អតីតសមាជិកគណបក្សសង្គ្រោះជាតិចំនួន៥៧នាក់ ត្រូវបានអាជ្ញាធរកម្ពុជាចាប់ខ្លួនគិតត្រឹមល្ងាចថ្ងៃទី២៨តុលាឆ្នាំ២០១៩។
អនុប្រធានអតីតគណបក្សសង្គ្រោះជាតិ អ្នកស្រី មួរ សុខហួរ បានចងក្រងតារាងសកម្មជននិងមន្ត្រីមូលដ្ឋានរបស់បក្សប្រឆាំងដែលត្រូវបានចាប់ខ្លួន បង្ហោះតាមហ្វេសប៊ុកហើយមនុស្សដែលត្រូវសមត្ថកិច្ចចាប់ខ្លួន ចំនួន៥៧នាក់ក្នុងនោះមានស្ត្រីចំនួន៦នាក់។
តាមរយៈទូរទស្សន៍ព្រះអាទិត្យអ្នកស្រី មួរ សុខហួរ បានថ្លែងទៅកាន់អ្នកគាំទ្រខ្លួនថា ក្រុមមេដឹកនាំគណបក្សប្រឆាំងបានប្ដឹងទៅអន្តរជាតិ ជុំវិញសំណុំរឿងចាប់ខ្លួននេះហើយ។ អ្នកស្រីថែមទាំងប្តេជ្ញាចិត្តថា នឹងចូលមកប្រទេសកម្ពុជានៅថ្ងៃទី០៩វិច្ឆកា ជាកំណត់ផង។
អ្នកស្រី មួរ សុខហួរ មានប្រសាសន៍ ៖ «បងប្អូនជាសកម្មជនសកម្មនារី នៃគណបក្សសង្គ្រោះជាតិដែលកំពុងរងគ្រោះដោយភាពអយុត្តិធម៌ ដែលកំពុងជាប់នៅពន្ធនាគារបងប្អូនហ្នឹងហើយជាវីរៈជនវីរៈនារីគណបក្សសង្គ្រោះជាតិនឹងមិនបំភ្លេចនូវវីរៈភាព មិនបំភ្លេចនូវការគ្រោះថ្នាក់និងជីវិតដ៏លំបាករបស់បងប្អូនទេ។ យើងនឹងធានាថាមិនទុករឿងហ្នឹងចោលទេ រឿងហ្នឹងយើងប្ដឹងនៅអន្តរជាតិហើយ យើងបញ្ជូនមេធាវីជួយបងប្អូនហើយ។
ទាក់ទងនឹងបញ្ហានេះ អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា អាជ្ញាធរនឹងនៅតែបន្ដអនុវត្តន៍ច្បាប់ចំពោះអ្នកដែលចូលរួមក្នុងចលនាថ្ងៃ០៩វិច្ឆិការបស់លោកសមរង្ស៊ី។ ប៉ុន្តែបើអ្នកណាចូលមកសារភាព នោះនឹងត្រូវបន្ធូរបន្ថយទោស ។
ជិន ម៉ាលីន លើកឡើងថា៖ «មិនតិចជាង១០ទេដែលចូលមកសារភាព អ្នកសារភាពខ្លះបានចូលសារភាពមុនការចោទប្រកាន់បានចូលរួមសារភាពសហការណ៍ជាមួយនឹងសមត្ថកិច្ចគឺច្បាប់គឺផ្តល់ការអនុគ្រោះដោយមិនចោទប្រកាន់អីទេ។ ហើយមានមួយក្រុមទៀត បានសហការណ៍ជាមួយសមត្ថកិច្ចក្រោយពេលចោទប្រកាន់ អាហ្នឹងក៏ច្បាប់ផ្តល់ការអនុគ្រោះដែរ គឺផ្តល់ស្ថានសម្រាលឱ្យនៅក្រៅឃុំ ប៉ុន្តែជាក់លាក់ប៉ុន្មាននោះមិនច្បាស់ទេតែមិនតិចជាង១០ទេ។
