ទីភ្នាក់ងារព័ត៌មានរ៉យទ័រ បានឲ្យដឹងថាសាច់ញាតិ និងមន្ត្រីជាន់ខ្ពស់បក្សកាន់អំណាចមួយចំនួនដែលស្និទ្ធនឹងលោកនាយករដ្ឋមន្ត្រីហ៊ុន សែន បានចំណាយលុយរាប់លានអឺរ៉ូទៅវិនិយោគនៅប្រទេសមួយក្នុងសហគមន៍អឺរ៉ុប ដើម្បីទទួលបានសញ្ជាតិរបស់ប្រទេសនោះ។
ទីភ្នាក់ងារព័ត៌មានរ៉យទ័រ បានចុះផ្សាយកាលពីម្សិលមិញថា លោកស្រី ហ៊ុន គឹមឡេង ក្មួយស្រីលោក ហ៊ុន សែន មានអចលនទ្រព្យតម្លៃរាប់សិបលានអឺរ៉ូនៅទីក្រុងឡុងដ៍ និងសិង្ហបុរី និងទទួលបានសញ្ជាតិស៊ីបក្នុងឆ្នាំ២០១៦។ លោក នេត សាវឿន ស្វាមីលោកស្រី ហ៊ុន គឹមឡេង បានស្នើសុំសញ្ជាតិស៊ីបជាមួយកូនស្រីរបស់គាត់២នាក់ក្នុងឆ្នាំ២០១៦។ លោកស្រី នេត វិជុណា កូនស្រីម្នាក់របស់លោក នេត សាវឿន បានស្នើសុំសញ្ជាតិតាមម្តាយ ត្បិតបានចំណាយលុយ៥.៥លានអឺរ៉ូលើអាផាតធឺមិន នៅក្រុងឡុងដ៍ ខណៈលោកស្រី ហ៊ុន ចន្ថា ក្មួយស្រីម្នាក់ទៀតរបស់លោក ហ៊ុន សែន បានកាន់កាប់អចលនទ្រព្យតម្លៃរាប់សិបលានដុល្លារនៅក្រុងឡុងដ៍ និងជិះយន្តហោះឯកជនទៅកាន់រមណីយដ្ឋានប្រណិតៗនៅតំបន់អឺរ៉ុប។
ប្រភពដដែល ឲ្យដឹងទៀតលោកស្រី ជឹង សុភាព ទទួលបានសញ្ជាតិស៊ីបនៅក្នុងឆ្នាំ២០១៧ បន្ទាប់ពីវិនិយោគលុយ២លានអឺរ៉ូលើសណ្ឋាគារ Radisson Blu នៅប្រទេសស៊ីបក្នុងឆ្នាំដដែល។ លោក ឡៅ ម៉េងឃិន ជាស្វាមីបានស្នើសុំសញ្ជាតិស៊ីបជាមួយសមាជិកគ្រួសារ៥នាក់ផ្សេងទៀតនៅក្នុងឆ្នាំ ២០១៦ និង២០១៧។ ចំណែករដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានស្នើសុំសញ្ជាតិស៊ីបក្នុងឆ្នាំ២០១៧ ហើយ ភរិយាឈ្មោះ អ៊ឹម ប៉ូលីកា បានវិនិយោគលុយ២លានអឺរ៉ូលើសណ្ឋាគារ Radisson Blu ក្នុងឆ្នាំ២០១៧ និងទទួលបានសញ្ជាតិស៊ីបក្នុងឆ្នាំដដែល។
វីអូឌីមិនអាចសុំការបំភ្លឺពីអគ្គស្នងការនគរបាលជាតិ លោក នេត សាវឿន និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទេនៅថ្ងៃនេះ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ច្រានចោលការផ្សាយរបស់ទីភ្នាក់ងារសារព័ត៌មានរ៉យទ័រដោយថាកម្ពុជាជាប្រទេសមានសន្តិភាព ហើយលោកមិនជឿថាមន្ត្រីបក្សកាន់អំណាចយកលុយទៅទិញសណ្ឋាគារ និងអាផាត់ធឺមិននៅក្រុងឡុងដ៍នោះទេ។ លោកចាត់ទុកការផ្សាយព័ត៌មានរ៉យទ័រថា បានវាយប្រហារបក្សកាន់អំណាច និងគាំទ្រអតីតបក្សប្រឆាំងទៅវិញ។
លោកមានប្រសាសន៍ថា៖ «អ្នកណាដែលលេចធ្លោ គេចេះតែដាក់ឈ្មោះ មួលបង្កាច់ ដើម្បីឲ្យគណបក្សប្រជាជនកម្ពុជា ខូចប្រជាប្រិយភាព។ វាមិនឡូស្សិច(មិនសមហេតុផល)ទេ ដែលរត់ចោលប្រទេសមួយ[កម្ពុជា]មានសន្តិភាព ទៅនៅប្រទេសមួយដែលកណ្តាលមហាសមុទ្រនៅក្បែរទីកន្លែងដែលកំពុងច្បាំងគ្នា។ ហើយអ្នកនៅក្រៅចេះតែកាន់រឿងក្រុមឧទ្ទាមក្រៅច្បាប់ ហើយដាក់បន្ទុកមកលើរដ្ឋាភិបាលដែលនៅក្នុងស្រុក»។
ប្រទេសស៊ីប គឺជារដ្ឋមួយក្នុងចំណោមរដ្ឋ៣នៃសមាជិកសហភាពអឺរ៉ុប ដែលមានគោលនយោបាយផ្តល់សញ្ជាតិដល់វិនិយោគិន ហើយជារដ្ឋធំបំផុត និងរកចំណូលបានខ្ពស់បំផុត ប៉ុន្តែរងការរិះគន់ថាមានតម្លាភាពតិចបំផុត។ រដ្ឋពីរទៀតនោះ គឺម៉ាល់តា និងប៊ុលហ្គារី។
តាមទីភ្នាក់ងាររ៉យទ័រដដែល ក្នុងឆ្នាំ២០១៣ ដើម្បីសង្គ្រោះវិបត្តិសេដ្ឋកិច្ច ប្រទេសកោះមួយនេះបានដាក់ចេញគោលនយោបាយ Cyprus Investment Programme ផ្តល់សញ្ជាតិដល់អ្នកវិនិយោគបរទេសដែលបានបោះទុនវិនិយោគយ៉ាងហោចណាស់២លានអឺរ៉ូនៅដែនដីរបស់ខ្លួន។
ប្រភពដដែលឱ្យដឹងថា គិតត្រឹមខែកុម្ភៈ ២០១៩ រដ្ឋាភិបាលប្រទេសស៊ីបបានផ្តល់សញ្ជាតិដល់វិនិយោគិនបរទេសចំនួន ១៨៦៤នាក់ គិតរវាងឆ្នាំ២០១៣ ដល់ឆ្នាំ ២០១៨ ជាមួយទំហំទុនវិនិយោគ ៦,៦ពាន់លានអឺរ៉ូ។ ក្រោមកម្មវិធីនយោបាយនោះ សមាជិកគ្រួសារពួកគេ មានប្តី ឬប្រពន្ធ និងកូនៗ អាចស្នើសុំសញ្ជាតិតាមបាន ដោយសរុបកើនដល់ ៣២០០ នាក់។ អ្នកដែលទទួលបានសញ្ជាតិស៊ីប អាចធ្វើដំណើរឆ្លងកាត់ប្រទេសសមាជិកសហភាពអឺរ៉ុបទាំង២៨ប្រទេសបានដោយសេរី៕