កម្មករកម្មការិនីបម្រើការនៅរោងចក្រ ហ៊ឹង ជីង ស្ថិតក្នុងខណ្ឌមានជ័យ រាជធានីភ្នំពេញ បានរកកិច្ចអន្តរាគមន៍ពីក្រសួងការងារឲ្យជួយដោះស្រាយវិវាទការងារ ដោយចោទថាថៅកែរោងចក្រនេះបិទទ្វារឈប់ដំណើរការអាជីវកម្មដោយមិនបានទូទាត់ប្រាក់សំណងជូនពួកគេ។
កម្មករកម្មការិនីប្រមាណ៤០នាក់បម្រើការនៅរោងចក្រ ហ៊ឹង ជីង ស្ថិតក្នុងភូមិឬស្សី សង្កាត់ស្ទឹងមានជ័យបានប្រមូលផ្តុំគ្នាឈរលើកបដាមុខក្រសួងការងារនៅថ្ងៃនេះ ដើម្បីសុំអន្តរាគមន៍ពីរដ្ឋមន្ត្រីក្រសួងការងារលោក អ៊ិត សំហេង។
កម្មការនីផ្នែកដេរម្នាក់អ្នកស្រី ចក់ ស្រីអូន ប្រាប់អ្នកសារព័ត៌មាននៅកន្លែងតវ៉ាថា រយៈពេល២ខែហើយដែលរោងចក្រ ហ៊ឹង ជីង បិទទ្វារដោយមិនបានទូទាត់ប្រាក់សំណងផ្សេងៗ និងមិនបានបើកប្រាក់ឈ្នួលចំនួន២ខែជូនកម្មករ។
កម្មការនីវ័យ៤០ឆ្នាំរូបនេះ បន្តថា ករណីថៅកែបិទទ្វាររោងចក្រនេះបានធ្វើឲ្យរូបគាត់ និងកម្មករផ្សេងទៀតប្រឈមការខ្វះខាតក្នុងជីវភាពគ្រួសារដោយពុំមានលុយបង់ថ្លៃបន្ទប់ជួល ទឹកភ្លើង ថ្លៃកូនរៀន និងបង់សងធនាគារជាដើម។
អ្នកស្រីបន្ថែមថា៖ «ខ្ញុំសុំទៅខាងក្រសួងការងារជួយពន្លឿនការដោះស្រាយជូនពួកខ្ញុំឲ្យឆាប់ចប់ផង។ ប្រសិនបើនៅពន្យារពេលយូរពួកខ្ញុំប្រឈមនឹងផលប៉ះពាល់ច្រើនណាស់ ព្រោះពួកខ្ញុំត្រូវចំណាយឲ្យកូនរៀន ចំណាយលើការហូបចុកប្រចាំថ្ងៃគ្រប់សព្វបែបយ៉ាងក្នុងក្រុមគ្រួសាររបស់ពួកយើងហ្នឹង»។
កម្មករផ្នែកដេរម្នាក់ទៀតកញ្ញា ថូ សុមាលី និយាយថា ករណីថៅកែបិទទ្វាររោងចក្រនេះ គឺមិនបានជូនដំណឹងដល់កម្មករដឹងមុននោះទេ ហើយពួកគេបានដេកយាមមុខរោងចក្រនេះរយៈពេល២ខែមកហើយ ក្រោយសង្ស័យថា រោងចក្របិទទ្វារ។
កញ្ញាបន្ថែមថា«គេបិទទ្វារគេអត់មានការជូនដំណឹងអីទេ។ គេបិទភ្លើង គេលូចដឹកឥវ៉ាចេញអស់ខ្លះ។ និយាយអ្វីក៏គេមិនប្រាប់។ អីចឹងហើយបានជាពួកខ្ញុំសម្រេចចិត្តមកក្រសួងនាំគ្នាឈរលើកបដាជំរុញទៅក្រសួងឲ្យពន្លឿនការដោះស្រាយ»។
វិអូឌីមិនអាចសុំការឆ្លើយតបពីអ្នកនាំក្រសួងការងារលោក ហេង សួរ បានទេជុំវិញករណីនេះ។
ក្រោយក្រុមកម្មករឈរលើកបដានៅមុខក្រសួងការងារនៅម៉ោងប្រហែល៩ព្រឹកថ្ងៃនេះ មន្រ្តីជាន់ខ្ពស់នៅក្រសួងការងារលោក និន វណ្ណៈ បានអនុញ្ញាតឲ្យតំណាងកម្មករចូលជួប និងដាក់ញត្តិ។ តំណាងកម្មករអះអាងថា លោក និន វណ្ណៈបានសន្យាចំពោះមុខពួកគេថា នឹងបញ្ជូនញត្តិនោះទៅរដ្ឋមន្ត្រីក្រសួងការងារលោក អ៊ិត សំហេង ដើម្បីធ្វើការងារសម្រេច និងដោះស្រាយ។
