រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ អះអាងថា មូលហេតុដែលនាំឱ្យមានអ្នកពិសាគ្រឿងស្រវឹងច្រើន ឬរហូតដល់ស្រវឹងជោកជាំនោះ មិនពាក់ព័ន្ធជាមួយការផ្សព្វផ្សាយពាណិជ្ជកម្មតាមរូបភាពផ្សេងៗនោះទេ ហើយម្យ៉ាងទៀតនៅកម្ពុជាបច្ចុប្បន្ន ក៏មិនទាន់មានច្បាប់ហាមការផ្សព្វផ្សាយគ្រឿងស្រវឹងដែរ។
រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ ប្រាប់ក្រុមអ្នកសារព័ត៌មានក្រោយសន្និសីទសារព័ត៌មានស្តីអំពីដំណើរធម្មយាត្រាក្នុងដែនដីប្រទេស ៥តាមដងទន្លេមេគង្គ កាលពីព្រឹកថ្ងៃទី១៨ ខែកញ្ញា នៅសណ្ឋាគារមួយកន្លែងក្នុងរាជធានីភ្នំពេញភ្នំពេញ។
លោក ខៀវ កាញារីទ្ធ៖ «យើងត្រូវចាំថា មិនមែនដោយសារតែផ្សាយពាណិជ្ជកម្មគ្រឿងស្រា បានមនុស្សផឹកទេ។ គឺខ្ញុំនិយាយចឹង តែគ្រឿងញៀនអត់មានអ្នកណាផ្សាយសោះ ចាប់ដាក់គុគទៀត ទប់មិនបាន។ យើងគិតមើល។ គឺវាបញ្ហាគ្រួសារ បញ្ហាសង្គម បញ្ហាការអប់រំចេះដឹង យើងមើលអ្នកដែលរៀនខ្ពស់ ដែលមានចំណេះរៀនសូត្រខ្ពស់ កម្រស្រវឹង មកផឹកទៅប្រកាច់ប្រកិនដេកតាមផ្លូវណាស់។ ចឹងជូនកាលគាត់ ដោយសារគាត់គិតថា គាត់ក្រ គាត់លំបាក គាត់មិនដឹងធ្វើអី គាត់ផឹក ហើយដូចអ្នកគ្រឿងញៀនចឹងដែរ ជូនកាលគ្នាចឹង។ ចឹងអាបញ្ហាសង្គមដែលធំច្រើនៗដែលយើងត្រូវគិតរួម យ៉ាងណាយើងគិតតែមួយជ្រុងចឹងទៅអត់រួចទេ»។
លោកបន្ថែមថា កន្លងមកខាងក្រសួងក៏ជំរុញឱ្យកាត់បន្ថយការឃោសនាគ្រឿងស្រវឹង តាមប៉ុស្តិ៍ទូរទស្សន៍ក្នុងស្រុក ដោយបានហាមមិនឱ្យផ្សាយនៅម៉ោងមាសជាម៉ោងដែលមានអ្នកទស្សនាច្រើនគឺម៉ោង ៧-៨ យប់ ។
ពាក់ព័ន្ធនឹងបញ្ហាដែលបង្កឡើងដោយគ្រឿងស្រវឹង លោក កាញ្ញារិទ្ធិ ប្រាប់ថា ពលរដ្ឋម្នាក់ៗដែលគោរពពុទ្ធសាសនា គួរតែមានភាពទទួលខុសត្រូវលើទង្វើខ្លួន ដែលដោយសារការសេពគ្រឿងស្រវឹង។
លោក ខៀវ កាញារីទ្ធ៖ «ម្នាក់ៗបើថាខ្លួនឯងកាន់ពុទ្ធសាសនាកុំផឹកទៅបានហើយ […] និយាយរួមម្នាក់ៗត្រូវយល់ខ្លួនឯង។ បើផឹកហើយស្រវឹងទៅវៃប្រពន្ធកូនវៃអីមានទោសហើយ ជាប់គុកហើយអាហ្នឹង។ បើកឡានបុកគេមានទោសហើយ ត្រូវដឹងខ្លួនឯងហើយតើ។ គេប្រាប់ថាផឹកត្រូវមានការទទួលខុសត្រូវ បើខ្លាចកុំផឹកហ្មង។ អត់មានពីណាបង្ខំទេ»។
អ្នកស្រាវជ្រាវពីការអភិវឌ្ឍន៍សង្គមលោក ប៉ា ចន្ទរឿន លើកឡើងថា បច្ចុប្បន្នគ្រឿងស្រវឹងគឺជាមូលហេតុចំបងមួយដែលនាំឱ្យមានគ្រោះថ្នាក់ចរាចរណ៍ ធ្វើឱ្យកើតអំពើហិង្សា និងប៉ះពាល់ដល់សុខភាពជាដើម។ លោកបន្តថា ទោះជាកម្ពុជាមិនទាន់មានច្បាប់គ្រប់គ្រងគ្រឿងស្រវឹង ប៉ុន្តែរដ្ឋាភិបាលគួរតែបង្កើនវិធានការកាត់បន្ថយផ្សព្វផ្សាយគ្រឿងស្រវឹង។
សម្រាប់លោក ប៉ា ចន្ទរឿន យល់ថា ការផ្សព្វផ្សាយគ្រឿងស្រវឹងអាចជាមូលហេតុដែលជំរុញឱ្យមានការការទទួលទាន និងបានបង្កជាបញ្ហាផ្សេងៗ។
លោក ប៉ា ចន្ទរឿន៖ «បើយើងនិយាយពីផលវិបាក ហើយកាត់បន្ថយការសេពគ្រឿងស្រវឹង និងបង្កើនការអប់រំពីផលវិបាកនៃការសេពគ្រឿងស្រវឹងក៏ដូចជាការផ្សព្វផ្សាយពាណិជ្ជកម្មតាមវិទ្យុតាមទូរទស្សន៍។ ជាពិសេសដកស្លាកផ្សព្វផ្សាយស្រាបៀរ និងគ្រឿងស្រវឹងដទៃទៀត នៅតាមដងផ្លូវនៅតាមទីប្រជុំជនខ្ញុំជឿថា អារម្មណ៍ពលរដ្ឋយើងនឹងឃ្លាតឆ្ងាយពីកែវ ដប ស្រា និងគ្រឿងស្រវឹងផ្សេងៗ»។
របាយការណ៍ចេញផ្សាយកាលពីថ្ងៃទី៥ ខែមេសា សិក្សាពីអ្នកជំនាញនៅសាកលវិទ្យាល័យ Oxford របស់អង់គ្លេស និងសាកលវិទ្យាល័យ Peking របស់ចិន។ ការសិក្សានេះបញ្ជាក់ថា អ្នកពិសាស្រាក្នុង១ថ្ងៃ ១ ឬ២កែវ (កែវតូច សំដៅលើស្រាក្រហម) ប្រឈមកើតជំងឺដាច់សរសៃឈាមខួរក្បាល១០ ទៅ១៥ភាគរយ ហើយបើពិសា៤កែវ អាចប្រឈមដាច់សរសៃឈាមខួរក្បាលដល់ទៅ៣៥ភាគរយ។