សហជីព និងសមាគមចំនួន៤បានស្នើទៅព្រះមហាក្សត្រសុំឱ្យព្រះអង្គជួយអន្តរាគមន៍សម្របសម្រួលជាមួយអ្នកនយោបាយកំពុងទាស់គ្នា ដើម្បីបញ្ជៀសបញ្ហាផ្សេងៗនៅក្នុងសង្គមជាតិ និងអាចរក្សាបានប្រព័ន្ធអនុគ្រោះពន្ធ ដែលផ្តល់ជាការងារដល់ប្រជាពលរដ្ឋ។
ក្នុងលិខិតរួមចុះថ្ងៃទី០៤ ខែកញ្ញា សហព័ន្ធសហជីពកម្ពុជា សហភាពសហជីពកម្ពុជា សមាគមគ្រួបង្រៀនឯករាជ្យ និងសហព័ន្ធនិស្សិតបញ្ញាវន្តកម្ពុជា លើកឡើងពីវិបត្តិនយោបាយ ដែលកើតចេញពីភាពខ្វែងគំនិតគ្នារវាងមេដឹកនាំនយោបាយធំៗ ហើយដែលអាចនឹងធ្វើឱ្យពលរដ្ឋរាប់លានប្រឈមបញ្ហាអត់ការងារធ្វើ ដោយសារការផ្តាច់ប្រព័ន្ធអនុគ្រោះពន្ធ EBA ពីសហភាពអឺរ៉ុប និង GSP ពីសហរដ្ឋអាមេរិក។
ប្រធានសហភាពសហជីពកម្ពុជា លោក រ៉ុង ឈុន លើកឡើងថា ការចាប់ខ្លួនមេដឹកនាំអតីតបក្សប្រឆាំង និងការរំលាយបក្សនេះ ក្នុងឆ្នាំ ២០១៧ ដែលនាំឱ្យការថ្កល់ទោសពីសហគមន៍អន្តរជាតិ និងការដកប្រព័ន្ធអនុគ្រោះពន្ធ EBA និង GSP ពីកម្ពុជា។
លោកបន្តថា បញ្ហាទាំងនេះកំពុងធ្វើឱ្យកម្មករកម្មការិនីជាង ៧០ម៉ឺននាក់ ប្រឈមភាពគ្មានការងារធ្វើ ហើយថាមានតែអង្គព្រះមហាក្សត្រទេដែលអាចប្រើបុព្វសិទ្ធិពិសេសជួយស្តារស្ថានការនេះបាន។
លោក រ៉ុង ឈុន ៖ «បញ្ហាទាំងអស់ហ្នឹងហើយ [ការដកប្រព័ន្ធអនុគ្រោះពន្ធ EBA និង GSP] ដែលយើងមើលឃើញថាវាមានទំហំធំ ហើយអីចឹងមានតែអង្គព្រះមហាក្សត្រទេ មានដើរតួនាទីសំខាន់ក្នុងការសម្របសម្រួលបញ្ហាទាំងអស់នេះ»។
ប្រធានសមាគមគ្រួបង្រៀនឯករាជ្យកម្ពុជា លោកស្រី អ៊ុក ឆាយ៉ាវី ចង់ឃើញអ្នកនយោបាយខ្មែរចូលតុចរចាសម្របសម្រួលគ្នាឱ្យបានឆាប់ ព្រោះដំណើរការបិទប្រព័ន្ធអនុគ្រោះពន្ធ EBA ជិតដល់ថ្ងៃបញ្ចប់ហើយ ហើយថា បើរឿងហ្នឹងកើតឡើងមែន សេដ្ឋកិច្ចកម្ពុជានឹងធ្លាក់ចុះ ហើយវានឹងប៉ះពាល់ធ្ងន់ធ្ងរដល់ពលរដ្ឋរាប់លាន រួមទាំងគ្រូបង្រៀនផងដែរ។
