ប្រជាពលរដ្ឋប្រមាណជាជាង១០០នាក់នៅស្រុកតំបែរ ខេត្តត្បូងឃ្មុំ បានប្រមូលផ្តុំគ្នាមុខសាលាស្រុកនៅថ្ងៃនេះ ដើម្បីទាមទារទៅអាជ្ញាធរឲ្យដោះលែងតំណាងពួកគេម្នាក់ដែលអាជ្ញាធរបានចាប់ខ្លួន។
ពលរដ្ឋម្នាក់លោក ម៉ុន ស៊ីថូ ប្រាប់វីអូឌីថា តំណាងសហគមន៍ម្នាក់នៅឃុំត្រពាំងព្រីង គឺលោក សែម សាង ត្រូវបានសមត្ថកិច្ចចម្រុះមាននគរបាល ប៉េអឹម និងអាជ្ញាធរស្រុកចាប់ខ្លួននៅថ្ងៃនេះទាំងពុំមានដីកា និងមិនបានប្រាប់ពីមូលហេតុច្បាស់លាស់ ដែលធ្វើឲ្យអ្នកភូមិមិនពេញចិត្ត ហើយនាំគ្នាមកតវ៉ាមុខសាលាស្រុក។
លោក ម៉ុន ស៊ីថូ រៀបរាប់ថា តំណាងសហគមន៍លោក សែម សាង ត្រូវអាជ្ញាធរចាប់ខ្លួននៅតាមផ្លូវក្នុងសហគមន៍ ខណៈដែលតំណាងរូបនោះចេញពីរៀនរបៀបចិញ្ចឹមមាន់ជាមួយប្រជាពលរដ្ឋផ្សេងទៀត។
លោកបន្ថែមថា៖«ឥលូវពួកប្រជាពលរដ្ឋគាត់កំពុងមកមុខសាលាស្រុកដើម្បីតវ៉ាទាមទារឲ្យអាជ្ញាធរដោះលែងតំណាងពួកគេមកវិញ ព្រោះពួកគាត់យល់ឃើញថា ការចាប់នេះអត់មានដីកា និងមិនមានការស៊ើបសួរច្បាស់លាស់ដោយគាត់មកស្ទាក់ចាប់តាមផ្លូវអីចឹង។ ដូច្នេះហើយប្រជាពលរដ្ឋគាត់អត់ព្រមទេ»។
ពលរដ្ឋម្នាក់ដែលរួមតវ៉ាដែរនោះគឺលោក ឆេង ឆូយ និយាយថា តំណាងសហគមន៍លោក សែម សាង ដែលអាជ្ញាធរចាប់ខ្លួននោះជាមនុស្សម្នាក់សកម្មក្នុងការចេញមុខតវ៉ាដីធ្លីជាមួយក្រុមហ៊ុនចិនមួយនៅក្នុងសហគមន៍របស់ពួកគេ។ លោកបន្តថា រូបលោក និងអ្នកភូមិផ្សេងទៀតទាមទារទៅអាជ្ញាធរដោះលែងតំណាងពួកគេ ដោយយល់ថាតំណាងពួកគេពុំមានកំហុសនោះទេ។
លោក ឆេង ឆូយ ឲ្យដឹងថារហូតមកដល់ពេលនេះលោកមិនថាអាជ្ញាធរចាប់តំណាងពួកគេយកទៅណានោះទេ ដែលធ្វើឲ្យសាច់ញាតិ និងអ្នកភូមិកំពុងមានការព្រួយបារម្មណ៍។
លោកបន្ថែមថា៖«គាត់[តំណាងដែលត្រូវចាប់ខ្លួន]ជាមនុស្សដែលតែងតែជួយដល់ប្រជាពលរដ្ឋ ហើយគាត់មានសម្តីពូកែនិយាយ។ ខ្ញុំយល់ថាការចាប់ខ្លួនគាត់នេះជារឿងអយុត្តិធម៌ណាស់ ព្រោះគាត់មិនកំហុសអីទេ អាជ្ញាធរត្រូវតែដោះលែងគាត់វិញ»។
អភិបាលស្រុកតំបែរ លោក សុខ សារិទ្ធ មិនអាចសុំការឆ្លើយបំពាក់ព័ន្ធករណីនេះបានទេដោយលោកប្រាប់ថារវល់ប្រជុំ។ ចំណែកស្នងការខេត្តត្បូងឃ្មុំលោក ប៉ែន រ័ត្ន មិនទាក់ទងបានទេដោយទូរស័ព្ទចូលលោកចុចបិទ។
កាលពីថ្ងៃទី២២ ខែកក្តដា ក្រសួងរៀបចំដែនដីបានប្រកាសឲ្យសមត្ថកិច្ចស្រាវជ្រាវចាប់មេខ្លោង ដែលក្រសួងចោទថាបានញុះញង់ឲ្យពលរដ្ឋមួយក្រុមនៅស្រុកតំបែរ ខេត្តត្បូងឃ្មុំ ឡើងមកតវ៉ាទាមទារដីព្រៃសហគមន៍នៅក្រសួងមួយនេះ។
ក្នុងសេចក្តីប្រកាសនោះក្រសួងបានបញ្ជាក់ថា តំណាងសហគមន៍ចំនួន៧នាក់ក្នុងនោះមានលោក សែម សាង ផងដែរដែលអះអាងថា តំណាងឲ្យពលរដ្ឋ៦៧៦គ្រួសារ មកពីសហគមន៍ត្រពាំងព្រីង សហគមន៍កំប្រើស សហគមន៍ស្រែប្រាំង និងសហគមន៍ផ្សេងៗទៀត ស្ថិតក្នុងឃុំត្រពាំងព្រីង ស្រុកតំបែរ ដែលប្តឹងទាមទារដីព្រៃសហគមន៍៣៧១៨ហិកតានោះ គឺក្រសួងមិនទទួលការដោះស្រាយជូនឡើយ ដោយថាពួកគេពុំជាប់ពាក់ព័ន្ធជម្លោះដីធ្លីឡើយ៕