អនុប្រធានអតីតគណបក្សប្រឆាំងនិងជាអតីតតំណាងរាស្រ្ត អំពាវនាវទៅរដ្ឋាភិបាលស៊ើបអង្កេតលើមន្ត្រីរបស់ខ្លួនដែលមានទ្រព្យសម្បត្តិនៅក្រៅប្រទេស ដោយចាត់ទុកថា លុយទាំងនោះបានមកពីអំពើពុករលួយ និងបំផ្លាញជាតិ។
អនុប្រធានអតីតគណបក្សសង្គ្រោះជាតិ លោកស្រី មូរ សុខហួរ បានលើកឡើងតាមបណ្តាញ WhatsApp ដោយចោទប្រកាន់ថា សាច់ញាត និងមន្ត្រីរដ្ឋាភិបាលមួយចំនួនបានប្រព្រិត្តអំពើពុករលួយ ហើយបានយកលុយជាតិទិញទ្រព្យសម្បត្តិ និងវិនិយោគនៅក្រៅប្រទេស ដើម្បីទទួលបានសញ្ជាតិបរទេស។
លោកស្រីជំរុញបែបនេះថា៖ «ទាមទារឲ្យលោក ហ៊ុន សែន គាត់វែកមុខថានរណានៅក្នុងជួរដឹកនាំរបស់រដ្ឋាភិបាល ដែលទិញសញ្ជាតិពីប្រទេសដ៏ទៃទៀត ដោយយកលុយពុករលួយពីប្រទេសជាតិយើង យកទៅទិញសញ្ជាតិ ដើម្បីរត់ចោលស្រុកនោះ»។
ការអំពាវនាវរបស់លោកស្រី មូរ សុខហួរ បានធ្វើឡើងបន្ទាប់ពីទីភ្នាក់ងារព័ត៌មានរបស់អង់គ្លេស រ៉យទ័រ ចេញផ្សាយរបាយការណ៍ស៊ើបអង្កេតរបស់ខ្លួនមួយកាលពីសប្តាហ៍មុន។
ទីភ្នាក់ងារព័ត៌មានរ៉យទ័រ បានចុះផ្សាយកាលពីថ្ងៃទី១៦ ខែ តុលាថា លោកស្រី ហ៊ុន គឹមឡេង ក្មួយស្រីលោក ហ៊ុន សែន មានអចលនទ្រព្យតម្លៃរាប់សិបលានអឺរ៉ូនៅទីក្រុងឡុងដ៍ និងសិង្ហបុរី និងទទួលបានសញ្ជាតិស៊ីបក្នុងឆ្នាំ២០១៦។ លោក នេត សាវឿន ស្វាមីលោកស្រី ហ៊ុន គឹមឡេង បានស្នើសុំសញ្ជាតិស៊ីបជាមួយកូនស្រីរបស់គាត់២នាក់ក្នុងឆ្នាំ២០១៦។ លោកស្រី នេត វិជុណា កូនស្រីម្នាក់របស់លោក នេត សាវឿន បានស្នើសុំសញ្ជាតិតាមម្តាយ ត្បិតបានចំណាយលុយ៥.៥លានអឺរ៉ូលើអាផាតធឺមិន នៅក្រុងឡុងដ៍ ខណៈលោកស្រី ហ៊ុន ចន្ថា ក្មួយស្រីម្នាក់ទៀតរបស់លោក ហ៊ុន សែន បានកាន់កាប់អចលនទ្រព្យតម្លៃរាប់សិបលានដុល្លារនៅក្រុងឡុងដ៍ និងជិះយន្តហោះឯកជនទៅកាន់រមណីយដ្ឋានប្រណិតៗនៅតំបន់អឺរ៉ុប។
ភ្នាក់ងារព័ត៌មានរ៉យទ័រក៏បានបង្ហាញដែរថា លោកស្រី ជឹង សុភាព ដែលស្និតជាមួយនឹងលោកស្រី ប៊ុន រ៉ានីនិងជាភរិយា លោក ឡៅ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា ទទួលបានសញ្ជាតិស៊ីបនៅក្នុងឆ្នាំ២០១៧ បន្ទាប់ពីវិនិយោគលុយ២លានអឺរ៉ូលើសណ្ឋាគារ Radisson Blu នៅប្រទេសស៊ីបក្នុងឆ្នាំដដែល។ លោក ឡៅ ម៉េងឃិន បានស្នើសុំសញ្ជាតិស៊ីបជាមួយសមាជិកគ្រួសារ៥នាក់ផ្សេងទៀតនៅក្នុងឆ្នាំ ២០១៦ និង២០១៧។ ចំណែករដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានស្នើសុំសញ្ជាតិស៊ីបក្នុងឆ្នាំ២០១៧ ហើយ ភរិយាឈ្មោះ អ៊ឹម ប៉ូលីកា បានវិនិយោគលុយ២លានអឺរ៉ូលើសណ្ឋាគារ Radisson Blu ក្នុងឆ្នាំ២០១៧ និងទទួលបានសញ្ជាតិស៊ីបក្នុងឆ្នាំដដែល។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាន៍ថា លោកមិនចាប់អារម្មណ៍នឹងការលើកឡើងរបស់អតីតមន្ត្រីបក្សប្រឆាំងនោះទេ។
លោកមានប្រសាសន៍ថា៖ «យើងមិនបាច់ឆ្លើយតបទេ ជាមួយក្រុមឧទ្ទាមក្រៅច្បាប់ វាឥតប្រយោជន៍ទេ គាត់គ្មានសិទ្ធិអ្វីទាមទារ ឬដាក់សំណូមពរមកឲ្យរាជរដ្ឋាភិបាលត្រួតពិនិត្យទេ ពីព្រោះនៅក្នុងប្រទេសកម្ពុជាវាមានអង្គភាពប្រឆាំងអំពើពុករលួយ មានក្រុមប្រឹក្សាប្រឆាំងអំពើពុករលួយរួចហើយ»។
លោកស្រី មូរ សុខហួរ លើកឡើងក្នុងសាររបស់លោកស្រី ដោយលើកឡើងដែរថា អង្គភាពប្រឆាំងអំពើពុករលួយនឹងមិនហ៊ានស៊ើបអង្កេតលើសាច់ញាតិរបស់លោកនាយករដ្ឋមន្ត្រី និងមន្ត្រីជាន់ខ្ពស់របស់លោកនោះទេ។ លោកស្រីចោទថា ស្ថាប័ននេះស្ថិតនៅក្រោមការគ្រប់គ្រងរបស់រដ្ឋាភិបាល។
វីអូឌីមិនអាចសុំការបំភ្លឺពីអ្នកនាំពាក្យអង្គភាពប្រឆាំងអំពើពុករលួយ លោក ឱម យិនទៀង បានទេនៅព្រឹកថ្ងៃច័ន្ទនេះ។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ លោកស្រី ម៉ម ស៊ីថា គាំទ្រឲ្យរដ្ឋាភិបាល និងស្ថាប័នប្រឆាំងអំពើពុករលួយស៊ើបអង្កេតលើមន្ត្រីនិងសាច់ញាតិលោកនាយករដ្ឋមន្ត្រី។ លោកស្រីអះអាងថា បើរដ្ឋាភិបាលនិងអង្គភាពប្រឆាំងអំពើពុករលួយមិនធ្វើការស៊ើបអង្កេតលើករណីនេះទេ នឹងធ្វើឲ្យមានភាពអយុត្តិធម៌សង្គម៕