លោកស្រី ឆាយ៉ាវី ៖ «ការដែលយើងដាក់[លិខិតស្នើ]ទៅព្រះមហាក្សត្រដោយយោងទៅលើប្រទេសកម្ពុជាយើងមានស្តេច។ អីចឹងយើងត្រូវតែដាក់ទៅដើម្បីឱ្យព្រះអង្គគាត់ជួយអន្តរគមន៍ជួយឱ្យខ្មែរបង្រួបបង្រួមជាតិឡើងវិញ។ កុំឱ្យបែកបាក់បែបនេះ។ យើងអត់ចង់ឃើញខ្មែរបែកបាក់ទេ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា សំណើមេដឹកនាំសហជីពខាងលើ ជារឿងមិនអាចទៅរួច ព្រោះកម្ពុជា មិនមានបត្តិនយោបាយអ្វីនោះទេ។
លោក សុខ ឥសាន៖ «បច្ចុប្បន្ន កម្ពុជាគ្មានវិបត្តិនយោបាយទេ គឺមានតែអ្នកនយោបាយរត់ចោលស្រុក»។
លោក លើកឡើងបន្ថែមថា សព្វថ្ងៃពលរដ្ឋខ្មែរមានសិទ្ធិសេរីភាពដើរហើរ និងប្រកបមុខរបរចិញ្ចឹមជីវិតដោយគ្មានការភ័យខ្លាចតាមធម្មតា ហើយការលើកនោះ គ្រាន់ជាការយល់ឃើញរបស់ពួកគេ មិនអាចប្រើជាមូលដ្ឋានក្នុងការសម្រេចចិត្តរបស់អង្គព្រះមហាក្សត្រ។
ព្រះអង្គម្ចាស់ ស៊ីសុវត្ថិ ធម្មិកោ អតីតទីប្រឹក្សាព្រះមហាវីរៈក្សត្រមានបន្ទូលថា សំណើស្វែងរកការសម្របសម្រួលនយោបាយពីព្រះមហាក្សត្រ ជារឿងពិបាកនឹងទៅរួច ព្រោះស្ថាប័នមន្រ្តីរាជការគ្រប់ជាន់ថ្នាក់នៅទូទាំងប្រទេសកំពុងដំណើរការធម្មតា។
ព្រះអង្គម្ចាស់ មានបន្ទូលបន្ថែមថា ដើម្បីអាចឱ្យព្រះមហាក្សត្រចេញព្រះភ័ក្រសម្របសម្រួល លុះត្រាតែអ្នកនយោបាយទាំងទ្វេភាគី មានបក្សកាន់អំណាច និងបក្សប្រឆាំង យល់ស្របគ្នាលើបញ្ហាដែលកំពុងកើតឡើង។
ព្រះអង្គម្ចាស់ ធម្មិកោ៖ «វាពិបាកដែរ ពិបាកចំពោះព្រះមហាក្សត្រហ្នឹងដែរ ពីព្រោះអត់មានមូលមាត់គ្នាៗ។ ឧបមាបើសិនជារាជរដ្ឋាភិបាល ហើយនិងបក្សប្រឆាំងរួមគ្នាថាឥឡូវយើងមានវិបត្តិនយោបាយ យើងត្រូវតែរកដំណោះស្រាយអីចឹងទៅ ដល់ពេលហ្នឹង ព្រះមហាក្សត្រលោកអាចនឹងអន្តរាគមន៍ ក្នុងនាមលោកជាអាជ្ញាកណ្តាល ស្របទៅតាមការចែងនៅក្នុងរដ្ឋធម្មនុញ្ញារបស់យើង»។
អ្នកនយោបាយគណបក្សកាន់អំណាច និងគណបក្សសង្គ្រោះជាតិកាន់តែប្រឈមមុខដាក់គ្នាខ្លាំង នៅពេលដែលលោក សម រង្ស៊ី ប្រកាសថា នឹងវិលចូលប្រទេសកម្ពុជាវិញនៅថ្ងៃទី៩ខែវិច្ឆិកា។ លោក សម រង្ស៊ីបញ្ជាក់ថា នឹងនាំពលរដ្ឋចាប់ខ្លួនលោក ហ៊ុន សែន ចំណែកលោក ហ៊ុន សែន វិញបញ្ជាក់ថា ឱ្យតែលោក សម រង្ស៊ីមកដល់កម្ពុជាភ្លាមលោកនឹងចាប់ដាក់ពន្ធនាគារ។