អតីតមេដឹកនាំគណបក្សប្រឆាំងនិរទេសខ្លួន លោក សម រង្ស៊ី អំពាវនាវឱ្យពលករចំណាកស្រុកនៅប្រទេសថៃ វិលចូលកម្ពុជានៅថ្ងៃទី៩វិច្ឆិកា ជាមួយលោក ដោយថា ដើម្បីការពារផលប្រយោជន៍ជាតិលើទឹកដីកំណើតរបស់ខ្លួន ។
តាមវីដេអូឃ្លីម បង្ហោះលើបណ្តាញសង្គម នាថ្ងៃទី២៣តុលានេះ លោក សម រង្ស៊ី អះអាងថា ការអំពាវនេះ ដើម្បីឱ្យពលរដ្ឋមានឱកាសកសាងអនាគតថ្មីលើទឹកដីកំណើតរបស់ខ្លួន ដូចជាការបង្កើតការងារមានប្រាក់ឈ្នួលសមរម្យ ទាមទារដីស្រែចម្ការ ដែលបានបាត់បង់មកវិញ ការពារធនធានធម្មជាតិ និងកសាងសង្គមមួយមានសន្តិភាពពេញជាដើម ដែលលោកចោTថា បក្សកាន់អំណាច កំពុងបើកដៃឲ្យក្រុមហ៊ុនបរទេសរំលោភបំពាន។
លោកថា៖«សួមបងប្អូនអញ្ជើញមករួមដំណើរជាមួយគណបក្សសង្គ្រោះជាតិមានទាំងរូបខ្ញុំផងដែរសម រង្ស៊ី យើងវិលត្រឡប់ទៅប្រទេសកម្ពុជាវិញទៅកសាងជីវិតថ្មី អនាគតថ្មី នៅលើទឹកដីកំណើតរបស់យើង។យើងនឹងរស់នៅយ៉ាងសម្បូរសប្បាយលើទឹកដីកំណើតរបស់យើង ប្រកបដោយសន្តិភាព សន្តិភាពរាងកាយ សន្តិភាពផ្លូវចិត្ត គឺអស់មានកង្វល់ដូចប្រជាពលរដ្ឋខ្មែររស់នៅកម្ពុជាសព្វថ្ងៃទេ»។
អតីតគណបក្សសង្គ្រោះជាតិ ដែលមានអ្នកគាំទ្រជាង៣លាននាក់ប្រហាក់ប្រហែលនឹងបក្សកាន់អំណាចដែរនោះ ត្រូវបានតុលាការកំពូលចេញសាលដីការំលាយកាលពីថ្ងៃទី១៦វិច្ឆិកាឆ្នាំ២០១៧មុនការបោះឆ្នោតជាតិមកដល់តាមបណ្ដឹងរបស់ក្រសួងមហាផ្ទៃ ។
សាលដីការនេះ ក៏បានហាមមន្ត្រី១១៨នាក់មិនឱ្យធ្វើនយោបាយរយៈពេល៥ឆ្នាំផងដែរ។
លោកសម រង្ស៊ី ក្រៅពីការស្វែងរកការគាំទ្រពីពលករចំណាកស្រុកនៃគម្រោងវិលចូលកម្ពុជានេះ លោក ក៏ធ្លាប់អំពាវនាវទៅកងទ័ពឱ្យគាំទ្រលោក ដើម្បីសង្គ្រោះប្រជាធិបតេយ្យផងដែរ។
មេដឹកនាំបក្សកាន់អំណាចលោកនាយករដ្ឋមន្ត្រី ហ៊ុន សែន ក្នុងពិធីចែកសញ្ញាបត្រដល់និស្សិត ក្នុងរាជធានីភ្នំពេញ កាលពីម្សិលមិញ បានផ្ញើសារទាំងមិនបញ្ចេញឈ្មោះថា ការកៀរគរមនុស្សដើម្បីប្រឆាំងលោកនៅថ្ងៃទី៩វិច្ឆិកាអាចនឹងបរាជ័យ។
លោកថា៖«សង្ឃឹមយកឈ្នះ ហ៊ុន សែន យ៉ាងម៉េចបើវាយតម្លៃសភាពការខុស ឥឡូវឧទាហរណ៍ថាមនុស្សរាប់លាននាក់លើសលុប ទាហានលើសលុប រង់ចាំតែផ្តួល ហ៊ុន សែន ទេ ។ចុះបើអ៊ីចឹងមែនម៉ិចក៏មិនមក ចាប់បាច់ដល់ថ្ងៃណាទៀត[ចាំបាច់ដល់ថ្ងៃទី៩វិច្ឆិកា]»។
