កម្លាំងប្រដាប់អាវុធនៅខេត្ត២ជាប់ព្រំដែនថៃផ្ដើមហាត់សមនៅថ្ងៃនេះ ដោយថា ដើម្បីរក្សាសន្តិសុខ និងសណ្តាប់ធ្នាប់ ខណៈថ្ងៃកំណត់ចូលស្រុករបស់លោក សម រង្ស៊ី ជិតមកចូលមកដល់។
ទំព័របណ្ដាញសង្គមរបស់កងកម្លាំងប្រដាប់អាវុធ ខេត្តបន្ទាយមានជ័យ និងបាត់ដំបង បានផ្សាយជាសាធារណៈនូវសកម្មភាពហ្វឹកហាត់របស់កងកម្លាំងនៅខេត្តជាប់ព្រំដែនថៃទាំងពីរនេះ។ កងកម្លាំងប្រដាប់អាវុធក្នុងខេត្តទាំងពីរបានដង្ហែរក្បួន បង្ហាញកាំភ្លើងខ្លីវែង អាវុធធុនមធ្យម រថពាសដែក រថក្រោះ និងកាំភ្លើងផ្លោងមួយចំនួនផង។
សេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យដែលចេញកាលពីម្សិលមិញ បញ្ជាក់ថា ការហាត់សមនេះជាការត្រៀមដើម្បីរក្សាសន្តិសុខសណ្ដាប់ធ្នាប់។
តំបន់ប្រតិបត្តិការសឹករងខេត្តបន្ទាយមានជ័យតាមរយៈទំព័រហ្វេសប៊ុករបស់ខ្លួន បានផ្សាយថា មេបញ្ជាការតំបន់ប្រតិបត្តិការសឹករង ឧត្តមសេនីយត្រី ជឹម ប៊ុនអាន បានដឹកនាំកម្លាំងហ្វឹកហាត់រួមគ្នាជាមួយកងកម្លាំងមកពីអាវុធហត្ថខេត្តបន្ទាយមានជ័យ និងកងកម្លាំងស្នងការនគរបាលខេត្ត។ លំហាត់សមនេះ ដឹកនាំដោយអភិបាលខេត្តបន្ទាយមានជ័យ លោក អ៊ុំ រាត្រី។
អភិបាលខេត្តបន្ទាយមានជ័យ លោក អ៊ុំ រាត្រី បានបដិសេធមិនធ្វើអត្ថាធិប្បាយចំពោះលំហាត់សមនេះទេ។
លោក អ៊ុំ រាត្រី៖ «សុំទោសណា ខ្ញុំអត់មានពេលនិយាយទេ ខ្ញុំជាប់ប្រជុំ»។
ចំណែកឯស្នងការនគរបាលខេត្តបាត់ដំបង ក៏បានរៀបចំហ្វឹកហាត់កម្លាំងនគរបាលអន្តរាគមន៍នៅទូទាំងខេត្តដែរ។ ប្រភពពីស្នងការបញ្ជាក់ថា យ៉ាងហោចណាស់មានកម្លាំងចម្រុះរួមមានទាហាន កងរាជអាវុធហត្ថ សរុបជាង៤០០នាក់ ហែរក្បួន និងស្ដាប់ការណែនាំរបស់លោក ងួន រតនៈ អភិបាលខេត្តបាត់ដំបង។
ស្នងការនគរបាលខេត្តបាត់ដំបង បានផ្សាយតាមរយៈផេកហ្វេសប៊ុកខ្លួនថា៖ « កងកម្លាំងប្រដាប់អាវុធមានភារកិច្ចការពាររដ្ឋធម្មនុញ្ញ ការពារជាតិ សាសានា ព្រះមហាក្សត្រ។ ក្នុងពេលដែលកងកម្លាំងប្រដាប់អាវុធចេញដំណើរក្នុងភូមិសាស្រ្តក្រុងបាត់ដំបង ត្រូវបានមន្ត្រីរាជការ មហាជន ប្រជាពលរដ្ឋ សិស្សានុសិស្ស ចេញមកទទួលអបអរសាទរ ព្រមទាំងបានផ្តល់នូវគ្រឿងឧបភោគ បរិភោគ បន្លែ ត្រីសាច់ទឹកបរិសុទ្ធជូនដល់កងកម្លាំងយើងផងដែរ។
