ក្រុមសហជីព និងក្រុមសិទ្ធិមនុស្សនៅកម្ពុជា បានជំរុញទៅក្រុមហ៊ុនល្បែងកាស៊ីណូ ណាហ្គា វើលដ៍ ឱ្យទទួលយកស្ត្រីជាមេដឹកនាំសហជីពមួយរូបប្រចាំនៅក្រុមហ៊ុនមួយនេះ ត្រឡប់ចូលធ្វើការវិញដោយគ្មានលក្ខខណ្ឌ។
ក្នុងសេចក្ដីថ្លែងការណ៍រួមរបស់ខ្លួននៅថ្ងៃទី០៦ ខែតុលានេះ សហជីព និងអង្គការសិទ្ធិមនុស្សចំនួន ២៤ស្ថាប័ន ក្នុងនោះមានមជ្ឈមណ្ឌលសិទ្ធិមនុស្សកម្ពុជា (CCHR) និងសមាគមការពារសិទ្ធិមនុស្សអាដហុក ជាដើម បានថ្កោលទោសចំពោះសេចក្ដីសម្រេចរបស់ក្រុមហ៊ុន ណាហ្គា វើលដ៍។
ក្រុមសហជីព និងក្រុមសិទ្ធិមនុស្សទាំងនោះ បានចាត់ទុកការបញ្ឈប់មេដឹកនាំសហជីពប្រចាំនៅក្រុមហ៊ុន ណាហ្គា វើលដ៍ ថា ជាការរំលោភ «យ៉ាងធ្ងន់ធ្ងរ» ទៅលើសិទ្ធិសេរីភាពសហជីព ដែលត្រូវបានធានាដោយច្បាប់ជាតិ និងអន្តរជាតិ។
ក្រុមសហជីព និងក្រុមសិទ្ធិមនុស្ស ក៏បានអំពាវនាវទៅក្រសួងការងារ ឱ្យសម្របសម្រួលដោះស្រាយវិវាទការងារនេះ ដើម្បីជំរុញទៅក្រុមហ៊ុន ណាហ្គា វើលដ៍ ឱ្យទទួលយកប្រធានសហជីពចូលធ្វើការងារវិញ។
ក្នុងសេចក្ដីថ្លែងការណ៍កាលពីថ្ងៃទី០២ ខែតុលា ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរប្រចាំនៅក្រុមហ៊ុនកាស៊ីណូ ណាហ្គា វើលដ៍ កញ្ញា ឈឹម ស៊ីថរ ត្រូវបានក្រុមហ៊ុនមួយនេះ បញ្ឈប់ពីតួនាទីកាលពីថ្ងៃទី២០ ខែកញ្ញាកន្លងមក។
សហជីពមួយនេះ បានលើកថា ក្រុមហ៊ុនកាស៊ីណូ ណាហ្គា វើលដ៍ ព្យួរការងាររបស់ស្ត្រីជាមេដឹកនាំសហជីពដោយមិនមានរយៈពេលកំណត់ និងមិនមានមូលដ្ឋានច្បាស់លាស់៕