្នកស្រី លើកឡើងថា«ខ្ញុំមិនបោះបង់ការតវ៉ាទេ ព្រោះអីខ្ញុំខំធ្វើតាំងពីដូនតាមកហេតុអីបានជាដីរបស់ខ្ញុំអត់មានប្លង់? ចុះហេតុអីឧកញ៉ាហេង ហ៊ុយ គាត់មកក្រោយសោះ ហេតុអីបានជាគាត់ មានប្លង់ជាន់លើដីពួកខ្ញុំ? ហេតុអីឲ្យខ្ញុំទៅតុលាការវិញ? អីចឹងមកក្រសួងរៀបចំដែនដីទៀតឲ្យគាត់ដោះស្រាយឲ្យពួកខ្ញុំមានភាពយុត្តិធម៌»។
មន្រ្តីសម្របសម្រួលអង្គការការពារសិទ្ធិលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា ករណីក្រសួងរៀបចំដែនដីសន្យាចុះពិនិត្យមើលដីជម្លោះជាក់ស្តែងនោះ វាជាសញ្ញាល្អមួយ ដើម្បីឈានទៅរកការដោះស្រាយបញ្ចប់វិវាទដីធ្លីជូនពលរដ្ឋ១៩៧គ្រួសារ។ ប៉ុន្តែលោក ជំរុញទៅមន្រ្តីក្រសួងត្រូវស្រាវជ្រាវឲ្យបានច្បាស់ លាស់ករណីវិវាទដីធ្លីរវាងពលរដ្ឋ និងក្រុមហ៊ុន ហេង ហ៊ុយនេះ។
លោក បន្ថែមថា«ប៉ុន្តែយើងទាមទារឲ្យក្រសួងហ្នឹងស្រាវជ្រាវឲ្យបានម៉ត់ចត់ គ្រប់ជ្រុងជ្រោយ ស្វែងរកមើលថា តើពលរដ្ឋពិតជាបានបាត់បង់ដីពិតមែនអត់ អំឡុងឆ្នាំ២០០៧ហ្នឹង? ហើយបើក្នុងករណីរកឃើញថា ដីពលរដ្ឋទាំងនោះស្ថិតក្នុងប្លង់របស់ ហេង ហ៊ុយ មែន ក្រសួងក៏ត្រូវមើលដែរថា តើការធ្វើប្លង់ហ្នឹងវាយ៉ាងម៉េច? ព្រោះថា តាមពលរដ្ឋបញ្ជាក់ថា មានបញ្ហាតាំងពីឆ្នាំ២០០៧ ហើយការធ្វើប្លង់របស់លោក ហេង ហ៊ុយ ហ្នឹងធ្វើឆ្នាំណា និងធ្វើហ្នឹងមានភាពត្រឹមត្រូវដែរទេ»។
ក្រុមពលរដ្ឋ១៩៧គ្រួសារ ដែលអះអាងថា កំពុងមានជម្លោះដីធ្លីជាមួយ ក្រុមហ៊ុន ហេង ហ៊ុយ អេគ្រីខាល់ឈ័រគ្រុបនៅស្រុកស្រែអំបិល ខេត្តកោះកុងនោះ ត្រូវបានក្រសួងរៀបចំដែនដីប្រកាសបដិសេធដោះស្រាយចំនួន៣ដងរួចមកហើយ ដោយថា ពលរដ្ឋទាំងនោះមិនជាប់ពាក់ព័ន្ធវិវាទដីធ្លីនោះទេ ហើយក្រសួងក៏បានប្រាប់ទៅសមត្ថកិច្ចឲ្យចាត់វិធានការផ្លូវច្បាប់ចំពោះពលរដ្ឋទាំងនោះទៀតផង។
បច្ចុប្បន្ននេះ ពលរដ្ឋ ១០នាក់ក្នុងចំណោមពលរដ្ឋទាំង ១៩៧ គ្រួសារនោះ ត្រូវបានតុលាការខេត្តកោះកុង កោះហៅជាបន្តបន្ទាប់ ទៅតាមបណ្តឹងរបស់ប្រធានក្រុមហ៊ុន ហេង ហ៊ុយ ដោយចោទប្រកាន់ពីបទបរិហារកេរ្តិ៍ជាសាធារណៈ៕
