ស្នងការនគរបាលរាជធានីភ្នំពេញ លោក ស ថេត បានឱ្យដឹងថា ខាងសមត្ថកិច្ចកំពុងបើកការស៊ើបអង្កេតករណីហិង្សាលើអតីតចៅសង្កាត់នៅកោះដាច់ មកពីគណបក្សសង្រ្គោះជាតិដែលត្រូវបានរំលាយ និងអតីតប្រធានក្រុមអង្គរក្សអតីតមេបក្សនេះ។
ប្រធានក្រុមអង្គរក្សលោក សម រង្ស៊ី ឈ្មោះ ពូក ចិន្តា កាលពីថ្ងៃទី២២ កញ្ញា ត្រូវបានជនមិនស្គាល់មុខលបវាយឆ្មក់ពីក្រោយខ្នងដោយដំបងដែកបណ្តាលរងរបួសបែកក្បាល។ នៅថ្ងៃទី២៥ ក្នុងខែដដែល ករណីស្រដៀងគ្នាបានកើតលើអតីតចៅសង្កាត់កោះដាច់មកពីអតីតគណបក្សសង្គ្រោះជាតិ លោក ស៊ិន បូណា អាយុ ៥៩ ឆ្នាំ បណ្តាលឱ្យបាក់ដៃឆ្វេង និងជំាស្មា។ ករណីទាំងពីរ ត្រូវជនរងគ្រោះសង្ស័យពាក់ព័ន្ធនឹងអំពើហិង្សានយោបាយ។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ស ថេត លើកឡើងថា សមត្ថកិច្ចកំពុងបើកការស៊ើបអង្កេតករណីហិង្សាទាំងពីរតាមនិតិវិធី និងថាលោកមិនអាចសន្និដ្ឋានពីមូលហេតុនៃករណីទាំងនោះជាមុនទេ ដរាបណាមិនទាន់មានភស្តុតាងច្បាស់លាស់។
លោក ស ថេត មានប្រសាសន៍ ប្រាប់ វីអូឌី ថា៖ «យើងបានខិតខំធ្វើការស្រាវជ្រាវហើយ ដើម្បីកំណត់មុខសញ្ញាឱ្យបានច្បាស់លាស់។ បាទព្រោះថាតើវាជាក្រុមក្មេងទំនើង ឬក៏ជាការទំនាស់បុគ្គល។ យើងបានធ្វើការស្រាវជ្រាវឱ្យបានល្អិតល្អន់តិច ព្រោះយើងមិនអាចសន្និដ្ឋានត្រួសៗថាជារឿងពាក់ព័ន្ធនឹងស្អីទេ។ ដូច្នេះយើងត្រូវស្រាវជ្រាវតើគាត់មានជម្លោះជាមួយពីណាខ្លះពីកន្លងទៅ ឬមួយណែមានក្រុមក្មេងទំនើងអីទេ បង្កបញ្ហាអីយ៉ាងម៉េច»។
កូនស្រីលោក ស៊ិន បូណា កញ្ញា បូណា សុភា មិនជឿករណីហិង្សាលើឪពុករបស់ខ្លួនកើតឡើងដោយសារទំនាស់បុគ្គលឡើយ ដោយសំអាងថា ឪពុកខ្លួនមិនធ្លាប់មានបញ្ហាជាមួយអ្នកណាកន្លងមក។ កញ្ញា បន្ថែមថា ខ្លួនបារម្ភពីសុវត្ថិភាពឪពុកនៅថ្ងៃអនាគត និងសំណូមពរសមត្ថកិច្ចវែកមុខជនដៃដល់មកផ្តន្ទាទោសតាមច្បាប់។
កញ្ញា បូណា សុភា និយាយថា៖«ខ្ញុំអត់នឹកស្មានដល់ថានឹងកើតហេតុរឿងទាំងអស់ហ្នឹងសម្រាប់គ្រួសារខ្ញុំទេ។ ចឹងបើនិយាយពីអារម្មណ៍វិញគឺខ្ញុំសោកស្តាយខ្លាំង ហើយក៏ខ្ញុំសុំធ្វើការសំណូមពរទៅខាងបងៗសមត្ថកិច្ចសុំឱ្យជួយវែកមុខរកមុខជនដៃដល់ដែលបានវៃគាត់[លោក ស៊ិន បូណា]។ ព្រោះយើងមានភស្តុតាងខ្លះៗ ដូចជារូបភាព ហើយនឹងសកម្មភាពមួយចំនួនដូចជាគាត់មានដំបងដែក ហើយមានកាំភ្លើង មានអីចឹង»។
អតីតប្រធានក្រុមអង្គរក្ស លោក សម រង្ស៊ី លោក ពូក ចិន្តា ដែលថ្នេររបួសក្បាលរបស់លោកទើបកាត់ចេញម្សិលមិញយល់ថា ករណីហិង្សាលើរូបលោក គឺជាការគម្រាមកំហែងដល់អ្នកគាំទ្រអតីតមេបក្សប្រឆាំងដែលប្រកាសម្តងហើយម្តងទៀតថានឹងវិលចូលស្រុកថ្ងៃទី៩ វិច្ឆិកា។
លោក ចិន្តា បន្ថែមថា លោកគ្មានជំនឿលើសមត្ថកិច្ចនឹងអាចវែកមុខជនដៃដល់ដែលលោកចាត់ទុកប៉ងធ្វើឃាតលើរូបលោក មកធ្វើការកាត់ទោសឡើយ ដោយសម្អាងលើករណីកើតឡើងកន្លងមកចំពោះអតីតសកម្មជន និងមន្រ្តីបក្សប្រឆាំង។
លោក ពូក ចិន្តា ប្រាប់ថា៖«យើងវាមិនជឿថា វាគ្មានរកឃើញទេ ព្រោះអីអាគេវៃនៅ បងបូរ៉ា[បូណា]នៅអីណានុះ[នៅផ្លូវជាតិលេខ៦A] មើលមានភស្តុតាងហើយរកមិនឃើញ នាំខ្ញុំមើលតែពីក្រោយវារក បែបរកមិនឃើញទេបងអើយ»។
លោកសំណូមពរឱ្យខ្មែរបញ្ឈប់ការប្រើប្រាស់អំពើហិង្សារវាងខ្មែរ និងខ្មែរដូចគ្នា បើទោះមាននិន្នាការនយោបាយខុសគ្នាក្តី៕