ប្រធានរដ្ឋបាលរោងចក្រ ហ៊ឹង ជីង អ្នកស្រី អួយ ណៃស៊ីម បានចោទប្រកាន់កម្មករ និងសហជីពខាវឌូថា ជាអ្នកធ្វើឲ្យរោងចក្រមួយនេះលែងដំណើរការ ដោយថាសហជីពបានដឹកនាំកម្មករធ្វើកូដកម្មរហូតថៅកែបិទទ្វាររោងចក្រ។
ប្រធានរដ្ឋបាលរោងចក្ររូបនេះបន្តថា ថៅកែរោងចក្រមិនបានគេចវេសក្នុងការដោះស្រាយសំណងជូនកម្មករនោះទេ ដោយអ្នកស្រីថា ថៅកែសម្រេចឲ្យកម្មករលក់សំភារៈក្នុងរោងចក្រទាំងអស់ ដើម្បីទូទាត់សំណង ប៉ុន្តែភាគីកម្មករមិនព្រមខ្លួនឯង។
អ្នកស្រី បន្ថែមថា៖«ថៅកែគាត់មិនបានរត់ចោលកម្មករទៅណាទេ។ គាត់នៅតែមានជំហរជួយដោះស្រាយសំណងឲ្យកម្មករ។គាត់អត់មានលុយបើកឲ្យកម្មករមែន ប៉ុន្តែគាត់មានម៉ាស៊ីនមានអីវ៉ាន់នៅក្នុងរោងចក្រហ្នឹងឲ្យឡៃឡុងដើម្បីលុយឲ្យកម្មករ ។ ប៉ុន្តែកម្មករចាស់ៗទៅបាតុកម្មព្រឹកមិញដែលជាមេបះបោរហ្នឹងគាត់មិនព្រម។ ហើយពួកគាត់ហ្នឹងបះបោរបាតុកម្ម១ខែ២ទៅ៣ដងហ្នឹងដែលធ្វើឲ្យរោងចក្របិទទ្វារ»។
មន្ត្រីសម្របសម្រួលនៅសម្ព័ន្ធសហជីពស៊ីខាវឌូលោក ឃឹម មករា បានច្រានចោលការចោទប្រកាន់នេះ ដោយថា ការលើកឡើងរបស់ប្រធានរដ្ឋបាលរោងចក្រនេះមិនពិតនោះទេ ហើយថាសហជីពស៊ីខាវឌូ បានដាក់បណ្តឹងទៅតុលាការរួចហើយចំពោះការចោទប្រកាន់នេះពីបទ«បរិហារកេរិ៍្តជាសាធារណៈ»។
មន្ត្រីសហជីពរូបនេះបន្តថា ចំពោះការលក់ឡៃឡុងសំភារៈក្នុងរោងចក្រវិញ គឺលោកស្នើឲ្យភាគីរោងចក្រចេញលិខិតបញ្ជាក់ថាក្ស័យធនជាមុនសិនទើបកម្មករហ៊ានលក់។
លោក បន្ថែមថា៖«រដ្ឋាភិបាលគួរតែចាត់វិធានការទៅលើនិយោជក ដែលបិទទ្វាររត់ចោលកម្មករ ហើយមិនបានផ្តល់សំណងជូនកម្មករ។ អីចឹងសុំឲ្យរដ្ឋាភិបាលគិតពិចារណាឡើងវិញចំពោះអ្នកវិនិយោគដែលមកនៅស្រុកខ្មែរយើងហ្នឹង»។
មន្ត្រីសម្របសម្រួលនៅសម្ព័ន្ធសហជីពស៊ីខាវឌូលោក ឃឹម មករា ឲ្យដឹងថា តាមផ្លូវច្បាប់បើរោងចក្របិទទ្ធាត្រូវទូទាត់ប្រាក់សំណងចំនួន៥ចំណុចជូនកម្មករ មានប្រាក់ជំងឺចិត្ត ប្រាក់រំលឹកអតីតភាពការងារ ប្រាក់បណ្តេញចេញ ប្រាក់បំណាច់ឆ្នាំ និងប្រាក់ខែចុងក្រោយ។ បើតាមលោក ឃឹម មករា នៅរោងចក្រ ហ៊ឹង ជីង មានកម្មករទាំងថ្មី និងចាស់សរុប១០៧នាក់ ដែលមិនទាន់បានបើកប្រាក់ឈ្នួលចំនួន២ខែ និងមិនទាន់ទូទាត់ប្រាក់សំណង ក្រោយថៅកែបិទទ្វាររោងចក្រ៕