អតីតបក្សប្រឆាំងដ៏ធំរបស់កម្ពុជា បានប្រកាសមិនទទួលស្គាល់លទ្ធផលនៃការបោះបង្គោលព្រំដែនកម្ពុជា-វៀតណាម ដែលទើបតែត្រូវបានលោកនាយករដ្ឋមន្ត្រី ហ៊ុន សែន ចុះហត្ថលេខាជាមួយភាគីវៀតណាមកាលពីសប្ដាហ៍មុននោះឡើយ។
ក្នុងដំណើរទស្សនកិច្ចរយៈពេល ២ថ្ងៃទៅកាន់ប្រទេសវៀតណាមកាលពីសប្ដាហ៍មុន លោក ហ៊ុន សែន បានចុះហត្ថលេខាទទួលស្គាល់លទ្ធផលនៃការបោះបង្គោលព្រំដែនគោកកម្ពុជា-វៀតណាម ដែលត្រូវបានធ្វើឡើងរួចរាល់ដល់ទៅ ៨៤ភាគរយរួចមកហើយ។
ប៉ុន្តែ ក្នុងសេចក្ដីថ្លែងការណ៍កាលពីថ្ងៃទី០៥ ខែតុលាកន្លងមកនេះ គណបក្សសង្គ្រោះជាតិដែលត្រូវបានតុលាការកំពូលរំលាយចោលទៅហើយកាលពី២ឆ្នាំមុននោះ បានប្រកាសមិនទទួលស្គាល់ការបោះបង្គោលព្រំដែន ដែលសម្រេចឡើងដោយរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ជាមួយប្រទេសវៀតណាមនោះឡើយ។
អតីតគណបក្សប្រឆាំងដ៏ធំមួយនេះ បានអះអាងទៀតថា ការបោះបង្គោលព្រំដែននាពេលកន្លងមក គឺជាការកាត់ដីឱ្យប្រទេសជិតខាងមួយនេះដោយស្របច្បាប់ ដែលបក្សប្រឆាំងថា «មិនអាចទទួលយកបាន» នោះទេ។
តាមលិខិតដដែលនោះ អតីតបក្សប្រឆាំង បញ្ជាក់ថា ខ្លួនក៏នឹងសើរើផងដែរនូវសន្ធិសញ្ញាព្រំដែនរវាងប្រទេសទាំងពីរ ដោយសំអាងថាជាសន្ធិសញ្ញាខុសច្បាប់ ហើយដែលត្រូវបានធ្វើមោឃភាពដោយកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ និងរដ្ឋធម្មនុញ្ញកម្ពុជាឆ្នាំ១៩៩៣ផងដែរ។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង ច្រានចោលការចោទប្រកាន់របស់អតីតបក្សប្រឆាំង និងថា ការប្រកាសសើរើនោះ គឺជាការសន្យាខ្យល់របស់ក្រុមមេដឹកនាំអតីតបក្សប្រឆាំង។
លោក វ៉ា គឹមហុង មានប្រសាសន៍ប្រាប់ វីអូឌី តាមទូរសព្ទថា៖«អាហ្នឹង[ការសើរើ]យើងចាំបានអំណាចសិន សឹមយើងយល់សប្តិថាយើងធ្វើអីបានឬមិនបាន។ បើយើងចង់សើរើទាល់តែយើងកាន់អំណាច ចាំយើងសើរើទៅ បើយើងមិនទាន់បានអំណាច មិនទាន់ចូលដីនៅស្រុកខ្មែរ មិនទាន់ទាំងបានផង ចង់សើរើម៉េច? សើរើនៅលើអាកាសអ៎ោះ! សើរើតាមអី? តាមអាកាស តាមខ្យល់»។
សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន លើកឡើងថា ការចុះហត្ថលេខាទទួលស្គាល់ការវាស់វែង និងបង្គោលព្រំដែនបោះរួចរវាងកម្ពុជា និងវៀតណាម ធ្វើឡើងក្នុងកាលៈទេសៈដែលកម្ពុជាពុំទាន់មានឯកភាពនយោបាយ និងថា ការនេះនឹងអាចបង្កភាពចម្រូងចម្រាស់នៅថ្ងៃអនាគត។
លោក រ៉ុង ឈុន មានប្រសាសន៍ថា៖ «បើសិនជាការចុះហត្ថលេខាទទួលយកដោយភាពចម្រូងចម្រាស់បែបនេះ វានឹងបន្សល់ទុកភាពមិនច្បាស់លាស់ទៅដល់មនុស្សជំនាន់ក្រោយ។ អីចឹង មុននឹងយើងចុះហត្ថលេខាទទួលយក ៨៤ភាគរយដែលត្រូវបានបោះហ្នឹង ធ្វើម៉េចយើងត្រូវធ្វើការពិនិត្យឡើងវិញ ហើយឱ្យវាមានការចុះសម្រុងគ្នាគ្រប់ភាគីសង្គមស៊ីវិល ក៏ដូចជាអ្នកនយោបាយ។ យើងត្រូវតែចុះសម្រុងថា នឹងអាចទទួលយកបានទាំងអស់គ្នា។ អាហ្នឹងហើយបានជាការល្អប្រសើរ»។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយភាគីទាំងពីរបានព្រមព្រៀងគ្នាបោះបង្គោលសរុបចំនួន ៣១៤ ដើម្បីកំណត់ខ្សែបន្ទាត់ព្រំដែនរវាងគ្នានិងគ្នា ហើយនៅសល់ចំណុចមិនឯកភាពគ្នា ១៦ភាគរយទៀត នឹងធ្វើបន្តបន្ទាប់ពីភាគីបារាំងផ្តល់ផែនទីចម្លងតាមមាត្រដ្ឋានបំប្លែងពីខ្នាត១លើ១០០ពាន់ មកខ្នាត១លើ៥០ពាន់ តាមកិច្ចព្រមព្រៀងកម្ពុជា និងវៀតណាម៕