អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ប្រកាសមិនគាំទ្រលោក សម រង្ស៊ី កៀងគប្រជាពលរដ្ឋឱ្យចូលរួមដើម្បីផ្តួលរំលំរដ្ឋាភិបាលដែលកំពុងដឹកនាំដោយលោក ហ៊ុន សែននោះទេ។
ការថ្លែងរបស់មន្រ្តីជាន់ខ្ពស់ទទួលបន្ទុកផ្នែកសិទ្ធិមនុស្សអង្គការសហប្រជាជាតិរូបនេះ គឺធ្វើឡើងនៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤២នៅទីក្រុងហ្សឺណែវ ប្រទេសស្វីស។
លោកស្រី រ៉ូណា ស្មីត មានប្រសាសន៍ថា៖ «លោក សម រង្ស៊ី សហស្ថាបនិកគណបក្សសង្រ្គោះជាតិ ដែលកំពុងរស់នៅនិរទេសខ្លួនចាប់ពីឆ្នាំ២០១៥ បានបន្តប្រើភាសាប្រទូសសារាយប្រឆាំងលោកនាយករដ្ឋមន្រ្តី ហ៊ុន សែន និងអ្នកដទៃ រាប់បញ្ចូលទាំងការអំពាវនាវឱ្យពលរដ្ឋកម្ពុជា ផ្តួលរំលំរដ្ឋាភិបាល ដែលទាំងនេះ ខ្ញុំប្រាកដជាមិនគាំទ្រដាច់ខាត»។
យ៉ាងណា បេសកជនសិទ្ធិមនុស្សរូបនេះ លើកឡើងថា សេរីភាពក្នុងការជួបជុំដោយសន្តិវិធីពីសំណាក់អ្នកគាំទ្រអតីតមេបក្សប្រឆាំង រាប់បញ្ចូលថ្ងៃដែលលោក សម រង្ស៊ី ប្រកាសថានឹងវិលចូលកម្ពុជាវិញក្តី គួរតែត្រូវបានអនុញ្ញាត។
ក្នុងកិច្ចប្រជុំថ្នាក់អន្តរជាតិប្រចាំឆ្នាំនោះដែរ លោកស្រី រ៉ូណា ស្មីត ក៏បានទាមទារឱ្យរដ្ឋាភិបាលកម្ពុជា ដោះលែងលោក កឹម សុខា ដែលបន្តរស់នៅក្នុងស្ថានភាពជាប់ឃុំខ្លួន និងអតីតអ្នកគាំទ្របក្សរបស់លោក ដែលលោកស្រីចាត់ទុកការចាប់ខ្លួនទាំងនោះធ្វើឡើងក្រោមហេតុផលនយោបាយ ជាបន្ទាន់ និងដោយឥតលក្ខខណ្ឌ។
ពាក់ព័ន្ធនឹងការលើកឡើងរបស់អ្នករាយការណ៍ពិសេសអង្គការសហប្រជាជាតិនេះ អនុប្រធានអតីតគណបក្សសង្រ្គោះជាតិ លោកស្រី មូរ សុខហួរ ឱ្យដឹងថា លោក សម រង្ស៊ី បានផ្ញើលិខិតបញ្ជាក់ពីជំហរគណបក្សសង្គ្រោះជាតិក្នុងដំណើរមាតុភូមិនិវត្តរបស់លោក ថ្ងៃទី៩ វិច្ឆិកា ទៅកាន់អង្គការសហប្រជាជាតិរួចហើយ។
លោកស្រី មូរ សុខហួរ បន្ថែមថា រាល់ការទាមទារឱ្យមានការផ្លាស់ប្តូររបបដឹកនាំនៅក្នុងប្រទេសកម្ពុជា គឺធ្វើឡើងដោយអហិង្សា និងដោយសន្តិវិធី តាមរយៈការបោះឆ្នោតត្រឹមត្រូវ សេរី និងយុត្តិធម៌ ដោយមានវត្តមានគណបក្សប្រឆាំងចូលរួម។
លោកស្រី មូរ សុខហួរ មានប្រសាសន៍ប្រាប់ វីអូឌី តាមប្រព័ន្ធ Telegram ថា៖«យើងមិនដែលនិយាយអំពីហិង្សាទេ។ ការងើបឈររបស់ប្រជាពលរដ្ឋដើម្បីឱ្យមានការផ្លាស់ប្តូររបប គឺជាការងើបឈរដោយសន្តិវិធី។ លើសពីនេះទៅទៀត លោកប្រធានស្តីទី សម រង្ស៊ី បានអំពាវនាវឱ្យកងប្រដាប់អាវុធ កុំបាញ់ប្រហារប្រជាពលរដ្ឋ ឱ្យការពារប្រជាពលរដ្ឋ។ ផ្ទុយទៅវិញ លោក ហ៊ុន សែន ទេដែលបានមានប្រសាសន៍ច្បាស់ណាស់ឱ្យកងប្រដាប់អាវុធមកបាញ់ប្រហារទៅលើលោកប្រធាន សម រង្ស៊ី»។
នៅថ្ងៃទី ១៦ សីហា ២០១៩ លោក សម រង្ស៊ី បានប្រកាសកាលបរិច្ឆេទ នៃការវិលចូលស្រុករបស់លោក ថានឹងធ្វើឡើងនៅថ្ងៃបុណ្យឯករាជ្យរបស់កម្ពុជា ៩ វិច្ឆិកា ខាងមុខ ដើម្បីប្រមែប្រមូលអ្នកគាំទ្រផ្តួលរំលំលោកនាយករដ្ឋមន្រ្តី ហ៊ុន សែន ពីអំណាច។ ឆ្លើយតបការប្រកាសនេះ លោក ហ៊ុន សែន ប្រកាសថានឹងចាប់លោក សម រង្ស៊ី ឱ្យបានក្នុងរយៈពេល២៤ម៉ោង ហើយព្រមានចាត់វិធានការផ្លូវច្បាប់ទៅលើជនណាដែលគាំទ្រ និងទទួលដំណើរវិលត្រឡប់របស់អតីតមេបក្សប្រឆាំង៕
