លោកនាយករដ្ឋមន្ត្រីហ៊ុន សែន ថ្លែងថាការដាក់ទណ្ឌកម្មរបស់បរទេសមកលើប្រទេសកម្ពុជា មិនអាចធ្វើឱ្យកម្ពុជាស្លាប់នោះទេ។
ការលើកឡើងរបស់លោកនាយករដ្ឋមន្ត្រីហ៊ុន សែន ធ្វើឡើងស្របពេលដែលសហភាពអឺរ៉ុបកំពុងដំណើរការព្យួរប្រព័ន្ធអនុគ្រោះពន្ធ (EBA)បណ្ដោះអាសន្នពីកម្ពុជា។
ក្នុងពិធីប្រារព្ធខួបអនុស្សាវរីយ៍លើកទី៤០ នៃការបង្កើតធនាគារជាតិនៃកម្ពុជា នាព្រឹកថ្ងៃ១០ ខែតុលានេះ លោក ហ៊ុន សែន បានថ្លែងបែបនេះថា៖
«គេដាក់ទណ្ឌកម្មយើងគ្រប់ទិសទី ប៉ុន្តែកម្ពុជាមិនស្លាប់ទេ។ អ្នកដែលស្រែកដាក់ទណ្ឌកម្មឲ្យកម្ពុជាខ្លាំងជាងគេ ក៏រកស៊ីជាមួយកម្ពុជាច្រើនជាងគេដែរ។ ខ្ញុំមិននិយាយថាប្រទេសណាទេ ស្រែកនោះឮពេញអាស៊ីអាគ្នេយ៍ ក៏ប៉ុន្តែរកស៊ីជាមួយកម្ពុជាក៏ច្រើនដែរ ព្រោះកម្ពុជាប្រើដៃឯកជនឲ្យទៅរកស៊ី គេដឹកទំនិញមក យើងដឹកទំនិញទៅ យើងទូទាត់ឲ្យគេទៅ»។
អ្នកស្រាវជ្រាវពីការអភិវឌ្ឍន៍សង្គម លោក មាស នី មានប្រសាសន៍ថា បើអន្តរជាតិដាក់ទណ្ឌកម្មមកលើកម្ពុជានឹងធ្វើឲ្យសេដ្ឋកិច្ចកម្ពុជាធ្លាក់ចុះ ហើយការអភិវឌ្ឍន៍មានភាពយឺតយ៉ាវក្នុងការប្រកួតប្រជែងសេដ្ឋកិច្ចជាមួយប្រទេសជិតខាង។
លោកមានប្រសាសន៍ថា៖ «បញ្ហាវានឹងមានហើយ ប៉ុន្តែវាធ្ងន់ធ្ងរប៉ុណ្ណានោះ យើងអត់ទាន់ដឹងទេ។ ប៉ុន្តែគ្រាន់តែពេលខ្លះ វាអាចធ្វើឲ្យយើងធ្វើដំណើរយឺត ឧប្បមាថាបើឡានយើងយឺតរត់អត់បាន១០០គីឡូក្នុងមួយម៉ោងទេ ជួនកាលយើងរត់បានតែ៥០គីឡូ ៤០គីឡូក្នុងមួយម៉ោង។ នេះងាយយល់ទេ ឲ្យស្លាប់វាមិនស្លាប់ទេ»។
សហភាពអឺរ៉ុបកាលពីថ្ងៃទី១១ ខែកុម្ភៈ ឆ្នាំ២០១៨ បានប្រកាសពីដំណើរការឈានទៅការព្យួរ EBA បណ្ដោះអាសន្នពីកម្ពុជា ក្រោយពីរកឃើញថា រដ្ឋាភិបាលកម្ពុជាបានបរាជ័យក្នុងការបំពេញកាតព្វកិច្ចក្រោមកិច្ចព្រៀមព្រៀង EBA និងការបន្តធ្វើឲ្យស្ថានភាពសិទ្ធិមនុស្សធ្លាក់ចុះ ផ្ទុយនឹងកិច្ចព្រមព្រៀង។ ប្រព័ន្ធអនុគ្រោះពន្ធ (EBA) នេះ ធ្វើឲ្យកម្ពុជារួចផុតពីកាតព្វកិច្ចបង់ពន្ធគយ ដែលមានតម្លៃជិត ៧០០លានដុល្លារក្នុងមួយឆ្នាំៗ៕