អ្នកស្រាវជ្រាវពីការអភិវឌ្ឍន៍សង្គម លោក មាស នី ជំរុញដល់ប្រជាពលរដ្ឋបំពេញតួនាទីខ្លួនឱ្យសកម្មឡើងក្នុងការចូលរួមដាក់សម្ពាធលើអ្នកនយោបាយឱ្យងាកមកចរចាគ្នាដោះស្រាយបញ្ហា ជៀសវាងម្ខាងៗពឹងផ្អែកលើបរទេសខូចប្រយោជន៍ជាតិ។
ក្នុងវេទិកាវិទ្យុអាស៊ីសេរីកាលពីល្ងាចម្សិលមិញ លោកមាស នី លើកឡើងថា កម្ពុជាកំពុងមានជម្លោះនយោបាយធ្ងន់ធ្ងរឈានដល់ចំណុចទាល់ច្រក ដែលបក្សកាន់អំណាច និង អតីតបក្សប្រឆាំងមិនព្រមជជែកគ្នា ហើយគ្មានអ្នកណាអាចជួយសម្របសម្រួលបាន។ លោក អំពាវនាវឱ្យពលរដ្ឋចូលរួមឱ្យសកម្មឡើងជាកម្លាំងមហាជនក្នុងការជំរុញឱ្យអ្នកនយោបាយទាំងនេះជជែកគ្នា។
លោក មាស នី៖«កម្លាំងមហាជននេះ មិនមែនដើម្បីផ្តួលរំលំរដ្ឋាភិបាលទេ ប៉ុន្តែព្យាយាមធ្វើយ៉ាងណាដាក់សម្ពាធលើគណបក្សនយោបាយដែលកំពុងមានវិវាទគ្នា ឱ្យទទួលស្គាល់និងដោះស្រាយបញ្ហាដោយសន្តិវិធី។»
លោក សម រង្ស៊ី ដែលកំពុងរស់នៅក្រៅប្រទេស ប្រកាសវិលចូលក្នុងប្រទេសវិញនៅថ្ងៃទី៩ខែវិច្ឆិកា ដើម្បីដឹកនាំប្រជាពលរដ្ឋចាប់ខ្លួនលោក ហ៊ុន សែន ។ចំណែកលោក ហ៊ុន សែន បញ្ជាក់ថា ឱ្យតែលោក សម រង្ស៊ី វិលចូលដល់កម្ពុជាភ្លាម លោក នឹងចាប់ដាក់ពន្ធនាគារភ្លាម។ ទន្ទឹមនឹងនេះ អតីតមន្ត្រី និងសកម្មជនបក្សប្រឆាំងត្រូវចាប់ខ្លួនជាបន្តបន្ទាប់ពាក់ព័ន្ធការប្រមូលគ្នាត្រៀមទទួលលោក សម រង្ស៊ី។