ប្រមុខរដ្ឋាភិបាលបានជំរុញទៅក្រសួងរ៉ែ និងថាមពលឲ្យស្វែងរកដៃគូសម្រាប់វិនិយោគបង្កើតរោងចក្រផលិតអគ្គិសនីដោយដុតសំរាម ដើម្បីជំរុញឲ្យបរិស្ថានស្អាត។
ថ្លែងក្នុងកិច្ចប្រជុំពេញអង្គគណៈរដ្ឋមន្ត្រីនៅវិមានសន្តិភាពនាព្រឹកនេះ លោកនាយករដ្ឋមន្ទ្រី ហ៊ុន សែន បានលើកឡើងអំពីបញ្ហា សំរាមក្នុងទីក្រុង ដោយក្នុងនោះលោកបានស្នើទៅក្រសួងរ៉ែ និងថាមពល ធ្វើការសិក្សា និងស្វែងរកដៃសាងសង់រោងចក្រផលិតអគ្គិសនីដោយដុតសំរាម។ លោក បន្តថាវិធីនេះនឹងចូលរួមរក្សាសោភ័ណ្ឌភាពទីក្រុង និងបរិស្ថានស្អាត។
លោកនាយករដ្ឋមន្ត្រីហ៊ុន សែន ឲ្យដឹងថាកន្លងមកមានក្រុមហ៊ុនឯកជនជាច្រើនបានមកសិក្សាក្នុងគោលបំណងចង់វិនិយោគរោងចក្រ ផលិតអគ្គិសនីដុតដោយសំរាមនេះ ហើយថារដ្ឋាភិបាលកំពុងសិក្សាដើម្បីរៀបចំដាក់ឲ្យដេញថ្លៃ។
លោកបន្ថែមថា៖«ប្រគល់ភារៈកិច្ចជូនក្រសួងរ៉ែ និងថាមពល ដើម្បីធ្វើការសិក្សាររៀបចំលក្ខខណ្ឌសម្រាប់ឈានទៅធ្វើការដេញថ្លៃរកដៃគូរឯកជនសាងសង់ និងដំណើរការរោងចក្រអគ្គីសនីដុតនៅលីលានចាក់សំរាមរាជធានីភ្នំពេញ ដោយហាមឃាត់ការនាំចូលសំរាមពីបរទសមកប្រើប្រាស់។ នេះជាវិធានការ ក្នុងចំណោមវិធានការជាកញ្ចប់ដដៃទៀត ដើម្បីធានាសោភណ្ឌភាពប្រទសយើងក៏បង្កើតឲ្យមានបរិស្ថានស្អានជូនប្រជាពលរដ្ឋ»។
វីអូឌីមិនអាចសុំការបញ្ជាក់បន្ថែមពីអ្នកនាំពាក្យក្រសួងរ៉ែនិងថាមពលលោក វិចទ័រសូណា បានទេ ដោយទូរសព្ទចូលគ្មានតែអ្នកទទួល។
ប្រធានក្រុមយុវជនសំរាម លោក សាន ដារ៉ាវីដ បានសាទរចំពោះរដ្ឋាភិបាលដែលគ្រោងបង្កើតឲ្យមានរោងចក្រផលិតអគ្គិសនីនេះ ដោយលោកសង្ឃឹមថា គម្រោងនេះនឹងជួយឲ្យជួយបរិស្ថានស្អាត ហើយពលរដ្ឋទទួលមានអគ្គីសនីប្រើប្រាស់គ្រប់គ្រាន់។
ប៉ុន្តែយ៉ាងលោកថា ដើម្បីគ្រប់គ្រង និងទុកដាក់សំរាមឲ្យប្រសិទ្ធភាពនោះលុះត្រាតែមានការចូលរួមពីគ្រប់ភាគីពាក់ព័ន្ធ ហើយរដ្ឋាភិបាលត្រូវចាត់វិធានការតឹងរ៉ឹងដោយបង្កើតច្បាប់ផាកពិន័យ។
លោក មានប្រសាសន៍ថា៖«ការដុតសំរាមទៅជាអគ្គិសនីហ្នឹងខ្ញុំគិតថា វាជាការល្អមួយដោយសារអគ្គិសនីនៅប្រទេសកម្ពុជា។យើងហ្នឹងវាថ្លៃបើយើងប្រៀបធៀបជាមួយប្រទេសជិតខាង។ ម៉្យាងទៀតខ្ញុំគិតថា វាជារឿងថ្មីមួយដែលអាចធ្វើឲ្យប្រជាជនយើងចេះបែងចែកសំរាមថា សំរាមណាខ្លះដែលអាចដុតបាន និងសំរាមណាខ្លះដែលយកទៅធ្វើជាជី និងច្នៃជាអ្វីផ្សេងៗបាន»។
របាយការណ៍របស់មូលិនិធិអាល្លឺម៉ង់ Konrad Adenauer Stiftung (KAS) ចេញផ្សាយកាលពីខែកញ្ញា ឆ្នាំ២០១៩ នេះបានឲ្យដឹងថា ប្រទេសកម្ពុជាទាំងមូលបង្កើតកាកសំណល់សំរាមជាង១ម៉ឺនតោនជារៀងរាល់ថ្ងៃ ឬជាង៣លាន៦សែនតោនក្នុងមួយឆ្នាំ ដែលក្នុងនោះជាង៩០ភាគរយមិនត្រូវបានយកទៅកែច្នៃវិញនោះទេ៕
