មន្ត្រីជាន់ខ្ពស់គណបក្ស ហ្វ៊ុន ស៊ិនប៉ិច អះអាងថា ការច្របាច់ចូលគ្នារវាងគណបក្សនេះ ជាមួយគណបក្សខ្មែររួបរួមជាតិ គឺដើម្បីស្រតាប្រជាប្រិយភាពឡើងវិញ។
មន្ត្រីជាន់ខ្ពស់គណបក្ស ហ្វ៊ុន ស៊ិនប៉ិច លោក ផាន់ សុធី មានប្រសាសន៍នៅថ្ងៃនេះថា ថ្នាក់ដឹកនាំបក្សនេះ រួមជាមួយសមាជិកបក្ស បានសម្រេចយល់ព្រមឲ្យបក្សខ្មែររួបរួមជាតិ ចូលក្នុងបក្ស ហ្វ៊ុន ស៊ិនប៉ិច ដើម្បីរួមគ្នាធ្វើឲ្យគណបក្សនេះមានប្រជាប្រិយភាពឡើងវិញ។
លោកមានប្រសាសន៍ថា៖ «អ្វីក៏ដោយឲ្យតែផលប្រយោជន៍ដើម្បីគណបក្ស យើងបើកចំហរទ្វារទាំងអស់ ដើម្បីធ្វើយ៉ាងម៉េចឲ្យស្របតាមស្មារតី និងគោលនយោបាយរបស់គណបក្ស ដើម្បីបុព្វហេតុផ្សេងៗរបស់ជាតិ»។
អ្នកនាំពាក្យគណបក្សខ្មែររួបរួមជាតិ លោក រុន មាត្រា មានប្រសាសន៍ថា ដើមចមដែលនាំឲ្យបក្សទាំងពីររួបរួមគ្នាឡើងវិញនោះ ដោយសារបោះឆ្នោតកន្លងមក គណបក្សទាំងពីរនេះ បាត់បង់សំឡេងគាំទ្រជាច្រើន។
លោកមានប្រសាសន៍ថា៖ «មានតែយើងមើលការឃើញបទពិសោធន៍ចុះខ្សោយជាបន្តបន្ទាប់ សមាជិកខ្លះមិនទៅបោះឆ្នោត ដោយឃើញបែកបាក់ រឹតតែពិបាក បានជាយើងយកបទពិសោធន៍ដែលធ្លាប់លំបាក ប្រែមករួបរួមគ្នាវិញ»។
ទោះជាយ៉ាងណា មន្ត្រីជាន់ខ្ពស់របស់គណបក្សទាំងពីរនេះ មិនបានប្រាប់ពីពេលវេលាដែលត្រូវធ្វើសមាជគណបក្សនោះទេ ដោយថា នឹងជូនដំណឹងនៅពេលជិតធ្វើសមាជគណបក្ស៕
រាយការណ៍បន្ថែមដោយ៖ សាញ់ ប៊ុនហឿន