រដ្ឋាភិបាលកម្ពុជា តាមរយៈគណៈកម្មាធិការសិទ្ធិមនុស្ស ប្រកាសប្រមូលមតិយោបល់និងទស្សនៈដើម្បីអនុវត្តអនុសាសន៍ត្រួតពិនិត្យជាសកល UPR។ នេះបើតាមសេចក្ដីប្រកាសព័ត៌មាន របស់គណៈកម្មាធិការសិទ្ធិមនុស្សកម្ពុជា ចេញផ្សាយកាលពីថ្ងៃទី០៧ខែតុលា។
គេហទំព័ររបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាឱ្យដឹងថា យន្តការពិនិត្យជាសកលតាមកាលកំណត់ Universal Periodic Review (UPR) គឺជាដំណើរការតែមួយគត់ដែលពាក់ព័ន្ធនឹងការពិនិត្យរបាយការណ៍នៃកំណត់ត្រាសិទ្ធិមនុស្សរបស់រដ្ឋជាសមាជិកអង្គការសហប្រជាជាតិទាំងអស់។ UPR ក៏ជាដំណើរការមួយដែលប្រឹងប្រែងព្យាយាមសម្រេចដោយរដ្ឋ ដោយមានការជួយជ្រោមជ្រែងពីក្រុមប្រឹក្សាសិទ្ធិមនុស្ស ដែលផ្តល់នូវឱកាសសម្រាប់រដ្ឋនីមួយៗដើម្បីប្រកាសពីសកម្មភាពអ្វីខ្លះដែលរដ្ឋទាំងនោះបានធ្វើ ដើម្បីកែលម្អស្ថានភាពសិទ្ធិមនុស្សនៅក្នុងប្រទេសរបស់ខ្លួន និងដើម្បីបំពេញកាតព្វកិច្ចសិទ្ធិមនុស្សរបស់រដ្ឋទាំងនោះ ។
ប្រភពដដែល លើកឡើងបន្តថា UPR ក៏ជាធាតុសំខាន់មួយរបស់ក្រុមប្រឹក្សាសិទ្ធិមនុស្ស ដែលក្រើនរំឭកដល់រដ្ឋទាំងឡាយអំពី ទំនួលខុសត្រូវរបស់ខ្លួន ក្នុងការគោរព និងអនុវត្តឲ្យបានពេញលេញនូវសិទ្ធិមនុស្ស និងសេរីភាពជាមូលដ្ឋាន។ គោលបំណងចុងក្រោយនៃយន្តការនេះគឺដើម្បីកែលម្អស្ថានភាពសិទ្ធិមនុស្សនៅគ្រប់ប្រទេសទាំងអស់ និងដោះស្រាយការរំលោភសិទ្ធិមនុស្សនៅគ្រប់ទីកន្លែង។
គណៈកម្មាធិការសិទ្ធិមនុស្សកម្ពុជាប្រកាសថា មតិយោបល់និងទស្សនៈពីគ្រប់ភាគីពាក់ព័ន្ធទាំងអស់ ដែលលើកឡើងក្នុងសិក្ខាផ្សព្វផ្សាយនិងដាក់ឱ្យអនុវត្តអនុសាសន៍ UPR នៅថ្ងៃទី០៩ ១០ខែតុលាខាងមុខ នឹងត្រូវចាត់ទុកជាធាតុចូលដើម្បីយកទៅអនុវត្ត។
អ្នកនាំពាក្យគណៈកម្មាធិការសិទ្ធិមនុស្សកម្ពុជាលោក ជិន ម៉ាលីន មានប្រសាសន៍ថា អនុសាសន៍ទាំងនោះគឺពាក់ព័ន្ធស្ទើតែគ្រប់ស្ថាប័នទាំងអស់ ខណៈដែលគណៈកម្មាធិការសិទ្ធិមនុស្សកម្ពុជាបានបែងចែករួចហើយថាអនុសាសន៍មួយណាត្រូវស្ថាប័នណាជាអ្នកទទួលខុសត្រូវអនុវត្តន៍។
