អតីតមេដឹកនាំបក្សប្រឆាំង បានបន្តអំពាវនាវទៅកងកម្លាំងប្រដាប់អាវុធឲ្យប្រឆាំងនឹងលោកនាយករដ្ឋមន្ត្រី ហ៊ុន សែន នៅអំឡុងពេលលោកវិលត្រឡប់មកកាន់ប្រទេសកម្ពុជាវិញនាពេលខាងមុខនេះ។
លោក សម រង្ស៊ី អតីតប្រធានគណបក្សសង្គ្រោះជាតិ បានប្រកាសកាលពីថ្ងៃ១៦សីហាថា លោកនឹងវិលត្រឡប់ចូលប្រទេសកម្ពុជាវិញនៅថ្ងៃទី០៩ ខែវិច្ឆិកា ដែលចំខួប ៦៦ឆ្នាំនៃបុណ្យឯករាជ្យជាតិ។
មុនដំណើរវិលត្រឡប់មកកាន់កម្ពុជាវិញ លោក សម រង្ស៊ី ដែលប្រកាសខ្លួនឯងជាប្រធានស្ដីទីគណបក្សសង្គ្រោះជាតិនោះ កំពុងស្ថិតក្នុងដំណើរកៀរគរការគាំទ្រពីសំណាក់ពលរដ្ឋខ្មែរនៅប្រទេសអូស្ត្រាលី និងណូវែលហ្សេឡង់។
ក្នុងជំនួបជាមួយពលរដ្ឋខ្មែរនៅទីក្រុង Brisbane ប្រទេសអូស្ត្រាលី កាលពីថ្ងៃម្សិលមិញនេះ លោក សម រង្ស៊ី បានអំពាវនាវជាថ្មីទៀតទៅកងកម្លាំងប្រដាប់អាវុធ កុំឲ្យបាញ់ប្រហារលើពលរដ្ឋខ្មែរ ដែលនឹងចូលរួមទទួលដំណើរវិលត្រឡប់ចូលប្រទេសវិញរបស់លោក។
ក្នុងវីដេអូរយៈពេលជាង ១០នាទីដែលបង្ហោះនៅលើទំព័រហ្វេសប៊ុកផ្លូវការរបស់ខ្លួននៅថ្ងៃនេះ លោក សម រង្ស៊ី ថ្លែងថា៖ «បើហ៊ុន សែន បញ្ជាឲ្យទាហានបាញ់ប្រជាពលរដ្ឋស្លូតត្រង់ អត់បាញ់ទេ។ ខ្ញុំសូមអំពាវនាវឲ្យទាហានបែរចុងកាណុង បាញ់ទៅ ហ៊ុន សែន វិញ។ បើបាញ់យើង បាញ់វិញ មិនមែនមកធ្វើបាបយើង»។
អតីតមេបក្សប្រឆាំងរូបនេះ ដែលកំពុងរស់នៅនិរទេសខ្លួននៅឯក្រៅប្រទេសចាប់តាំងពីចុងឆ្នាំ២០១៥មកនោះ បានអំពាវនាវជារឿយៗទៅកងកម្លាំងប្រដាប់អាវុធ ឲ្យឈរនៅខាងប្រជាជន ឬក៏កុំស្ដាប់បញ្ជាមេកើយរបស់ពួកគេផងដែរចាប់តាំងពីចុងឆ្នាំ២០១៧មក បន្ទាប់ពីគណបក្សប្រឆាំងមួយនេះ ត្រូវបានតុលាការកំពូលសម្រេចរំលាយចោលក្រោមការចោទប្រកាន់ថាជាប់ពាក់ព័ន្ធនឹងសកម្មភាព «ក្បត់ជាតិ» របស់លោក កឹម សុខា។
លោក សម រង្ស៊ី ក៏ត្រូវក្រុមឧត្ដមសេនីយ៍ប្ដឹងផងដែរកាលពីចុងឆ្នាំ២០១៧កន្លងមក ជុំវិញការអំពាវនាវឲ្យកងទ័ពមិនស្ដាប់តាមបញ្ជារបស់ពួកគេ។
នគរបាលជាតិកម្ពុជា បានប្រកាសកាលពីចុងខែកក្កដាកន្លងមកថា នគរបាលជាតិនឹងចាត់វិធានការគ្រប់មធ្យោបាយដើម្បីតាមចាប់ខ្លួនអតីតមេដឹកនាំបក្សប្រឆាំងរូបនេះ ដើម្បីយកមកផ្ដន្ទាទោសទៅតាមច្បាប់៕