ក្រសួងយុត្តិធម៌តាមរយៈសេចក្ដីថ្លែងការណ៍ចុះថ្ងៃទី២០កញ្ញាចាត់ទុក ទង្វើរបស់លោក សម រង្ស៊ី ថា ជាទង្វើខុសច្បាប់ ធ្វើរដ្ឋប្រហារទម្លាក់រដ្ឋាភិបាលស្របច្បាប់ និងបានគំរាមថា អ្នកគាំទ្រចលនានេះ នឹងជាប់ពន្ធនាគារពី៥ទៅ១០ឆ្នាំ ពីបទ«ឧបឃាត »។
មកដល់ពេលនេះតុលាការបានចេញដីកាបង្គប់ឱ្យឃុំខ្លួនអតីតកម្មជននិងមន្ត្រីគណបក្សសង្គ្រោះជាតិជាង៥០នាក់ហើយ ចោទពីបទ« រួមគំនិតក្បត់»។
ពលករនៅប្រទេសថៃមួយរូប ឱ្យVODដឹងថា ពលករនៅប្រទេសថៃជាង២លាននាក់ ពួកគេភាគច្រើននឹងវិលចូលកម្ពុជា តាមការអំពាវនាវរបស់លោក សម រង្ស៊ី មិនបារម្មពីការចាប់ខ្លួន ដោយអាជ្ញាធររដ្ឋាភិបាលទេ។
តំណាងពលកររូបនេះ អះអាងថា ការអមដំណើរលោក សម រង្ស៊ី ចូលម្ពុជា ជាការជំរុញឱ្យរដ្ឋាភិបាលរបស់លោក ហ៊ុន សែន ស្តារប្រជាធិបតេយ្យ តបតាមស្មារតីរដ្ឋធម្មនុញ្ញ មិនមែនជាការធ្វើរដ្ឋប្រហារដូចការចោទប្រកាន់ទេ។
លោកថា៖«រដ្ឋធម្មនុញ្ញរបស់យើងមាត្រា៣៥បានចែងថាពលរដ្ឋទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ។ ចុះហេតុអីគ្រាន់តែយើងទៅគាំទ្រមនុស្សដែលយើងស្រឡាញ់ទៅទួលមនុស្សដែលយើងគាំទ្រ ហេតុអីបានជាហាមឃាត់រារាំង រហូតចោទប្រកាន់យើងថាយើងក្បត់ជាតិចង់ធ្វើរដ្ឋប្រហារ។សួរថា រដ្ឋប្រហារយ៉ាងម៉េចបើយើងអត់មានអាវុធនៅក្នុងដៃផងហ្នឹង»។
អ្នកវិភាគនយោបាយលោក បណ្ឌិត ឡៅ ម៉ុងហៃ បង្ហាញការយល់ឃើញថា ដើមចមនៃជម្លោះនយោបាយ កើតចេញពីការលោភអំណាច មិនគោរពរដ្ឋធម្មនុញ្ញជាច្បាប់កំពូលរបស់ជាតិ ។
លោកថា៖«ប្រភពនៃជម្លោះនឹងគឺការលោភអំណាចនិងលោភទ្រព្យសម្បត្តិហ្នឹងហើយ»។
សហភាពអឺរ៉ុប បានប្រើប្រព័ន្ធអនុគ្រោះពន្ធ EBA ដើម្បីដាក់សម្ពាធទៅរដ្ឋាភិបាលកម្ពុជាស្ដារប្រជាធិបតេយ្យឡើងវិញ ក្នុងនោះអឺរ៉ុបបានទាមទារឱ្យដោះលែង លោក កឹម សុខា និងត្រូវរៀបចំការបោះឆ្នោតឡើងវិញតាមយន្តការប្រជាធិបតេយ្យមានគណបក្សប្រឆាំងដែលបានរំលាយទៅហើយនោះបានចូលរួមប្រកួតឡើងវិញ។
សមាគមរោងចក្រកាត់ដេរកម្ពុជាGMAC បង្ហាញក្ដីបារម្ភថា បើកម្ពុជាមិនអាចរក្សាទុកEBA របស់សហភាពអឺរ៉ុបបាន កម្មករក្នុងវិស័យកាត់ដេរ៧៥ម៉ឺននាក់នឹងប៉ះពាល់ដល់ផ្ទាល់ និងពលរដ្ឋខ្មែរជាង៣លានគ្រួសារផ្សេងទៀតប៉ះពាល់ដោយប្រយោល៕