តុលាការរាជធានីភ្នំពេញ បានចេញដីកាចាប់ខ្លួន លោក សម រង្ស៊ី និងភរិយាពីបទប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលក្រោយលោក សម រង្ស៊ី អំពាវនាវកងកម្លាំងប្រដាប់អាវុធឱ្យចូលរួមជាមួយគាត់ក្នុងការទម្លាក់លោកនាយករដ្ឋមន្រ្តី ហ៊ុន សែន នៅថ្ងៃទី៩ វិច្ឆិកាខាងមុខ។
យោងតាមសេចក្តីប្រកាសពីសាលាដំបូងរាជធានីចេញផ្សាយថ្ងៃម្សិលមិញ ចៅក្រមស៊ើបសួរសាលាដំបូងបានចេញដីកាបញ្ជាឱ្យចាប់ខ្លួនអតីតមេដឹកនាំបក្សប្រឆាំង និងភរិយាគឺលោកស្រី ជូឡុង សូមួរ៉ា រួមទាំងមន្រ្តីជាន់ខ្ពស់របស់លោក ៧រូបទៀត រួមមាន លោក អេង ឆៃអ៊ាង លោកស្រី មូរ សុខហួរ លោក អ៊ូ ច័ន្ទឫទ្ធិ លោក ហូរ វ៉ាន់ លោក ឡុង រី លោក ម៉ែន សុថាវរិន្ទ្រ និងលោក នុត រំដួល។
យោងតាមសេចក្តីប្រកាសនោះដែរ តុលាការក្រុងភ្នំពេញចោទថ្នាក់ដឹកនាំអតីតបក្សប្រឆាំង៩រូប ថាបានអំពាវនាវកងកម្លាំងប្រដាប់អាវុធឱ្យចូលរួមក្នុងផែនការធ្វើរដ្ឋប្រហារទម្លាក់លោកនាយករដ្ឋមន្រ្តី ហ៊ុន សែន ពេលលោក សម រង្ស៊ី វិលចូលកម្ពុជាថ្ងៃ ៩ វិច្ឆកាខាងមុខ។
អ្នកនាំពាក្យអតីតបក្សសង្គ្រោះជាតិ លោកស្រី មូរ សុខហួរ បានលើកឡើងថា លោកស្រីមិនចាប់អារម្មណ៍ចំពោះដីកាចោទប្រកាន់ចេញពីតុលាការដែលលោកស្រីចាត់ទុកថា ជាតុលាការនយោបាយ។ លោកស្រីបន្ថែមថា មាតុភូមិនិវត្តន៍របស់លោក សម រង្ស៊ី និងថ្នាក់ដឹកនាំឯទៀត គឺធ្វើឡើងដោយសន្តិវិធី ដើម្បីទៅដោះស្រាយបញ្ហាដែលកម្ពុជាកំពុងប្រឈម។
លោកស្រី មានប្រសាសន៍ប្រាប់ វីអូឌី តាមប្រព័ន្ធ WhatsUp ថា៖«យើងទាំងអស់គ្នា ជាពិសេសលោកប្រធាន សម រង្ស៊ី បានធ្វើពលិកម្មទាំងអស់ដើម្បីប្រទេសជាតិ អស់រយៈពេលជាង២០ឆ្នាំមកហើយ។ យើងខ្ញុំមិនមែនជាជនក្បត់ជាតិ។ ផ្ទុយទៅវិញយើងខ្ញុំទទួលរងគ្រោះគ្រប់បែបយ៉ាងទាំងអស់ តែចំពោះយើងខ្ញុំមិនមែនជាការសំខាន់ទេនៅក្នុងការចោទប្រកាន់នៅក្នុងការចាប់ចង នៅក្នុងការដាក់ពន្ធធនាគារ តែចំពោះប្រទេសជាតិជាការសំខាន់។ ផ្តល់យុត្តិធម៌ជូនប្រជាពលរដ្ឋយើង ផ្តល់សិទ្ធិសេរីភាពជូនប្រទេសជាតិយើង ប្រជាពលរដ្ឋយើងគឺជាការសំខាន់»។
អ្នកវិភាគបញ្ហានយោបាយ លោក ឡៅ ម៉ុងហៃ ចាត់ទុកដីកាចាប់ខ្លួនអតីតថ្នាក់ដឹកនាំបក្សប្រឆាំងទាំង៩រូប ជាការប្រើប្រាស់អំណាចនីតិបញ្ញាត្តិដាក់សម្ពាធលើគូបដិបក្ខនយោបាយពីគណបក្សកាន់អំណាច ដែលលោកថា មិនមែនជារឿងភ្ញាក់ផ្អើល។
លោក ម៉ុងហៃ យល់ឃើញថា បើអ្នកនយោបាយខ្មែរបន្តឈ្លោះគ្នាទៀត បញ្ហានឹងវិវត្តទៅមុខដោយមិនអាចនឹកស្មានដល់ ដោយលោកសម្អាងថា កម្លាំងគាំទ្រលើភាគីបក្សប្រឆាំងដែលមានសំឡេងពាក់កណ្តាលប្រទេសនៅមិនទាន់ថមថយ។
លោកផ្តល់អនុសាសន៍ថា ភាគីនយោបាយទាំង២ គួរស្វែងរកអន្តរាគមន៍ពីអង្គព្រះមហាក្សត្រដើម្បីការផ្សះផ្សាជម្លោះ ដូចមានចែងក្នុងរដ្ឋធម្មនុញ្ញ និងដែលធ្លាប់អនុវត្តបានជោគជ័យកន្លងមក។
លោក ឡៅ ម៉ុងហៃ៖ «គឺគេងាកទៅរត់រកព្រះមហាក្សត្រដែលលោកជាអាជ្ញាកណ្តាល ដែលធានាឱ្យមានការប្រើប្រាស់អំណាចឱ្យមានភាពប្រក្រតី។ ឥឡូវនេះ យើងវាអត់មានភាពប្រក្រតី។ ដូច្នេះ លោកអាចកោះហៅអ្នកពាក់ព័ន្ធហ្នឹង ភាគីពាក់ព័ន្ធប្រធានៗទៅជួបគ្នាដោះស្រាយបញ្ហាជម្លោះរវាងគ្នា ដោយសន្តិវិធី តាមការជជែកគ្នា ចរចាគ្នាទៅបាទ»។
លោក ហ៊ុន សែន ក្នុងពិធីចែកសញ្ញាបត្រដល់និសិត្សក្នុងរាជធានីភ្នំពេញ នៅថ្ងៃពុធកន្លងទៅនេះ បានចាត់ទុកគម្រោងមាតុភូមិនិវត្តន៍របស់ លោក សម រង្ស៊ី ជាការប៉នប៉ងធ្វើរដ្ឋប្រហារ ហើយថា លោកចាំតែវាយសំពងពេលអតីតមេបក្សប្រឆាំងរូបនេះនៅថ្ងៃនោះ។ ទោះយ៉ាងណាក៏ដោយ លោក ថានឹងលើកលែងទោសអ្នករូមគំនិតនិងចូលរួមជាមួយចលនាលោក សម រង្ស៊ី ប្រសិនបើពួកទាំងនោះចេញមុខសារភាព៕