សាលាឧទ្ធរណ៍ នៅថ្ងៃនេះ បានសម្រេចលើកសវការអ្នកបកប្រែភាសាខ្សែភាពយន្តឯកសាររឿង «ម្តាយខ្ញុំលក់ខ្ញុំ» បន្ទាប់មេធាវីស្នើសុំឱ្យតុលាការកោះហៅដើមបណ្ដឹងឱ្យចូលរួមសវនាការ។
សាលាឧទ្ធរណ៍បានបើកសវនាការបណ្ដឹងជំទាស់របស់មេធាវីការពារក្ដីឱ្យលោក រ៉ាត់ រ័ត្នមុនី ដែលត្រូវបានចោទប្រកាន់ថា «បានញុះញង់ឱ្យមានការរើសអើង» បន្ទាប់ពីលោកបានបកប្រែភាសាខ្សែភាពយន្តរឿង «ម្តាយខ្ញុំលក់ខ្ញុំ» ប៉ុន្តែ សវនាការនេះ ត្រូវបានពន្យាពេលទៅវិញ។
មេធាវីការពារក្ដីឱ្យលោក រ៉ាត់ រ័ត្នមុនី គឺលោក សំ ទិត្យសីហា ប្រាប់វីអូឌីនៅថ្ងៃនេះថា តុលាការសម្រេចពន្យាពេលសវនាការបែបនេះទៅតាមសំណើរបស់លោក។ លោកបន្តថា លោកស្នើសុំឱ្យតុលាការលើកពេលសវនាការទៅថ្ងៃក្រោយវិញ ដោយសារតែសវនាការក្នុងថ្ងៃនេះ មិនមានដើមបណ្ដឹងរដ្ឋវប្បណីចូលរួម។
លោក សំ ទិត្យសីហា ប្រាប់វីអូឌីថា៖ «វត្តមានដើមបណ្ដឹងរដ្ឋប្បវេណី វាមានសារៈសំខាន់ណាស់ ទាក់ទងនឹងសវនាការ សំខាន់បំផុតគូភាគីក្ន្ងងការសួរដេញដោល ហើយចំណុចមួយទៀត យើងឃើញថា ចំណុចដែលយើងចាប់អារម្មណ៍ទាក់ទងនឹងដើមបណ្ដឹងរដ្ឋវប្បណីគាត់អ្នកប្ដឹង ប៉ុន្តែ គាត់បែរជាមិនមក អះអាងការពារទៅនឹងបណ្ដឹងដែលគាត់បឹ្ដងទៅលើលោក រ៉ាត់ រ័ត្នមុនី»។
លោក ទិត្យសីហា បន្តថា៖«អ្វីដែលសំខាន់ គឺទាក់ទងនឹងភាពយុត្តិធម៌ ដើម្បីឱ្យលោក រ៉ាត់ រ័ត្នមុនី គាត់អស់ក្នុងចិត្តនូវយុត្តិធម៌ដែលគាត់ត្រូវទទួលបាន។ បើអត់មានការដេញដោលរវាងអ្នកដែលចោទគាត់ ហើយគាត់ត្រូវបានគេចោទទេ។ ខ្ញុំគិតថា វាជាចំណុចដែលបាត់បង់ឱកាស ឬពេលវេលាមួយក្នុងការឆ្លើយតបនឹងដំណើរការរឿងដែរ»។
លោក រ៉ាត់ រ័ត្នមុនី ត្រូវបានសាលាដំបូងរាជធានីភ្នំពេញ បានសម្រេចផ្ដន្ទាទោសឱ្យជាប់ពន្ធនាគាររយៈពេលពីរឆ្នាំ ក្រោមបទចោទប្រកាន់ «ញុះញង់ឱ្យមានការរើសអើង» កាលពីថ្ងៃទី២៦ ខែមិថុនា ឆ្នាំ២០១៩ ដោយសារលោកបានបំពេញការងារជាមួយបណ្តាញសារព័ត៌មាន Russia Today (RT) អំឡុងពេលផលិតភាពយន្តឯកសាររឿង «ម្តាយខ្ញុំលក់ខ្ញុំ» ដែលនិយាយអំពីរឿងរ៉ាវរបស់ក្មេងស្រីកម្ពុជា តាមការអះអាងថា បានលក់ខ្លួន ដើម្បីជួយសម្រាលភាពក្រីក្រក្នុងគ្រួសាររបស់ពួកគេ។
ទោះជាយ៉ាងណា បណ្តាញសារព័ត៌មានរុស្ស៊ី RT បានចេញសេចក្តីថ្លែងការណ៍មួយសម្តែងការខកចិត្តចំពោះសេចក្តីសម្រេចរបស់សាលាដំបូងរាជធានីភ្នំពេញ ដែលបានផ្តន្ទាទោសអ្នកបកប្រែជនជាតិខ្មែរលោក រ៉ាត់ រ័ត្នមុនី ឱ្យជាប់ពន្ធនាគាររយៈពេលពីរឆ្នាំនោះ។ក្នុងសេចក្តីថ្លែងការណ៍នោះ បណ្តាញសារព័ត៌មាន RT បានជំទាស់ទៅនឹងការលើកឡើងរបស់រដ្ឋាភិបាលដែលថា ភាពយន្តឯកសារនេះជា «ព័ត៌មានមិនពិត» ដោយអះអាងថា RT «តែងតែប្រកាន់ខ្ជាប់នូវស្តង់ដាខ្ពស់បំផុតក្នុងការផលិតភាពយន្តឯកសាររបស់ខ្លួន»៕