អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន ថ្លែងថា កម្ពុជា ចង់ឃើញស្ថានការវឹកវរនៅទីក្រុងហុងកុងដែលកំពុងបន្តកើនឡើង វិលទៅរកភាពស្ងប់ស្ងាត់វិញ និងគាំទ្រចំណាត់ការរដ្ឋអំណាចចិនលើក្រុមបាតុករ តែអ្នកជំនាញថា នេះជាការផ្គាប់ផ្គន់ចិន។
ប្រធានអ្នកនាំពាក្យរដ្ឋាភិបាលរូបនេះ បានប្រាប់សារព័ត៌មានស៊ីនហួ នៅថ្ងៃសុក្រ សប្តាហ៍មុន ទៀតថា កម្ពុជា គាំទ្រនយោបាយចិនតែមួយ ហើយចាត់ទុកបញ្ហារបស់ហុងកុង គឺជាកិច្ចការផ្ទៃក្នុងរបស់ប្រទេសចិន។
លោក ផៃ ស៊ីផាន មានប្រសាសន៍ថា៖ «យើង[កម្ពុជា] ចង់ឃើញ ហុងកុងត្រឡប់ទៅរកស្ថិរភាពឡើងវិញ ដើម្បីឱ្យពលរដ្ឋអាចបន្តការរីករាយក្នុងជីវិតប្រចាំថ្ងៃ ហើយសេដ្ឋកិច្ចហុងកុងនឹងបន្តរីកចម្រើនកាន់តែរឹងមាំ»។
បន្ថែមពីនេះ លោកក៏បានថ្លែងអំពាវនាវ បាតុករហិង្សានានានៅហុងកុងបញ្ឈប់សកម្មភាពក្រៅច្បាប់របស់ពួកគេ និងគួរតែគោរពការសម្រេចចិត្តភាគច្រើនរបស់ពលរដ្ឋនៃមជ្ឈមណ្ឌលហិរញ្ញវត្ថុតំបន់អាស៊ីដែលចង់បានសន្តិភាព ស្ថិរភាព និងការអភិវឌ្ឍឆ្ពោះទៅមុខ។
អ្នកវិភាគ និងអ្នកជំនាញគោលនយោបាយអន្តរជាតិ លោក អៀ សុផល បានចាត់ទុកការលើកឡើងរបស់អ្នកនាំពាក្យរដ្ឋាភិបាលកម្ពុជា ថាជាការបង្ហាញពីការគាំទ្រដូចគ្នារបស់រដ្ឋាភិបាលក្រុងប៉េកាំង និងក្រុងភ្នំពេញ លើចំណាត់ការបង្រ្កាបទៅលើបាតុកម្មដោយសន្តិវិធីពីមហាជនហុងកុង។
លោក អៀ សុផល បន្ថែមថា កម្ពុជា តែងបំពេញចិត្តរដ្ឋាភិបាលទីក្រុងប៉េកាំង ដើម្បីទទួលបានមកវិញនូវប្រយោជន៍ផ្សេងៗសម្រាប់រដ្ឋបាលរបស់ខ្លួន។
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) ថាលោកមិនភ្ញាក់ផ្អើលនោះទេចំពោះ សេចក្តីប្រកាសគាំទ្រម្តងហើយម្តងទៀតលើនយោបាយចិនពីរដ្ឋាភិបាលកម្ពុជា និងចាត់ទុកថា នោះបង្ហាញពីការពឹងផ្អែកលើរដ្ឋាភិបាលក្រុងប៉េកាំង។
លោក ផូល ឆាំប៊ឺ ឱ្យដឹងតាមសារអេឡិចត្រូនិកថា៖ «រដ្ឋាភិបាលលោក ហ៊ុន សែន នឹងនិយាយអ្វីៗបំពេញចិត្តចិន។ ដូច្នេះ យើងនឹងមិនភ្ញាក់ផ្អើលទៅលើការអធិប្បាយរបស់លោក ស៊ីផាន អំពីជំហរកម្ពុជាទេ»។ ពាក្យរបស់គាត់ ឆ្លុះបញ្ចាំងពីការបង្គាប់បញ្ជារបស់ចិន»។
អស់រយៈពេល១២ សប្តាហ៍មកហើយដែលពលរដ្ឋហុងកុងរាប់សិបម៉ឺននាក់បានចុះផ្លូវតវ៉ា រហូតឈានដល់បិទព្រលានយន្តហោះតំបន់ស្វយ័តនេះទៀតផង។ ចលនាបាតុកម្មនេះ ផ្តើមចេញពីការទាមទារឲ្យទម្លាក់ចោលសេចក្តីស្នើច្បាប់បត្យាប័នដែលអាចឲ្យរដ្ឋាភិបាលក្រុងប៉េកាំងស្នើបញ្ជូនអ្នកទោសពីហុងកុងទៅកាត់ក្តីនៅចិនដីគោក។
ទាក់ទងទៅនឹងរឿងនេះ រដ្ឋាភិបាលបានចេញសេចក្តីប្រកាសនៅថ្ងៃទី ១៧ សីហា គាំទ្ររាល់ចំណាត់ការចាំបាច់នានារបស់រដ្ឋអំណាចចិន ក្នុងការរក្សាសន្តិភាពនៅក្រុងហុងកុង និងនយោបាយចិនតែមួយ៕