ទាក់ទងនឹងការចាប់ខ្លួន អតីតសមាជិកបក្សប្រឆាំងនេះលោកនាយករដ្ឋមន្ត្រីហ៊ុន សែន បានថ្លែងក្នុងកិច្ចប្រជុំគណៈរដ្ឋមន្ត្រីកាលពីសប្ដាហ៍មុនថា ចលនារបស់លោកសមរង្ស៊ីជាចលនាឧទ្ទាមហើយលោកប្រគល់ភារកិច្ចឱ្យរដ្ឋមន្ត្រីក្រសួងការពារជាតិលោក ទៀ បាញ់ រៀបចំទ័ពចាត់វិធានការចំពោះរឿងនេះ។
អ្នកឃ្លាំមើលបញ្ហានយោបាយ លោកបណ្ឌិត ឡៅ ម៉ុងហៃ មានប្រសាសន៍ថា ការចាប់ខ្លួនសកម្មជនបក្សប្រឆាំងជាបន្តបន្ទាប់ជុំវិញសំណុំរឿងពាក់ព័ន្ធនឹងនយោបាយ បានធ្វើឱ្យពលរដ្ឋបាត់បង់ទំនុកចិត្តលើប្រព័ន្ធយុត្តិធម៌នៅកម្ពុជា។
លោកឡៅ ម៉ុងហៃ មានប្រសាសន៍ថា៖ «វិធានការបែបនេះគឺមានការរំលោភសិទ្ធិមនុស្ស ដែលត្រូវបានធានាដោយរដ្ឋធនុញ្ញរបស់កម្ពុជា ។ វាជាវិធានការដែលគេចាប់ប្រជាពលរដ្ឋនៅក្នុងសង្គមកុម្មុនីសផ្តាច់ការឬមូលធនផ្ដាច់ការ គឺដូចជាបាត់បង់ការទុកចិត្តចំពោះប្រជាជនហើយប្រជាជនក៏លែងទុកចិត្តវិញដែរ»។
ក្រៅពីការចាប់ខ្លួន មនុស្សប្រមាណជាង១រយនាក់ផ្សេងទៀតក៏ស្ថិតក្នុងបញ្ជីតាមរកចាប់ខ្លួនរបស់តុលាការទូទាំងប្រទេសដែរក្នុងបទល្មើសរួមគំនិតក្បត់។ មនុស្សទាំងនោះបានរត់គេចខ្លួនចេញពីប្រទេសកំណើតទៅរស់នៅបរទេស។
សមាជិកសភាស៊ុយអែត៦រូប មកពីគណបក្សសង្គមប្រជាធិបតេយ្យចេញសេចក្តីថ្លែងការណ៍មួយកាលថ្ងៃទី១៦តុលា ដោយស្នើទៅលោកនាយករដ្ឋមន្រ្តី ហ៊ុន សែន ឱ្យអនុវត្តអនុសាសន៍អ្នករាយការណ៍ពិសេស UN ប្រចាំកម្ពុជា លោកស្រី រ៉ូណា ស្មីត ដែលបានថ្លែងក្នុងកិច្ចប្រជុំក្រុមប្រឹក្សាសិទ្ធិមនុស្ស UN លើកទី៤២ នៅទីក្រុងហ្សឺណែវ ប្រទេសស្វីស កាលពីខែមុន។
សេចក្តីថ្លែងការណ៍ដដែល ក៏ទាមទារឱ្យរដ្ឋាភិបាលផ្តល់សិទ្ធិធ្វើនយោបាយដល់មន្រ្តីជាន់ខ្ពស់អតីតបក្សសង្គ្រោះជាតិ១១៨រូប គោរពសិទ្ធិធ្វើមាតុភូមិនិវត្តន៍របស់មេដឹកនាំអតីតបក្សនេះ៧រូប ដែលកំពុងរស់នៅនិរទេសខ្លួន ស្តារលទ្ធិប្រជាធិបតេយ្យ នីតិរដ្ឋ និងសេរីភាពបញ្ចេញមតិក្នុងប្រទេសកម្ពុជា៕
