សាលារាជធានីភ្នំពេញព្រមានចាត់វិធានការច្បាប់ឈានដល់បញ្ជូនទៅតុលាការ ចំពោះសាធារណជនបន្លំស្លៀកពាក់ឯកសណ្ឋានកងកម្លាំងប្រដាប់អាវុធ ឬប្រហាក់ប្រហែលនៅក្នុងថ្ងៃបុណ្យឯករាជ្យជាតិ៩វិច្ឆិកា និងថ្ងៃបុណ្យអុំទូក ដែលនាំឲ្យមានការភាន់ច្រឡំថាជាសមត្ថកិច្ច ហើយអាចបង្កឲ្យមានចលាចលក្នុងសង្គម។
ក្នុងសេចក្តីជូនដំណឹងរបស់សាលារាជធានីភ្នំពេញចុះផ្សាយកាលពីថ្ងៃទី៥ ខែវិច្ឆិកា ម្សិលមិញនេះថា សាធារណជន និងអាជីវករទាំងអស់ក្នុងរាជធានីភ្នំពេញ មិនត្រូវស្លៀកពាក់ឯកសណ្ឋានកងកម្លាំងប្រដាប់អាវុធ ឬប្រហាក់ប្រហែល ដែលមានអក្សរ POLICE PM ARMY ឬប្រើវិទ្យុទាក់ទង ឬឧបករណ៍ផ្សេងៗ ដោយគ្មានការអនុញ្ញាត ធ្វើឲ្យមហាជនមានការភាន់ច្រឡំថាជាសមត្ថកិច្ច ហើយអាចបន្លំខ្លួនប្រព្រឹត្តបទល្មើសផ្សេងៗបង្កចលាចលក្នុងសង្គមជាដើម។
ករណីនេះ សាលារាជធានីព្រមានថា បើសាធារណជន និងអាជីវកររូបណា ដែលមិនធ្វើតាមការណែនាំទេ ស្ថាប័ននេះនឹងចាត់វិធានការច្បាប់។ សេចក្តីជូនដំណឹងមានខ្លឹមសារថា៖
«ប្រសិនបើពិនិត្យឃើញថា មានសកម្មភាពនេះកើតឡើង ត្រូវចាត់វិធានការអប់រំ ណែនាំ ឲ្យបញ្ឈប់លក់ដូរ ការទិញ។ ក្នុងករណីបង្កជាបទល្មើសជាក់ស្តែង ត្រូវឃាត់ខ្លូន និងបញ្ជូនទៅតុលាការ ដើម្បីចាត់ការតាមនីតិវិធីច្បាប់»។
ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រារព្ធទៅចាប់ពីថ្ងៃទី១០ ដល់ ថ្ងៃ១២ ខែវិច្ឆិកា ឆ្នាំ២០១៩ខាងមុខ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍ថា សមត្ថកិច្ចនឹងត្រូវដាក់ពង្រាយនៅថ្ងៃបុណ្យអុំទូក ការពារសុវត្ថិភាពប្រជាពលរដ្ឋមានចំនួនជិត២ម៉ឺននាក់៕