លោក ជិន ម៉ាលីន មានប្រសាសន៍ថា៖ «ដើម្បីធ្វើការពិគ្រោះយោបល់ពីដៃគូអភិវឌ្ឍន៍ សង្គមស៊ីវិល និងគ្រប់ភាគីពាក់ព័ន្ធទាំងអស់ ដើម្បីឱ្យពួកគាត់ចូលរួមផ្តល់យោបល់ពាក់ព័ន្ធទាំងជុំវិញការបែងចែកអនុសាសន៍នេះ ជាពិសេសគឺយន្តការនៃការអនុវត្ត ថាតើត្រូវរៀបចំយន្តការយ៉ាងម៉េចដើម្បីឱ្យការអនុវត្តន៍យន្តការទាំងនោះមានប្រសិទ្ធិភាព»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា កន្លងមករាជរដ្ឋាភិបាលកម្ពុជាបានអនុវត្តន៍អនុសាស្ត្រUPRបានតិចតួចប៉ុណ្ណោះ។ លោករំពឹងតិចតួចប៉ុណ្ណោះថា ស្ថាប័ននានារបស់រាជរដ្ឋាភិបាលទទួលមតិយោបល់ពីសង្គមស៊ីវិលដែលធ្វើការងារការពារសិទ្ធិមនុស្សដើម្បីយកទៅអនុវត្តបន្តនោះ។
លោក អំ សំអាត លើកឡើងថា៖ «អនុសាសន៍ច្រើនណាស់ដែលយើងមើលទៅគេលើកជាដដែលៗ ឧទាហរណ៍ពាក់ព័ន្ធនឹងកំណែរទម្រង់តុលាការឱ្យឯករាជ្យប៉ុន្តែយើងមិនទាន់ឃើញមានការកែប្រែឱ្យបានបានជាឯករាជ្យទេ! យើងមិនជារំពឹងខ្ពស់ប៉ុន្មានទេ ប៉ុន្តែយ៉ាងណាក៏ដោយយើងនៅតែមានសុទិដ្ឋិនិយមថាសិក្ខាសាលាហ្នឹងវាអាចនឹងជួយផ្ដល់យោបល់មួយចំនួនដើម្បីដាក់ចេញជាគោលនយោបាយដើម្បីអនុវត្តទៅតាមអនុសាសន៍UPR»។
ការពិនិត្យរបាយការណ៍ជាសកលតាមកាលកំណត់របស់ប្រទេសកម្ពុជា ត្រូវធ្វើឡើងនៅក្នុងកិច្ចប្រជុំលើកទី ១៦ នៅថ្ងៃទី៣០ ខែមករា ឆ្នាំ ២០១៩។ កាលនោះ សមាជិកអង្គការសហប្រជាជាតិបានផ្ដល់អនុសាសន៍ចំនួន១៩៨ចំណុច ប៉ុន្តែលោកកែវ រ៉េមី ដែលដឹកនាំគណៈប្រតិភូកម្ពុជាប្រកាសទទួលយកអនុសាសន៍ចំនួន១៧៣ ដើម្បីអនុវត្តន៍។ក្រុមប្រទេសប្រកាន់លទ្ធិប្រជាធិបតេយ្យចាប់អារម្មណ៍ផ្តល់អនុសាន៍លើការគោរពសិទ្ធិមនុស្សនិងប្រជាធិបតេយ្យខណៈប្រទេសកាន់របបកុម្មុយនីសដូចជា កូរ៉េខាងជើង វៀតណាមជាដើមនោះបានផ្ដល់អនុសាសន៍ឱ្យកម្ពុជាលើកស្ទួយសិទ្ធិទទួលបានការអប់រំ។ អនុសាសន៍ទាំងនោះរាប់លាតសន្ធឹងសិទ្ធិគ្រប់វិស័យរបស់សង្គមកម្ពុជាដែលរាប់តាំងពីសិទ្ធិអបរំ សិទ្ធិសេរីភាពបញ្ចេញមតិ សិទ្ធិដីធ្លី និងកំណែរទម្រង់ច្បាប់ជាដើម៕