ទោះជាយ៉ាងណាក្ដី ពលរដ្ឋក្រុងបាត់ដំបងថ្លែងក្នុងលក្ខខណ្ឌមិនបញ្ចេញឈ្មោះឱ្យដឹងថា កម្លាំងចម្រុះរបស់គណៈបញ្ជាការឯកភាពខេត្តបាត់ដំបងនេះ បានរៀបចំហែរក្បួនសម្ញែងនៅក្នុងក្រុងតាមផ្លូវសំខាន់ៗមួយចំនួន តាមសួនច្បារនាគបាញ់ទឹក សួនច្បារជុំវិញស្ទឹងសង្កែ។
ប្រជាពលរដ្ឋម្នាក់ពីបាត់ដំបងនិយាយថា៖ «តាមពិតគឺមានក្រុងរៀបចំឱ្យមានអ្នកហុចស្បៀងអាហារម្ហូបចំណីជូនកងកម្លាំងទាំងនោះ។ អ្នកដែលចូលរួមហុចម្ហូបចំណីបាយទឹកទាំងនោះ ជាក្រុមយុវជនសហព័ន្ធសហភាពយុវជនកម្ពុជាមន្ត្រីរាជការស៊ីវិលជុំវិញខេត្ត ព្រមទាំងសិស្សានុសិស្ស» ។
អភិបាលខេត្តបាត់ដំបង លោក ងួន រតនៈ មិនឆ្លើយតបនឹងសំណួរជុំវិញប្រតិបត្តិការនេះទេ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការប្រមូលផ្ដុំកម្លាំងទ័ព និងបង្ហាញសាច់ដុំកងទ័ពនៅខេត្តទាំងពីរនេះ គឺជាសញ្ញាមួយដែលនាំឱ្យប្រជាពលរដ្ឋព្រួយបារម្ភ។
លោក ស៊ឹង សែនករុណា និយាយថា៖ «គឺយើងចង់ឱ្យមានការរកដំណោះស្រាយណាមួយដោយសន្តិវិធី ដោយមិនចាំបាច់ប្រើកម្លាំទ័ព ឬកម្លាំងប្រជាពលរដ្ឋបែបនេះ វាមានហានិភ័យណាស់សម្រាប់ប្រទេសជាតិយើង។ យើងសូមអំពាវនាវឱ្យភាគីពាក់ព័ន្ធទាំងអស់ ធ្វើយ៉ាងណាសម្របសម្រួលឱ្យស្ថានភាពតានតឹងនេះឱ្យធូរស្រាលវិញ»។
អ្នកឃ្លាំមើលបញ្ហានយោបាយ លោកបណ្ឌិត ឡៅ ម៉ុងហៃ មានប្រសាសន៍ថា ការត្រៀមកម្លាំងប្រដាប់អាវុធទាំងនេះ ហាក់ដូចជាត្រៀមធ្វើសង្គ្រាមជាជាងត្រៀមរក្សាសន្តិសុខ។
លោក ឡៅ ម៉ុងហៃ មានប្រសាសន៍ថា៖ «គឺសម្តេចតេជោជាមេបញ្ជាការកងទ័ព បញ្ជាអ៊ីចឹងទប់ទល់ការវិលត្រឡប់របស់ សម រង្ស៊ី ដោយចោទថា សម រង្ស៊ី ចង់ធ្វើរដ្ឋប្រហារផ្តួលរំលំរដ្ឋាភិបាល និងព្រះមហាក្សត្រ ដូច្នេះ វាជាសឹកសង្គ្រាមតែមិនប្រាកាសថាធ្វើសង្គ្រាមទេ»។
ទាក់ទងនឹងការរៀបចំសណ្ដាប់ធ្នាប់នេះ ក្រសួងមហាផ្ទៃបានចេញសេចក្ដីជូនដំណឹងមួយកាលពីថ្ងៃទី៣០ ខែតុលា ដោយបញ្ជាឱ្យគណៈបញ្ជាការឯកភាពរាជធានីខេត្តទាំងអស់ ពង្រឹងនូវការត្រួតពិនិត្យ និងតាមដានមុខសញ្ញានានារឹតបន្តឹងការចរាចរណ៍ចេញចូលរបស់ពលរដ្ឋពីតំបន់មួយទៅតំបន់មួយ ពិសេសចាត់វិធានការចំពោះចលនាប៉ុនប៉ងវិលមកប្រទេសវិញរបស់លោក សម រង្ស៊ី ដែលរដ្ឋាភិបាលចោទថា ជាចលនាឧទ្ទាមក្រៅច្បាប់៕